Read Falam Chin PUITHIAM HNAṬUANNAK 27 Bible Online

PUITHIAM HNAṬUANNAK 27 - Falam Chin bible

PUITHIAM HNAṬUANNAK 27

¹A hnuailam ih daan pawl cu,

²BAWIPA in Israel mi hrangah Moses hnenih a pekmi an si. Thukam awh-nak kimternakah mi pakhat cu BAWIPA hnenih pek ciami a si hnuah luat sal a duh a si ahcun a tanglam sumsaw pawl hi a pek pei.

³Mipa upa, kum kul le kum sawmruk karlak cu ngun tangka sawmnga a pek pei.

⁴Nunau cu ngun tangka sawmthum a pek pei.

⁵Mino mipa, kum nga le kum kul karlak cu ngun tangka kul a pek pei; nunau cu fanghra a pek pei.

⁶Kum nga tang mipa nauhak cu ngun tangka fangnga a pek pei. Nunau cu fangthum a pek pei.

⁷Mipa kum sawmruk tlun cu ngun tangka hleinga a pek pei. Nunau cu ngun tangka fanghra a pek pei.

⁸Siatcam in thukamnak a tuah naón a farah ih tangka pek ding a nei lo a si ahcun amah cu puithiam hnenah an fehpi pei ih a pek thei ding zat tiang puithiam in a ṭhum sak pei.

⁹Thukamnak a tuahmi cu BAWIPA ih cotlak ding ṭilva pek ding a si ahcun acuih ṭilva cu a thianghlimmi a si ih,

¹⁰thukamnak a tuahtu in ṭilva dang in a thleng lo pei. A thleng a si ahcun ṭilva an pahnih in BAWIPA ih ta an si pei.

¹¹Sikhalsehla BAWIPA hnenih kammi ṭilva cu raitluan lo a thiang lomi ṭilva a si ahcun a neitu in cuih ṭilva cu puithiam hnenah a fehpi pei.

¹²Cuih ṭilva cu phun ṭha le phun ṭha lo ti zoh in puithiam in a man a khiah pei ih a khiahmi a man cu zohman in an thleng thei nawn lo pei.

¹³A petu in a tlensal duh a si ahcun a man zat ih hlei ah zateek kul a pek pei.

¹⁴Mi pakhat in BAWIPA ih hnenah a inn a pek a si ahcun inn ṭha a si le si lo zoh in puithiam in a man a khiah pei ih cuih a khiahmi cu zohman in an thleng thei nawn lo pei.

¹⁵Inn a petu in tlensal a duh a si ahcun a man zat ih hlei ah zateek kul a pek pei.

¹⁶Mi pakhat in BAWIPA ih hnenah a leiram hrekkhat a pek ahcun thlaici ziangzat tuhnak hmun a si ti zoh in a man cu khiah a si pei ih barli sangvut han khatah ngun tangka fanghra ton in ṭuat a si pei.

¹⁷A leiram cu Jubilee kum cem vete ih a pek a si ahcun a man cu an khiah zat in a si ding.

¹⁸Asinain Jubilee kum cem hnupi ih pekmi a si ahcun hmai Jubilee kum a kim hlanih kum zat kha siar in puithiam in a man kha a ṭuat pei ih a man a ṭhum pei.

¹⁹Leiram a petu pa in a tlensal duh a si ahcun a man zat ih hlei ah zateek kul a pek pei.

²⁰Cun BAWIPA hnenah a hlan zomi kha tlen hmaisa loin midang hnenih a zuar a si ahcun tlensal theinak a neihmi kha a sung pei.

²¹Hmai Jubilee kum a kim tikah cuih leiram cu a kumkhua in BAWIPA ih leiramah a cang pei ih puithiam pawl ih ta a si pei.

²²Mi pakhat in a lei copmi leiram BAWIPA hnenih a pek a si ahcun,

²³hmai Jubilee kum tiang a kum ṭuat in puithiam in a man a khiah pei ih a khiah zat in cupa in cuih ni ah a pek pei; cuih tangka cu BAWIPA ih ta a si.

²⁴Jubilee kum a si tikah cuih leiram cu a tir ih a neitu pa hnenah, a si lole a tesinfa hnenah khirh a si pei.

²⁵Thil man hmuahhmuah cu biaknak lam ih zapi hman ṭheumi zoh in relcatmi vekin an si thluh pei.

²⁶Zohman in ṭilva fatir cu lungtho teih thawinakah BAWIPA ih hnenah an pek lo pei; ziangahtile cuih fatir cu BAWIPA ih ta a si cia zo. Caw fa, tuu fa le me fa cu BAWIPA ih ta an si.

²⁷Asinain a thiangfai lomi ṭilva ih fatir cu an khiah zat a man le zateek kul in an tlensal thei pei. A neitupa in a tlensal lo a si ahcun midang hnenah a man an khiah zat in zuar a si pei.

²⁸BAWIPA ih hnenah pumpek ih hlan ciami cu milai siseh, ṭilva siseh, leiram siseh, zohman in a tlensal, a zuarsal thei nawn lo pei. A kumkhua-in BAWIPA ih ta a si zo.

²⁹Minung hman pumpek ih BAWIPA hnenih hlan ciami cu tlensal ding a si nawn lo; thah ding a si.

³⁰Nan lo ihsin a suakmi rawl le thingrah sungin ṭhen hra ṭhen khat cu BAWIPA ih ta a si. BAWIPA ih hrangah a thianghlimmi a si.

³¹Mi pakhat in cu pawl cu tlen a duh a si ahcun an khiahmi zat a man le zateek kul a pek pei.

³²Ṭilva khal pahra sungah pakhat cu BAWIPA ih ta a si. Ṭilva nan siar tikah a pahratnak cu BAWIPA ih ta a si.

³³Cutiih siar a si tikah a pahratnak cu a ṭawnṭai bik si dingah a neitupa in ngaihtuah hlah seh; hril ciami hrangah ai-awhtu khal a nei thei lo pei. Ṭilva pakhat cu a dangin a airawlter a si ahcun ṭilva an pahnih in BAWIPA ih ta an si pei ih tlensal khal an theih lo ding.

³⁴Hi daan pawl cu Moses hnenah BAWIPA in Israel mi hrangah Sinai Tlang parih a pekmi an si.