Read Falam Chin PUITHIAM HNAṬUANNAK 7 Bible Online

PUITHIAM HNAṬUANNAK 7 - Falam Chin bible

PUITHIAM HNAṬUANNAK 7

¹A tanglamih daan pawl cu mawhnak thawinak hrangah a si. Hi thawinak cu a thiang zetmi a si.

²Mei-ur thawinak hrangih sa pawl an thahnak hmun, biakṭheng saklam kapah hi thawinak sa cu an that pei ih a thisen cu biakṭheng ih kap li-ah hnih a si pei.

³A thau hmuahhmuah cu an lak pei ih biakṭheng parah thawinakah pek a si pei: a meifi thau, a sungril parih a kopmi thau pawl,

⁴a kaileng pawl le a kaileng parih a kopmi thau pawl le a thinhnunih thau pawl an si pei.

⁵A thau hmuahhmuah cu BAWIPA hnenih mei-ur thawinak in pekmi a si ruangah puithiam in biakṭheng parah a ur pei. Himi cu mawhnak thawinak a si.

⁶Puithiam hrinih mipa cun an ei thei. Thawinak thiang a si ruangah hmun thiang sung hrimhrim ah an ei pei.

⁷Sualthlah thawinakah siseh, mawhnak thawinakah siseh, bangrep ih hman dingmi daan pakhat cuih thawinakih hmanmi sa pawl cu thawinak a petu puithiam ih ta an si, tihi a si.

⁸Mei-ur thawinakih pekmi sa-ih a vun cu thawinak a petu puithiam ih ta a si.

⁹Sang rawhnak ih rawhmi siseh, uhkang a si lole thirbel ih kan ciami thlairawl thawinak hmuahhmuah cu Pathian hnenih a petu puithiam ih ta a si.

¹⁰Asinain kan lomi le suan lomi thlairawl thawinak hmuahhmuah cu a ro a si khalle siti thawn rawimi a si khalle, Aaron hrin puithiam pawl ih ta a si ih anmah sungah bangrep in an zem aw pei.

¹¹BAWIPA hnenih pekmi remnak thawinak an tuah tikah a tanglam ih daan pawl hi thlun ding a si.

¹²Mi pakhat in a lungawinak Pathian hnenah phuan a duh ih thawinak a pek a si ahcun thawinak ṭilva le thilnu tel lo sang thawn a pek pei. Sang cu sangphut ih tuahmi, olif siti thawn rawi ih a sah zetih tuahmi, asilole olif siti ih hnihmi sang paate, a si lole sangphut ih tuahmi olif siti thawn rawimi a si pei.

¹³Cuih tlunah thilnu thawn rawi ih rawhmi sang pawl tla a pek pei.

¹⁴Sang phun khat ihsin malte ciar a hleice laksawng ah BAWIPA hnenah a pek pei; cumi cu biakṭheng parah sathi a thehtu puithiam ih ta a si pei.

¹⁵An thah sunah sa cu an ei tengteng pei; a thaizing tiang zianghman an taangter lo pei.

¹⁶Mi pakhat in a thukammi kimternakah remnak thawinak a pek, asilole amah ih lungtho in a pekmi thawinak a rak ken a si ahcun an thah sunah a sa cu an ei pei; an hlahmi a um asile a thaisun ah an ei thluh pei.

¹⁷A ni thumnak tiang a taangmi sa cu an ur thluh pei.

¹⁸A ni thumnak tiang a taangmi sa an ei a si ahcun cupa ih thawinak cu Pathian in a saang lo ding. A peknak cu thawinak ah siar a si lo pei ih thil borhhlawh sawnah ruat a si pei ih, a eitu in a raibuar man cu a tuar ding a si.

¹⁹A cuih thawinak sa cu thil thiang lo thawn an dai aw a si ahcun ei a si lo pei; a zatein ur ṭheh ding a si. Cuih sa cu mithiang pawl in an ei thei pei;

²⁰thian lonak a neitu pawl in an ei asile a eitu cu Pathian ih miphun sungah siarcih a si nawn lo pei.

²¹Cuih tlunah milai siseh, ṭilva siseh, a thiang lomi thil pakhatkhat a dai hnuah hi thawinak sa a ei asile amah cu Pathian ih miphun sungah siarcih a si nawn lo pei.

²²BAWIPA in Israel mi pawl hrangah,

²³a tanglam ih daan pawl hi Moses hnenah a pek. Caw thau siseh, tuu thau siseh, asilole me thau khal siseh, an ei lo pei.

²⁴Amahte a thimi, asilole sahrang ih dehmi ṭilva ih thau khal an ei hrimhrim lo pei. Asinain poihai dang an ṭulnak ahcun an hmang thei pei.

²⁵BAWIPA hnenih pekmi thawinak sathau a eitu cu Pathian ih miphun lakah siarcih a si nawn lo pei.

²⁶Khuitawk hmunih an um a si khalle Israel mi cun vate thisen siseh ṭilva thisen siseh an ei lo pei.

²⁷Hi daan a buartu cu Pathian ih miphun sungah siarcih a si nawn lo pei.

²⁸Israel mi hrangah a tanglam ih daan pawl cu,

²⁹BAWIPA in Moses hnenah a pek. Remnak thawinak a petu in a pekmi hrekkhat cu a hleice in BAWIPA hnenah laksawngah a pek pei.

³⁰A pek tikah amah ih kut rori in a keng pei. Ṭilva ih thau cu a ir thawn a keng pei ih laksawng hleice ah BAWIPA hnenah a pek pei.

³¹A thau cu puithiam in biakṭheng parah a ur pei. Asinain a ir cu puithiam pawl ih ta a si.

³²A vorhlam kawng cu remnak thawinak thau le thisen BAWIPA hnenih a petu puithiam hnenah,

³³a hleice ih laksawngah pek a si pei.

³⁴A ir sa cu laksawng hleice a si; a vorhlam kawng cu BAWIPA in Israel mi hnen ihsin a lak ih puithiam pawl hnenah a pek a si, ti langternak ih pekmi a si. Himi cu a kumkhua in Israel mi pawl in an pek ringring dingmi a si.

³⁵Himi cu Aaron le a fapa pawl hriakculhnak an ngah ih puithiam an can ni ah BAWIPA hnenih an pekmi rawl sung ihsin Aaron le a fapa pawl ih covo an si.

³⁶Cuih ni ah hi thawinak sung ihsin puithiam pawl pek dingah BAWIPA in Israel mi hnenah thu a pekmi a si. Himi cu sankhat hnu sankhat Israel mi in an thlun dingmi daan a si.

³⁷A tlunlam ih daan cu mei-ur thawinak, thlairawl thawinak, sualthlah thawinak, mawhnak thawinak, hriakculh thawinak, le remnak thawinak pawl hrangih daan an si.

³⁸Hi daan pawl cu nelrawn hramlak Sinai Tlang parah Pathian in Moses hnenah Israel mi pawl ih tuah ding thawinak thu pawl a sim ni ah a pekmi an si.