Read Falam Chin JEREMIAH 13 Bible Online

JEREMIAH 13 - Falam Chin bible

JEREMIAH 13

¹BAWIPA in, “Feh awla pat in tahmi bawngbi tawite pawl lei awla hruk aw; asinain tidai na daiter lo pei,” tiah i ti.

²Curuangah bawngbi tawite cu ka lei ih BAWIPA ih fial vek cun ka hruk.

³Cule BAWIPA cu ka hnenah a ṭong sal ih,

⁴“Feh awla Eufrates Tivapi na thlen tikah lungto kua sungah cuih bawngbi cu thup hai aw,” tiah i ti.

⁵I ti vek cun ka feh ih Eufrates Tiva kiangah cun ka va thuh.

⁶Tikcu a rei hnuah BAWIPA in Eufrates Tiva ih feh dingah le bawngbi tawite pawl va la sal dingah i fial.

⁷Ka va feh ih ka thuhnak hmun ka thlen tikah ka vun lai; cule ka hun zoh tikah an rop ṭheh ih hman tlak lo an si kha ka hmu.

⁸Cule BAWIPA ih ṭong cu ka hnenah a ra thleng sal ih,

⁹“Hi bawngbi bangtuk hin Judah ih hngalnak le Jerusalem ih puarthaunak nasazet cu ka siatter ding.

¹⁰Hi mi sualral pawl in ka thu an ngai duh hrimhrim lo. Tuihhlan vek thotho in an thinlung a ruh ih an sualral thotho; khawzing dangdang an rian ih an biak a si. Curuangah hi bawngbi tawite pawl vekin an siat ding ih hman tlak lo ah an cang ding.

¹¹Mi taai ah bawngbi tawite cu hngetzet ih a rek awk vekin Israel mi le Judah mi pawl cu ka hnenah hngetzet ih a ben-awmi si dingah ka duh a si. Cuticun annih cu ka minung an si ding ih ka hmin thannak le sunlawinak a suahtertu an sinak dingah ka duh. Asinain ka thu an thlun duh lo,” tiah a ti.

¹²BAWIPA Pathian in, ka hnenah, “Jeremiah, sabitti beel hmuahhmuah sabitti in khahter thluh dingah Israel mi pawl sim aw. ‘Sabitti beel hmuahhmuah sabitti in khahter thluh ding cu kan thei ṭheh a si,’ tiah an lo let ding.

¹³Cule keimah BAWIPA in hi ram sungih a um hmuahhmuah David tesinfa siangpahrang a cangmi pawl siseh, puithiam le profet pawl siseh, Jerusalem ih a ummi pawl tiangin sabitti in ka khatter ṭheh ding ih sabitti an ri ṭheh ding. Cumi cu sim hai aw.

¹⁴Cule upa nauhak tilo in pakhat le pakhat sabitti beel bangin ka vuakkuai ṭheh hai ding. Zawnruahnak, lainatnak le zaangfah thinpemnak um loin ka that hai ding. Zianghman in i kham thei lo ding,” tiah a ti.

¹⁵Maw Israel mi pawl, BAWIPA in a sim zo; Nan thinlung nemter uhla a thu ngai uh.

¹⁶BAWIPA nan Pathian cu upat uh. Thimnak a thlenter ih, tlangpar ih nan bah nan rilh hlanah le, Nan beisei mi tleunak cu khawthim sahzet ih a canter hlanah hin amah cu ṭihzah uh.

¹⁷Cuih thu nan ngai duh lo ahcun, nan hngalnak ruangah a thupte in ka ṭap ding. Ka ṭap ding ih ka mitthli nasazet in a luang ding; Ziangahtile BAWIPA ih minung pawl cu sal ih kaihmi ah an cang ṭheh zo.

¹⁸BAWIPA in ka hnenah, “Siangpahrang le a nu kha sim aw; siangpahrang tokham ihsin ṭum hai seh, ziangahtile an siangpahrang lukhuh mawizet cu an lu ihsin a tla zo.

¹⁹Judah ram thlanglam ih khawpi pawl cu ral in an kulh ṭheh zo; a kulhpit ṭheh ih pah thei a si nawn lo. Judah mipawl cu saltaannak ah hruai ṭheh an si zo,” a ti.

²⁰Maw Jerusalem, zoh hnik! Na ral pawl saklam ihsin an rung. Nangmah kilkhawi dingih an lo pekmi milai pawl cu khuiah so an si? Na uarzet mi milai pawl cu?

²¹Na rualpi ih na ruah mi pawl in an lo neh ih an lo uk tikah ziangso na ṭong leh ding? Nunau nau nei bangin a na na tuar ding a si.

²²Ziangah so hivek thil hi ka parah a thlen? Ziangah so ka hnipuan in thleksak ṭheh ih in sualpi? na ti asile na sual tuk ruangah a si!

²³Midum phun Ethiopia mi pakhat in a vun dum a thleng thei pei maw? Tlavang in a ṭial a thleng thei pei maw? An thleng thei a si ahcun thil ṭha zianghman tuah loin sualnak lawnglawng a tuahtu nannih khal in thil ṭha tuah nan zir ve thei ding!

²⁴Nelrawn thlipi in fangkuang ro a seemhlo vekin BAWIPA in a lo ṭhekdarh ṭheh ve hai ding.

²⁵Hi vek thil nan tong ding tiah a lo simcia zo. Himi cu khawlairel ciami a si. Ziangahtile amah nan hngilh ih zianghman si lomi khawzing dang nan ring sawn a si.

²⁶BAWIPA amah rori in nan hnipuan a hlit ṭheh ding ih nan lawngfangkheh in ningzakin a lo ret ding.

²⁷A huatmi thil nan tuahmi a hmu zo. Phuul lakah siseh, tlangpar ah siseh, khawzing dang nan hawl; mipa sualral in midang nupi a ngai, a hiar ih rangcang hur in rangpi a thlun vivo vekin khawzing dang nan dawi vivo a hmu zo. Maw Jerusalem mi pawl, nan lamzin a va pit so! Ziangtikah so thianghlim in nan um leh ding?