Read Falam Chin PUITHIAM HNAṬUANNAK 25 Bible Online

PUITHIAM HNAṬUANNAK 25 - Falam Chin bible

PUITHIAM HNAṬUANNAK 25

¹A hnuailam ih daan pawl cu Israel mi hnenih pek dingah,

²BAWIPA in Moses hnenah Sinai Tlang parah a sim. BAWIPA ih a lo pek dingmi ram nan thlen tikah kum sarihnak kum cu nan thlo lo pei; cuticun BAWIPA nan upatnak nan langter ding.

³Kum ruk sung nan lo ah thlaici nan tuh pei, nan sabit hmuan simsial in a hnge pawl tla nan tan pei ih lorawl pawl nan khawm pei.

⁴Sikhalsehla a kum sarihnak cu nan leiram a colh kum, sabbath kum, BAWIPA hnenih nan pek kum a si pei. Nan lo ah thlaici nan tuh lo pei. Nan sabit hmuan khal nan simsial lo pei.

⁵Nan tuh lo naón nan loih a kho thothomi rawl hman kha nan la lo pei; nan simsial lomi nan sabit hnge pawl ih sabit rah khal nan lo lo pei; nan leiram a colh kum a si pei ih a dai in nan dai lo pei.

⁶Cuih kum ahcun nan lo nan thlo lo ding; asinain nanmah le nan sal pawl, hnaṭuan nan fialmi pawl le nanmah lakih a um ramdangmi pawl cu nan lo in a lo cawm hai ding.

⁷Innzuat ṭilva le hramlakih ramsa pawl khal a cawm ding. Thlawh lomi ramih a suakmi hmuahhmuah cu ei a si pei.

⁸Kum sarih kum sarih in voisarih, a zatein sawmli le kum kua a kim tiang siar uh.

⁹Cuih hnu thla sarih thla ni hra ni, sualthlah thawinak ni ah mi pakhat nan ram pumpi sungah tawtawrawt nan phawtter pei.

¹⁰Cuticun kum sawmnga kum cu Jubilee[12] kum Pathian sunloih an pek kum a si pei ih ram sungih a ummi minung hmuahhmuah hnenih zalennak nan than kum a si pei. Hi kumah an neihmi leiram le innlo an rak leimi hmuahhmuah cu a hmaisaih a rak neitu hnenah, a si lole a rocotu a tesinfa hnenah, khirh thluh a si pei. Sal ih an zuar zomi pawl khal a leitu in an sungkhat hnenah an kir thluh pei.

¹¹Nan lo ah thlaici nan tuh lo pei; amah teih a khomi rawl khal nan lak lo pei; nan simsial lomi nan sabit hmuanih sabit rah khal nan lo lo pei.

¹²Cuih kum cu Jubilee kum a si ih nan hrangah kum thianghlim a si. Nan thlawh lomi ramih a suahmi rawl lawnglawng nan ei pei.

¹³Hi kum ahcun zuar ciami leiram hmuahhmuah a hlanih a rak neitu hnenah khirh thluh an si pei.

¹⁴Curuangah na mi phunpi Israel mi pakhatkhat hnenah leiram na zuar, a si lole a hnen ihsin na lei tikah a dik loin zuar ding le lei ding a si lo.

¹⁵A man cu hmai Jubilee kum a kim sal hlanah hi leiram in kum ziangzat sungah rawl ziangzat a suak pei ti zoh in khiah ding a si.

¹⁶Kum tampi a duh hrih a si ahcun a man cu a tam dingih kum malte lawnglawng a taang a si ahcun a man a niam thung ve ding; ziangahtile an zuarmi ngaingai cu leiramih a suahmi rawl kha a si sawn.

¹⁷Israel mi na laicinpi va bum hlah; na Pathian ṭihzah aw. Keimah hi BAWIPA nan Pathian cu ka si.

¹⁸Hi ram sungah hnangamzet ih nan umnak dingah BAWIPA ih daan le thupekmi pawl cu thlun uh.

¹⁹Leiram in rawl a suah pei ih, ei nan duhmi nan ngah thluh ding; cule hnangamzet in nan um ding.

²⁰Sikhalsehla mi pakhatkhat in hi kum sarih kum, lo thlawh lo kum le rawl lak lo kum ah hin ei dingah ziangso a um ding, tiah a sut ding.

²¹BAWIPA in kum ruknak kumah leiram cu a thluasuah ding ih curuangah kum thum hrang daih in rawl a suah ding a si.

²²Kum riatnak kumih rawlci nan tuh tikah kum ruknak kum ih nan lakmi rawl kha nan ei thotho hrih ding ih cuih kum riatnak kumih nan tuhmi rawl nan lak hlan sung hmuahhmuah cu rawl ei ding cat loin nan nei ko ding.

²³Nan leiram le innlo cu kumkhua hrangin nan zuar lo pei; ziangahtile nan ta a si lo; Pathian ta a si ih nannih cu mikhual a laangte ih hmanter sungmi lawng nan si.

²⁴Leiram le innlo nan zuar tikah a zuartu pa in leikir sal theinak a nei pei.

²⁵Israel mi pakhatkhat a farah ruangah a leiram a zuar a si ahcun a nai bik a sungkhat in a leikir sal thei ding.

²⁶Leikir sal saktu sungkhat a nei lotu cu nehhnu-ah leikir salnak sumsaw a neih sal ahcun,

²⁷a leikir sal thei ni in Jubilee kum tiang hrang ṭuat in a zorh mi pa hnenah a man a pek pei ih cuticun a leiram cu a lak sal pei.

