Read Falam Chin PUITHIAM HNAṬUANNAK 4 Bible Online

PUITHIAM HNAṬUANNAK 4 - Falam Chin bible

PUITHIAM HNAṬUANNAK 4

¹Mi pakhatkhat a sual ih BAWIPA ih thukham a buar pang a si ahcun, a hnuailam ih daan pawl cu thlun tengteng dingah Israel mi hnenih sim dingah BAWIPA in Moses cu thu a pek.

³Hriakculh Puithiam Sang a sual ih Israel mi hnenih mawhnak a thlenter a si ahcun, a sual thlahnak ah raitluan cawcang a keng pei ih BAWIPA ih hnenah thawinak a tuah pei.

⁴A cawcang cu BAWIPA umnak puanthlam sangka ah a hruai pei, a caw lu parah a kut a suang pei-ih BAWIPA hmaiah cutawk ahcun a that pei.

⁵Cule cuih puithiam cun a caw-ih thisen hrekkhat a lak pei ih Puanthlam sungah cun a fehpi pei.

⁶A cuih thisen sungah a mehtok kutzung a hnim pei ih a thiangmi puanzar ih hmaiah voi sarih tiang thisen cu a theh pei.

⁷Cule Puanthlam sungih rimhmui urnak biakṭheng ki pawl parah acuih thisen hrekkhat cu a hnih pei ih a taang hrihmi thisen cu Puanthlam sung vung lutnakih a ummi mei-ur thawinak hrangih hmanmi biakṭheng hram ah a thlet thluh pei.

⁸Hi caw-ih thau hmuahhmuah, a sungril pawl ih thau le,

⁹a kaileng pawl le a kaileng parih a kopmi thau pawl le a thinhnun parih thau tla a phorh thluh pei.

¹⁰Remnak thawinak hrangih cawcang an thahmi a thau an lak thluh ih an ur vekin puithiam in hi cawcang ih thau cu a lak pei ih mei-ur thawinak biakṭheng parah a ur pei.

¹¹Sikhalsehla a vun, a sa hmuahhmuah, a lu, a ke pawl le a sungril hmuahhmuah a lak pei ih,

¹²an riahnak hmun ihsin hnarpawn vutcam an thletnak hmun thiangfai ih thingpen parah a ur pei.

¹³BAWIPA ih thukham buar pangih BAWIPA hmaiih a sualtu cu Israel mipi an zate an si ahcun,

¹⁴an sualnak cu theih a si vete in an sualthlah thawinak hrangah cawcangte pakhat an keng pei; BAWIPA umnak Puanthlam ah an keng pei ih,

¹⁵Israel mi hotu pawl in a lu parah an kut an suang pei ih cutawkah an that pei.

¹⁶Hriakculh Puithiam in caw thisen hrekkhat cu Puanthlam sungah a keng pei ih,

¹⁷thisen sungah a mehtok zung a hnim hnuah puanzar ih hmaiah voi sarih tiang a theh pei.

¹⁸A thisen hrekkhat cu Puanthlam sungih ummi rimhmui urnak biakṭheng ih ki pawl parah a hnih pei ih, a taangmi thisen cu Puanthlam sung luhnak ih a ummi mei-ur thawinak biakṭheng hramah a thle thluh pei.

¹⁹Cule a thau hmuahhmuah a lak pei ih biakṭheng parah a ur pei.

²⁰Sualthlah thawinak cawcang a tuah vekin hi cawcang khal cu Israel mi sualnak ruangah puithiam in thawinak a tuah pei ih ngaithiam an si ding.

²¹Amah puithiam sualthlahnak cawcang a tuah vek thotho in hi cawcang khal cu a lak pei ih an riahnak ihsin hnarpawn ah a fehpi pei ih a ur pei. Himi hi misenpi sualthlahnak hrangih thawinak a si.

²²BAWIPA ih thukham cu ram uktu in a buar ih a sual pang a si ahcun,

²³a sualnak a theih awk vete in raitluan mecang pakhat thawinak hrangah a keng pei.

²⁴Mecang ih lu parah a kut a suang pei ih mei-ur thawinak sa an thahnak, biakṭheng ih saklam kapah a that pei. Himi cu sualthlahnak hrangih thawinak a si.

²⁵Mecang ih thisen cu puithiam in a mehtok zungin a vun tok pei ih biakṭheng ih ki pawl parah a hnih pei. A taangmi thisen cu biakṭheng hramah a thlet thluh pei.

²⁶Cun remnak thawinakih an thahmi ṭilva-ih thau pawl a ur vekin mecangih thau hmuahhmuah cu biakṭheng parah a ur pei. Cubangtuk in hotu ih sualnak ruangah puithiam in thawinak a pek pei ih hotu cu ngaithiam a si ding.

²⁷Israel mi lakah mi pakhatkhat tumtahnak zianghman nei loin a sual pang ih BAWIPA ih thukham a buar pang a si ahcun,

²⁸a sual a theih awk vete in raitluan mi menu a rak keng pei.

²⁹A menu-ih lu parah a kut a suang pei ih mei-ur thawinak sa an thahnak, biakṭheng ihsin saklam kapah a that pei.

³⁰A cuih thisen sungah puithiam in a mehtok zung in a tok pei ih biakṭheng ih ki pawl parah a hnih pei; a taangmi thisen cu biakṭheng hramah a thlet thluh pei.

³¹Cun remnak thawinak sa-ih thau pawl an lak vekin a thau a lak thluh pei ih BAWIPA ih duhmi rimthaw si dingah biakṭheng parah a ur pei. Cubangtuk in a cu pa-ih sual ruangah puithiam in thawinak a pek pei ih cupa cu a sualnak ngaithiam a si ding.

³²Mi pakhat in a sualthlahnak hrangah tuu pakhat a rak keng asile a nu raitluan a si pei.

³³A tuu ih lu parah a kut a suang pei ih mei-ur thawinak sa an thahnak, biakṭheng ihsin saklam kapah a that pei.

³⁴A cuih ṭilva thisen sungah puithiam in a mehtok zung in a tok pei ih biakṭheng ih ki pawl parah a hnih pei; a taangmi thisen cu biakṭheng hramah a thlet thluh pei.

³⁵Remnak thawinak sa a thau an lak bangtuk in puithiam in a thau a lak thluh pei ih mei-ur thawinakih an pekmi rawl thawn BAWIPA a pek pei ih biakṭheng parah a ur pei. Cubangtuk in cupa ih sualthlahnak hrangah puithiam in thawinak a pek pei ih cupa cu ngaithiam a si ding.