Read Falam Chin PUITHIAM HNAṬUANNAK 23 Bible Online

PUITHIAM HNAṬUANNAK 23 - Falam Chin bible

PUITHIAM HNAṬUANNAK 23

¹Israel mi pawl tongkhawm aw in Pathian an biak tlaangnak ding puai pawl hrangah a tanglamih daan pawl cu,

²BAWIPA in Moses hnenah a pe.

³Nanmah ih hna ni ruk sung nan ṭuan pei; asinain a ni sarihnak sabbath ni cu colh ni a si kha ciing ringring uh. Cuih ni-ah cun hna nan ṭuan lo pei; hmun khatah Pathian nan bia tlang sawn pei. Khuitawkih nan um khalle sabbath ni cu BAWIPA ih ta a si.

⁴A hnuailam ih puai pawl cu anmah an tikcu ciarah tuah dingmi an si.

⁵Lantak Puai,[9] BAWIPA cawimawinak ih tuahmi puai cu thla hmaisa bikih[10] ni hleili ni zanlam nitlak ihsin a thok.

⁶Ni hleinga ni in Thilnu tello Sang Puai a thok ih ni sarih sung cu thilnu thawn tuah mi sang nan ei lo pei.

⁷Puai sungih a ni khatnak ah Pathian bia dingah nan tongkhawm-aw pei ih nan hna zianghman nan ṭuan lo pei.

⁸Nan mei-ur thawinak cu BAWIPA hnenah ni sarih sung nan pe pei. A ni sarihnak ah Pathian bia dingah nan tongkhawm-aw lala pei ih nan hnaṭuan zianghman nan ṭuan lo pei.

⁹BAWIPA in Moses hnenah hiti in a sim:

¹⁰BAWIPA in a lo pekmi ram nan thlen ih nan lo rawl nan khawm tikah a hmaisa bik teel khat cu puithiam hnenah nan pe pei.

¹¹BAWIPA ih comi nan sinak dingah puithiam in BAWIPA hnenah a hleice in thawinak a pek pei. Cumi cu puithiam in sabbath ni ih thaizing ah a pek pei.

¹²BAWIPA hnenih thawinak nan pek ni ah kum khat a timi raitluan tuucang pakhat khal mei-ur thawinak ah nan pek pei.

¹³Cumi thawn hmun khatah olif siti thawn rawimi sangphut reel khat cu thlairawl thawinakah nan pek pei. Himi cu BAWIPA hrangah rimthaw a si. Cuih tlunah sabitti khuat hnih khal nan pek cih pei.

¹⁴Thlairawl thawinak Pathian hnenih nan pek hlan ahcun rawl thar nan khawmmi pawl cu a hel in siseh, a kan in siseh, sangah tuah tahratin siseh, nan ei lo pei. Hi daan cu nan tesinfa san tiang a kumkhua in nan thlun ringring pei.

¹⁵BAWIPA hnenih fangteel hmaisabik nan pek ni sabbath ni ih thaisun in zarh sarih kimtein siar uhla,

¹⁶ni sawmnganak ni, a voisarihnak sabbath thaisun ah nan rawl thar pawl cu BAWIPA ih hnenah nan pek pei.

¹⁷Innsang pakhat in sang zawl hnih ciar BAWIPA hnenah nan pek pei. Sang zawl khat cu sangvut reeltan in thilnu thawn nan tuah pei ih thlairawl thawinakah BAWIPA hnenah nan pek pei.

¹⁸Cumi sang thawn kum khat ti raitluan tuucang pasarih, cawcang pakhat le me pahnih cu Israel mi in nan pe pei. Cumi pawl cu thlairawl thawinak le inmi thawinak thawn mei-ur thawinakah BAWIPA hnenah nan pe pei. Cuih thawinak cu BAWIPA hrangah rimthaw a si.

¹⁹Cule sualthlah thawinakah mecang pakhat le remnak thawinakah kum khat ti tuu pahnih nan pe pei.

²⁰Cuih sang thawn tuu pahnih cu puithiam pawl hrangah puithiam in BAWIPA hnenah a pe pei. Hi thawinak pawl cu a thianghlimmi thawinak an si.

²¹Cuih ni ah zohman in hna nan ṭuan lo pei ih Pathian bia ding lawngah nan khawm pei. Khuitawkih an um hmanah nan tesinfa pawl in hi daan cu a kumkhuain an thlun ringring pei.