²⁸Sikhalsehla leikir salnak sumsaw nei lo ringring a si ahcun Jubilee kum a kim hlan sung cu a leitu pa in a nei hrih pei. Cule Jubilee kumah a hnenah khirh sal a si pei.

²⁹Tlakrawh phardawl ih kulhmi khawpi sung inn cu a neitupa in a zuar tikah kum khat sungah tlen sal theinak a nei pei.

³⁰Sikhalsehla kum khat sungih a tlen sal thei lo a si ahcun, leikir sal theinak a nei lo pei ih cuih inn cu kumkhua-in a leitu le a tesinfa pawl ih ta a si pei; Jubilee kum khalah khirhsal a si nawn lo pei.

³¹Cun kulh lomi khawsung inn pawl cu khawleng inn vekah ruah an si pei ih a rak nei hmaisatu in a tlen thei pei; Jubilee kum ahcun khirhsal thluh an si pei.

³²Asinain Levi hrin pawl cun Levi khawpiih inn pawl cu an duh tiktikah an tlensal thei ding.

³³Kulhmi khawpiih inn cu Levi mi in a zuar ih a tlensal lo a si ahcun Jubilee kumah khirh a si pei; ziangahtile khawpi sungih Levi hrin pawl ih inn cu a kumkhua in anmah ih ta a si.

³⁴Cuih tlunah Levi miphun pawl ih khawpi kiangkapih ram pawl cu ziangtik hmanah zuar ding an si lo; a kumkhua-in an ta a si.

³⁵Nan kiangkapih um nan phunpi Israel mi a farah ih a nun a har a si ahcun, nan kiangih a um thei ringringnak dingah nan hnen-um a si lole mikhual nan cawm vekin cawm ve uh.

³⁶Tangka nan coih asile a ṭhang lak hlah uh; Pathian ṭihzah uhla mifarah pa cu nan kiangah um veseh.

³⁷A ṭhang thawn tangka coih hlah uh; a miat in rawl khal zorh hlah uh.

³⁸Himi cu BAWIPA nan Pathian ih thupek mi a si. Amah cu nan Pathian a sinak dingah le Kanaan ram nan conak dingah Izipt ram ihsin a lo suahtu a si.

³⁹Nan kiangkapih a ummi nan phunpi Israel mi pakhat a farah ih a nun thei lo ruangah salah a zuar-aw a si ahcun sal hnaṭuan nan ṭuanter lo pei.

⁴⁰Hlawhphalhmi hnen-um vekin nan hnenah a um pei ih hmai Jubilee kum tiang nan hna a ṭuan pei.

⁴¹Jubilee kum a thlen tikah amah le a faate pawl cun an lo taan pei ih an sungkhat le an pupa ih leiram ah an kir pei.

⁴²Israel mi pawl cu BAWIPA ih sal nan si ih amah in Izipt ram ihsin a lo suah zo a si ruangah salih zuarmi nan si nawn lo pei.

⁴³Nan Pathian ṭihzah uhla cubangtuk farah pawl cu tisia hlah uh.

⁴⁴Sal neih nan duh a si ahcun nan kiangkapih a ummi ramdangmi pawl sung ihsin nan lei thei.

⁴⁵Nanmah ih lakih a um ramdangmi sung ihsin an faate pawl tla nan lei thei. Nan ram sungih a suakmi an faate pawl cu nan thilri-ah an cang thei.

⁴⁶Nan fapa pawl hrangah ro-ah nan roh thei ih nan fapa pawl an nun sung cu an hna an ṭuan ding. Sikhalsehla nan unau Israel mi cu nan tisia lo pei.

⁴⁷Nan lakih a um ramdangmi, a si lole nan hnaṭuantu pakhatkhat a lian ih nan unau Israel mi pakhat a farah tuk ruangah acuih milianpa hnenah salih a zuar-awk a si ahcun,

⁴⁸a lei hnu khalah tlensal theinak a um ding. Amah ih unau pakhatkhat,

⁴⁹a si lole a paseu maw, a unauseu maw, a si lole a sungkhat pakhatkhat in maw an tlen thei ding. Culole amah in paisa a neih thei a si ahcun amah le amah a tlen-aw thei pei.

⁵⁰Amah a rak leitupa ramdangmi-ih lungkimnak in, amah a zuar awknak ihsin hmai Jubilee kum tiang a kum an siar pei ih hnaṭuan fial mi pa ih nihlawh man ṭuat in a luatnak man cu an khiak ding.

⁵¹A luatnak dingah kum reipi a taan hrih a si ahcun a leinak man tuat in a luatnak man cu an khiak ding.

⁵²Jubilee kum tiang kum malte lawng a taang a si khalle a kum tuat in a luatnak man cu an khiak ding.

⁵³Kum khat hnu kum khat hnaṭuan fialmi minung bangtuk ih ruat in ramdangmi-ih kut thuaiah a um ding; sikhalsehla a leitupa cun a tisiat hrimhrim lo pei.

⁵⁴A tlunih luat theinak lamzin pawl in a luat thei cuang lo a si ahcun hmai Jubilee kumah amah le a faate pawl cu luatter an si pei.

⁵⁵Israel mi pawl cu BAWIPA ih sal nan si ruangah midang salah a kumkhua cun nan si thei lo pei. Izipt ram in a suahmi nan si. Amah cu BAWIPA nan Pathian a si.