Read Falam Chin PUITHIAM HNAṬUANNAK 9 Bible Online

PUITHIAM HNAṬUANNAK 9 - Falam Chin bible

PUITHIAM HNAṬUANNAK 9

¹A ni riat ni ah Moses in Aaron le a fapa pawl le Israel hotu pawl a ko khawm.

²Aaron hnenah, “Cawcangte pakhat le tuucang pakhat, raitluan veve la awla BAWIPA hnenah pe aw; cawcang cu sualthlah thawinakah a si pei ih tuucang cu mei-ur thawinakah a si pei.

³Cule Israel mi pawl sim awla sualthlah thawinak hrangah mecang pakhat, mei-ur thawinak hrangah raitluanmi caw note le tuu note kum khat ti veve, rak keng hai seh;

⁴remnak thawinak hrangah cawcang pakhat le tuucang pakhat khal rak keng hai seh. Siti rawimi thlairawl thawinak thawn BAWIPA hnenah an pek pei. Ziangahtile tuihsun ah BAWIPA cu an hnenah a lang ding a si,” tiah Moses in a ti.

⁵Moses ih thupekmi bangtuk in a zatein Puanthlam hmaiah cun an rak keng thluh ih Israel mi an zatein cutawkah BAWIPA biak dingah an ding.

⁶Cutikah Moses in, “BAWIPA ih sunlawinak tleu cu nan hnenih a langnak dingah hi hmuahhmuah hi tuah dingah BAWIPA in thu a lo pek zo a si,” a ti.

⁷Cule Aaron hnenah, “Biakṭheng ah feh awla na sualnak le mi zapi ih sualnak cu thlahsak an sinak dingah hi sualthlah thawinak le mei-ur thawinak cu tuah aw. Hi thawinak cu mipi sual thlahnak dingah BAWIPA ih thupeknak bangin tuah aw,” tiah a ti.

⁸Curuangah Aaron cu biakṭheng ah a feh ih amah ih sualthlahnak hrangih cawcangte cu a that.

⁹A fapa pawl in cawcang thisen cu a hnenah an pek ih acuih thisen sungah a kutzung a hnim hnuah thisen cu biakṭheng ih kil li ki pawl ah a hnih; a taangmi thisen cu biakṭheng hramah a thlet.

¹⁰Cun biakṭheng parah a thau, a kaileng pawl le a thinhnun thau pawl cu Moses hnenih BAWIPA ih thupekmi bangtuk in a ur.

¹¹Asinain a sa le a vun cu an riahnak lengah a ur.

¹²Amah hrangih mei-ur thawinak ṭilva cu a that. A fapa pawl in sathi cu an dong ih amah an pek ih biakṭheng ih kap li ah Aaron cun a theh.

¹³A lu le a sa dang pawl an pek ih anih in biakṭheng parah a ur.

¹⁴A sungril le a dunglam ke pawl a kholhfai hnuah mei-ur thawinak tlunih biakṭheng parah a ur.

¹⁵Cuih hnuah mipi hrangah thawinak a pek. Misenpi sualthlahnak hrangih pek dingmi mecang cu a lak ih amah ih sualthlahnak hrangih a tuah vekin a that ih a pek.

¹⁶Mei-ur thawinak hrangih ṭilva khal a lak ih a daan bangtuk in thawinak a pek.

¹⁷Thlairawl thawinak khal a pek ih sangphut zate-khat a lak ih biakṭheng parah a ur. Himi cu zingtin tuahmi mei-ur thawinakih hlei ah a si.

¹⁸Misenpi hrang remnak thawinak cawcang le tuucang khal a that. Cuih thisen cu a fapa pawl in an rak dong ih amah an pek ih anih in biakṭheng ih kap li ah a theh.

¹⁹Aaron in a thau - a meifi thau, a sungril thau, a kaileng le a kaileng tuamtu thau, a thinhnun thau pawl tla a lak ih,

²⁰a ir sa parih a ret hnuah biakṭheng parah a ur.

²¹Cule Moses ih fial bangtuk in a ir le a vorhlam kawng pawl cu a hleice pekmi-ah Aaron in puithiam pawl hrangah BAWIPA hnenah a pek.

²²Aaron in thawinak hmuahhmuah a ṭheh tikah misenpi tlunah a baan pahnih in a phar ih thluasuah a pek. A pek ṭheh in a ṭum.

²³Cule Moses le Aaron cu BAWIPA ih umnak Puanthlam sungah an lut ih an ra suah tikah misenpi pawl cu thluasuah an pek ih an zate tlunah a tleumi BAWIPA ih sunlawinak cu a lang.

²⁴Hmakhatte-ah BAWIPA in meisa a run thlak ih biakṭheng parih thawinak sa hmuahhmuah le a thau pawl tla cu a kaang ṭheh. Cumi cu misenpi in an hmuh tikah an au hluarhlo ih an hmai leilung dai in an bok.