²²Nan lo rawl nan khawm tikah lorii tiangin nan la lo pei; a leep hawl dingah nan feh sal lo pei. Cupawl cu mifarah le mikhual sukso pawl hrangah nan taan pei. Keimah cu BAWIPA nan Pathian ka si.

²³BAWIPA in Moses hnenah hiti in a sim:

²⁴Thla sarihnak[11] a hmaisa bik ni ah a hleice in colh ni nan ul pei. Tawtawrawt an phawt tikah Pathian bia dingah nan pumkhawm-aw pei.

²⁵Nan hna zianghman nan ṭuan lo pei ih BAWIPAI hnenah thlairawl thawinak nan pek pei.

²⁶BAWIPA in Moses hnenah hiti in a sim:

²⁷Thla sarihnak ni hra ni ah Israel mi pawl ih sualthlahnak ah kum tin tuah ṭheumi thawinak nan tuah pei. Cuih ni ahcun zianghman nan ei lo pei; Pathian biaknak ah nan khawm pei ih BAWIPA ih hnenah mei-ur thawinak nan tuah pei.

²⁸Sualthlahnak hrangih thawinak nan pek ni a si ruangah hna nan ṭuan lo pei.

²⁹Cuih ni ih rawl a eitu cu Pathian ih miphun ah siarcih a si nawn lo pei.

³⁰Cuih ni ih hna a ṭuantu cu BAWIPA Amah rori in a thihter ding.

³¹Khuitawkih an um hmanah hi daan cu nan tesinfa hmuahhmuahih thlun dingmi a si.

³²Cuih thla ni kua ni nitlak ihsin nihra ni nitlak tiang a hleice-ih nan ulhmi ni a si pei ih zianghman nan ei lo pei.

³³BAWIPA in Moses hnenah hiti in a sim:

³⁴Deuthlam Puai cu thla sarih thla ni hleinga ni ihsin a thok ih ni sarih sung peh ding a si.

³⁵Hmaisa bik ni ahcun Pathian bia dingah nan khawm-aw pei ih zianghman hna nan ṭuan lo pei.

³⁶Nitin tein ni sarih sung thawinak nan pek pei. Ni riatnak ni ah Pathian bia dingah nan khawm-aw sal pei ih thawinak nan pek pei. Pathian biak ni a si ih zianghman hna nan ṭuan lo pei.

³⁷Hi puai pawl cu BAWIPA bia dingih khawm-aw in BAWIPA hnenah upatnak nan pek caan a si; cuih tlunah nitinte a ṭulmi thawinak pawl, mei-ur thawinak, thlairawl thawinak, a dang thawinak pawl le inmi thawinak nan tuah caan a si fawn.

³⁸Hi puai pawl cu nan ulh ringring mi sabbath ni tlunah bet hrih mi an si. Hi thawinak pawl khal BAWIPA hnenah nan pek ringring mi pawl le thukam-awhnak kimternak dingih thawinak pawl le lungthote ih nan pekmi thawinak pawl ih tlunah bet hrihmi an si.

³⁹Thla sarihnak ni hleinga ni, nan lo rawl nan lak ṭheh tikah ni sarih sung puai nan tuah pei. Cuih puai ih hmaisa bik ni cu a hleice-ih colh ni ah nan hmang pei.

⁴⁰Cuih ni ahcun nan thingthei rah ṭha bik le ṭhulhfau hnah le hnah bawrmi thing hnge pawl tla lak uhla BAWIPA nan Pathian upatnak puai tuah uh.

⁴¹Ni sarih sung tuah uh. Hi daan cu nan tesinfa pawl in an san sung hmuahhmuah an thlun ringring dingmi a si.

⁴²Israel mi pawl cu BAWIPA in Izipt ram ihsin a hruaisuak tikah deuthlam menmenah an rak um a si, ti kha nan tesinfa pawl ih an theihnak dingah,

⁴³Israel mi hmuahhmuah cu deuthlam sungah ni sarih sung nan um pei. BAWIPA Amah cu nan Pathian a si.

⁴⁴Cubangtuk in BAWIPA an upatnak dingah biaknak puai pawl tuah tikih an thlun dingmi a tlunih daan pawl cu Israel mi pawl hnenah Moses in a pek a si.