Read Falam Chin PUITHIAM HNAṬUANNAK 22 Bible Online

PUITHIAM HNAṬUANNAK 22 - Falam Chin bible

PUITHIAM HNAṬUANNAK 22

¹Aaron le a fapa pawl sim dingah,

²Moses hnenih BAWIPA ih thupekmi cu hiti in a si, “Ka hmin thianghlim cu thangsia-ih a um lonak dingah Israel mi pawl in ka hnenih an pekmi thawinak thianghlim pawl cu upat hai seh. Keimah cu BAWIPA ka si.

³Na tesinfa pakhatkhat mithiangfai lo a si caan ah Israel mi pawl in ka hnenih an pekmi thawinak thianghlim kiangih a rat a si ahcun a nun sungah ka hmun thiang ah hna a ṭuan thei nawn lo ding. Himi cu sanmureng tiang nan thlun dingmi a si. Keimah cu BAWIPA ka si.

⁴“Aaron tesinfa pawl sungih phaarnat a neimi, a si lole hnaidok nat a neimi in mithiangfai ih rel a si hlan ahcun a thianghlimmi thawinak pawl cu a ei lo pei. Miruak a dai ngahtu thilri, a si lole miruak a dai ngahtu minung, a si lole amah a bua a suakmi puithiam,

⁵a si lole a thiangfai lomi ramsa le milai a thamtu minung a dai ngahtu puithiam cu mithiangfai lo a si.

⁶Mithiangfai lo a si mi puithiam cu cuih zanlam tiang mithiangfai lo a si ding ih ti a kholh hlan ahcun a thianghlimmi thawinak pawl cu a ei thei lo pei.

⁷Ni a tlak hnu lawngah mithiangfai a si ih a rawl a si mi a thianghlim thawinak pawl cu a ei thei ding.

⁸Mahte thi ramsa pawl siseh, sahrang ih dehmi sa siseh, a ei lo pei; a ei asile mithiangfai lo a si ding. Keimah cu BAWIPA ka si.

⁹“Puithiam hmuahhmuah in ka lo pekmi daan hi an thlun pei. Cuti asilo ahcun, daan thianghlim an buar ruangah mimawh an si ding ih an thi ding. Keimah cu BAWIPA ka si ih keimah in ka thianghlimtermi an si.

¹⁰“Zokhal sisehla, puithiam thawn an umtlang khalle, puithiam ih hlawh phalhmi an si khalle, puithiam sungkhat asilo mi hmuahhmuah cun a thianghlimmi thawinak cu an ei lo pei.

¹¹Sikhalsehla amah ih paisa rori ih a leimi sal, asilole a ṭuangsuak sal cun puithiam ih comi rawl cu an ei thei pei.

¹²Puithiam si lomi a pasaltu puithiam ih fanu cun thianghlim thawinak rawl pawl cu a ei lo pei.

¹³Sikhalsehla puithiam fanu, a pasal ih thihsanmi, asilole a pasal ih maakmi, faate nei loih a pa ih innih a ra kirmi cun cawmtu dang a neih lo ruangah a pa puithiam ih covo rawl cu a ei thei ding. Puithiam sungkhat a si mi lawnglawng in thawinak rawl cu an ei thei pei.

¹⁴“Puithiam sungkhat asilomi pakhatkhat in ziang khuaruat cuca loin a thianghlimmi thawinak pakhatkhat a ei pang a si ahcun, puithiam hnenah a eimi man a kuan pei ih cuih tlunah zateek kul a kuan bet pei.

¹⁵A ei thei ding tiah ti lomi eiter tahrat in a thianghlimmi thawinak cu puithiam pawl in an borhhlawhter lo pei;

¹⁶cutiih a ei a si ahcun a mawh a si ruangah cupa cun hremnak a tuar pei. Keimah cu BAWIPA ka si ih thawinak pawl a thianghlimtertu cu keimah ka si,” tiah a ti.

¹⁷BAWIPA in Moses hnenah,

¹⁸Aaron le a fapa pawl le Israel mi pawl hnenah a hnuailam daan pawl sim dingah hiti in thu a pek. Israel mi pakhatkhat in, a si lole Israel mi lakih a um ramdangmi pakhatkhat in mei-ur thawinak a pek tikah thu a kam-awkmi a kimternakah siseh, lungtho teih a pekmi thawinakah siseh, a pekmi ṭilva cu raitluan a si pei.

¹⁹Cotlakmi thawinak si dingah raitluanmi caw, a si lole tuu, a si lole me a pacang a si pei.

²⁰Raitluan lo ṭilva nan pek ahcun BAWIPA in a saang lo ding.

²¹Mi pakhatkhat in BAWIPA hnenah remnak thawinak a pek tikah thu a kam-awhnak a kimternakah siseh, lungtho teih a pekmi thawinak ah siseh, a ṭilva cu raitluanmi a si tengteng pei.

²²A mit a cawmi, a zengmi, hriamhma a neimi, hma a nei ih a hnai a dok thluahthlomi, a vun a pharmi, a si lole thakpherh a neimi ṭilva pawl cu BAWIPA hnenah pe hlah uh.

²³Lungtho teih pekmi thawinak ahcun ṭilva taksa him lomi, a si lole taksa kim deuh lomi ṭilva khal cu nan pe thei; asinain thukam-awhnak kimter dingah cun cubangtuk cu co tlak a si lo.

²⁴Ṭilva pakhatkhat a til sutkuai ciami, a til a tlekmi, a til vun a kokmi, a si lole a til a pemmi cu BAWIPA hnenah pe hlah uh. Nan ram sungah hi bangtuk cu nan kham pei.

²⁵Ramdangmi hnen ihsin nan ngahmi ṭilva cu thawinakah hmang hlah uh; cu bangtuk ṭilva pawl cu raitluan lo ah rel an si ih co tlak lo an si.

²⁶Caw siseh, tuu siseh, me siseh, faate a hrin tikah ni sarih sung cu a pi thawn nan ṭhen lo pei. Sikhalsehla ni sarih hnuah cun thawinak hrangah saan tlak a si.

²⁸Ni ni khatah cawpi le a fa, a si lole tuupi le a fa cu thawinakah nan pe lo pei.

²⁹Nan lungawinak cu BAWIPA hnenih thawinak in nan thlenter tikah BAWIPA ih comi nan sinak dingah ka lo pekmi daan pawl nan thlun pei.

³⁰Nan thawi ni ah nan ei pei ih a thaizing tiang nan hlah lo pei.

³¹BAWIPA in, “Ka thu ngai uh; Keimah cu BAWIPA ka si.

³²Ka hmin thianghlim thangsiatnak tuah hlah uh. Israel mi hmuahhmuah in Keimah cu a thianghlim a si tiin thei uh. Keimah cu BAWIPA ka si ih ka thianhlimtermi nan si.

³³Nanmah ih Pathian ka sinak dingah Izipt ram ihsin ka lo suahter hai a si. Keimah cu BAWIPA ka si,” tiah a ti.