Read Falam Chin PUITHIAM HNAṬUANNAK 6 Bible Online

PUITHIAM HNAṬUANNAK 6 - Falam Chin bible

PUITHIAM HNAṬUANNAK 6

¹BAWIPA in a tanglamih daan pawl hi Moses hnenah a pek.

²Mi pakhat hnenah a rualpi in sumsaw a ret ih a kiltu in a pek sal duh nawn lo ah siseh, a rualpi hnen ihsin thil a ruk ah siseh, a innhnen kha a bum ah siseh,

³thil hlomi a sar naón ka sar lo a si tiih a pheh ih siatcamnak a tuah ah siseh, BAWIPA ih hmaiah misual a si ih thawinak a pek a ṭul a si.

⁴Hi bangtuk in a sual asile a dik loih a ngahmi a si hrangah a kuan sal tengteng pei. A mawh a si tiih an theih ni-ah a neitu pa hnenah kimtein a rulh thluh ih tlunah a hlei in zateek kul a bet pei.

⁶A sualthlah thawinak hrangah puithiam hnenah raitluan tuucang asilole mecang a keng pei. A man cu upa pawl ih khiahmi bangtuk in a si pei.

⁷Cupa sual ruangah thawinak cu puithiam in a pek pei ih ngaithiam a si ding.

⁹Aaron le a fapa pawl ih mei-ur thawinak an pek tikah a tanglam daan pawl hi thlun dingah Moses hnenah thu a pek. Mei-ur thawinak cu zanvarte biakṭheng parah taanta ding a si ih meisa khal mit loin alhter ringring ding a si.

¹⁰Cun puithiam in a bawngbi tawite le a kor fualpi a hruk hnuah biakṭheng parih mei-ur thawinak vutcam cu a lak pei ih biakṭheng ih kapah a ret pei.

¹¹Cuih hnuah a hnipuan a thleng pei ih vutcam cu an riahnak leng hmun thiangah a va ret pei.

¹²Biakṭheng parih meisa cu alhter ringring ding a si ih a mit dah hrimhrim lo pei. Zingtin tein puithiam in zanthing a beet pei ih mei-ur thawinak a timtuah hnuah remnak thawinakih sathau cu a ur pei.

¹³Biakṭheng parih meisa cu mit dah hrimhrim loin alhter ringring ding a si.

¹⁴Thlairawl thawinak hrangih daan pawl cu a tanglam bangtuk in a si. Aaron hrin a si mi puithiam in thlairawl thawinak cu BAWIPA hnenah biakṭheng hmaiah a tuah pei.

¹⁵A zatein BAWIPA hnenih pekmi a si, ti langternak ah sangphut zate-khat le siti le rimhmui a zatein a lak pei ih biakṭheng parah a ur pei. Hi thawinak cu BAWIPA hnenah a rim a thawmi thawinak a si.

¹⁶A taangmi hmuahhmuah cu puithiam pawl in an ei pei.

¹⁷Thilnu tel loin an rawh pei. Himi cu mei-ur thawinak sung ihsin puithiam covo si dingah BAWIPA ih pekmi a si. Sualthlah thawinak le mawhnak thawinak bangtuk ih a thiang zetmi a si.

¹⁸San khat hnu san khat Aaron hrin mipa hmuahhmuah in BAWIPA hnenih thawinak pekmi rawl cu kumkhuain an covo a si ruangah an ei thei pei. Mi pakhatkhat, a si lole thil pakhatkhat, in BAWIPA hnenih pekmi rawl cu a dai asile a thianhlimnak in a daitu cu a siatsuah ding a si.

¹⁹BAWIPA in a tanglam daan pawl cu,

²⁰Aaron hrin puithiam pawl hriakculh an ngah tikih thlun dingah Moses hnenih a pekmi an si. Hriakculh an ngah ni-ah BAWIPA hnenah sangphut reel khat an pek pei; nitin thlairawl thawinakih pekmi zat in a si ding; zinglamah a hrek, zanlam ah a hrek an pek pei.

²¹Siti thawn an rawi pei ih uhkang sungah an reu hnuah an deng pei ih thlairawl thawinakih pekmi a si ding. Cumi cu BAWIPA ih hrangah rimthaw a si.

²²San khat hnu san khat, Aaron hrinih Puithiam Sang a ṭuan tinte hi thawinak cu a tuah ringring pei. Cuih thawinak cu cem ko ih urmi BAWIPA hnenih thawinak a si pei.

²³Puithiam ih a pekmi thlairawl thawinak cu malte hman ei loin a zatein ur ṭheh a si pei.

²⁴Aaron le a fapa pawl in,

²⁵a tanglam ih daan pawl cu sualthlah thawinak an pek tikah an thlun dingin BAWIPA in Moses hnenah thu a pek. Sualthlah thawinak hrangih sa an thah tikah mei-ur thawinakih an pekmi sa pawl an thahnak, biakṭheng ihsin saklam kapah an that pei. Hi sualthlah thawinak cu a thiang zetmi a si.

²⁶Hi thawinak a petu puithiam in thawinakih pekmi sa cu, BAWIPA umnak Puanthlam kulhsung, hmun thiang sungah a ei pei.

²⁷Mi pakhatkhat, a si lole thil pakhatkhat in hi thawinak sa cu a dai pang asile sa thianghlim a dai ruangah siatsuahnak a tong ding. Cun hi sathi in hnipuan a hnih pang a si ahcun acuih hnipuan cu hmun thiang sungah sawp ding a si.

²⁸Hi sa suannak ah tlak ih tuahmi beel an hman ahcun acuih beel cu khuai thluh ding a si. Asinain thir beel an hman a si ahcun napi in an rawt pei ih tidai in an tlengfai pei.

²⁹Puithiam ih sungkhat mipa pawl cun hi sa cu an ei thei ve ding. Hi sa cu sa thianghlim a si.

³⁰Sikhalsehla sualthlahnak dingah tiah sathi hrekkhat cu Puanthlam sungih an thlenpi a si ahcun acuih thawinak sa cu ei a si hrimhrim lo pei; meisa in ur ṭheh a si pei.