Read Falam Chin PUITHIAM HNAṬUANNAK 24 Bible Online

PUITHIAM HNAṬUANNAK 24 - Falam Chin bible

PUITHIAM HNAṬUANNAK 24

¹BAWIPA in Moses hnenah hiti in a ti.

²Israel mi pawl hnenah thu pe awla BAWIPA umnak Puanthlam sungih meisa vanmi pawl cu a tikcu hmanteih nan van theinak dingah olif siti phun ṭha bik pawl rak keng hai seh.

³Hmun Thianghlim Bik sung Thukham Kuang hmaiih a ummi puanzar lengah meisa vanmi pawl cu Aaron in BAWIPA ih mithmuh ah zanlam tinte a vang ding ih zinglam tiang a vangter ding. Hi daan cu kumkhua thlun ding a si.

⁴Sui hlirih tuahmi meivannak fung parih meisa pawl cu Aaron in ṭhatein a zoh ding ih a tikcu hmantein BAWIPA ih mithmuh ah a vang ding.

⁵Sangvut reel nga in lak uhla sang zawl hleihnih ah tuah uh.

⁶BAWIPA ih mithmuh ah sui in khuutmi cabuai parah tlar khatah paruk fingfingin tlar hnih in ret uh.

⁷BAWIPA hnenih rawlhun thawinak sang can-aiah sang tlar hnih parah cun frankincense timi rimhmui ṭha bik ret uh.

⁸Sabbath ni tinin, san khat hnu san khat, cuih sang cu BAWIPA mithmuh ah nan ret pei. Himi cu Israel mi pawl in a kumkhua nan tuah dingmi ṭuanvo a si.

⁹Hi sang pawl cu Aaron le a tesinfa pawl ih ta a si ih hmun thianghlim ah an ei pei; ziangahtile puithiam pawl hrangah BAWIPA hnenih pekmi thawinak rawl lakah a thianghlim zetmi an si.

¹⁰A nu Israel miphun, a pa Izipt miphun a si mi mipa pakhat cu Israel mi pawl riahnak sungah a feh ih Israel mi pakhat thawn an to aw.

¹¹A nuih hmin cu Shelomith a si ih Dan phun sungih Dibri-ih fanu a si. Cutiih an tawh-awk laiah cupa cun Pathian hmin a camsiat; cu ruangah Moses hnenah an fehpi.

¹²Moses cun amah cu a kilter hai ih ziangtin tuah ding ti kha BAWIPA ih hnen ihsin thupekmi a hngak.

¹³Cutikah BAWIPA in Moses hnenah,

¹⁴“Hi pa hi nan riahnak ihsin khawleng ah suahpi uh. Pathian a camsiat lai a theitu hmuahhmuah in a mawh hrimhrim a si ti langternak ah hi pa ih lu parah an kut an suang ciar pei; cule Israel mi zatein lungto in an deng that pei.

¹⁵Cun Pathian a thangsiattu cu hi pa bangtuk in hremnak nan tong ding ih,

¹⁶thah nan si ding, tiah Israel mi pawl cu sim hai aw. Israel mi siseh, Israel mi lakih a um ramdangmi siseh, Pathian a camsiattu cu Israel misenpi in lungto in denthat a si pei.

¹⁷“Mi a thattu cu thah a si ve ding.

¹⁸Midang ih ṭilva a thattu cun ṭilva in a kuan pei. Nunnak cu nunnak in kuan a si pei.

¹⁹“Mi pakhat in midang a tuahmawh a si ahcun amah cu tuahmawh a si ve ding.

²⁰Mi ih ruh pakhat a kiakter a si ahcun amah ih ruh pakhat khiak a si ve ding a si; mi ih mit pakhat a phorhsuak a si ahcun amah ih mit pakhat phorhsuak a si ve ding; mi ih ha pakhat a kiakter a si ahcun amah ih ha pakhat khiak a si ve ding. Midang a tuahmawhtu cu tuahmawh a si ve ding.

²¹Ṭilva a thattu cun ṭilva in a kuan pei; sikhalsehla milai a thattu cu amah thah ve ding a si.

²²Hi daan cu Israel mi siseh, nanmah lakih a um phundangmi siseh, nan zate ih thlun dingmi a si; ziangahtile keimah cu BAWIPA nan Pathian ka si,” tiah a ti.

²³Cuticun Moses in Israel mi pawl cu thu a sim ih Pathian a camsiattu pa cu khawlengah an suah ih lungto in an den that. Cuticun BAWIPA in Moses hnenih thu a pek bangtuk in Israel mi pawl cun an tuah.