Read Falam Chin JEREMIAH 14 Bible Online

JEREMIAH 14 - Falam Chin bible

JEREMIAH 14

¹BAWIPA in ruah sur lonak thu-ah hiti in i sim,

²“Judah cu riahsia in a um. A khua pawl an caar cuahco; A minung pawl riahsia in leilung ah an bok, Jerusalem khal bomnak duh ah a au.

³Milian pawl in tidai khai dingah an sal pawl an thlah; Tikhur ah an feh, a sinan tidai a um lo; An tibeel lawngpi thawn an kir sal. Thinnau le mangbang in an hmai an hup.

⁴Ruah a sur lo ih leilung a car ṭheh ruangah lothlo pawl cu an bei a dong. Riahsia in an hmai an khuh aw.

⁵Hramlakah zukneng in a fa note a tlansan, hrampi a um lo ruangah.

⁶Hramlak laak cu tlangzim parah a ding; Cinghnia bangin a thawthawt ding hawl in a hekhek; An mit khua a hmu thei lo, rawl an ngah lo ruangah.

⁷Ka minung pawl ka hnenah an au, ‘Kan sualnak cun in mawhthluk hman sehla, Na thukam bangin, Maw BAWIPA, in bawm hram aw. Na hnen ihsin voi tampi kan tlan zo, na parah kan sual tuk zo.

⁸Nangmah lawng hi Israel ih ruahsannak na si. Nangmah lawng siatralnak ihsin in humtu na si. Ziangah so kan ram sungah hin ramdangmi vekin le, Zankhat lawng a riakmi mikhual vekih na um?

⁹Ziangah so thinphannak a neitu bangtuk na si? Ziangah so zohman a bawm thei lotu ralkap vek na si? Maw BAWIPA, nang cu kan hnenah na um ih, Kannih cu na minung kan si; In tlansan hram hlah aw,’ in ti,” tiah a ti.

¹⁰BAWIPA in hi pawl thu a rel ih, “Hi pawl cu ka hnen ihsin tlan an hiar ngaingai. Anmah le anmah an uk aw thei lo. Curuangah an parah ka lung a awi lo. Thil ṭha lo an tuah mi cu ka ciing ding ih an sualnak ruangah ka hrem hai ding,” a ti.

¹¹BAWIPA in ka hnenah, “Hi minung pawl bawm dingah cun i dil nawn hlah.

¹²Rawl ul tahratin bomnak an dil hmanah ka theihsak hai lo ding. Mei-ur thawinak in pek ih thlairawl thawinak khal in pek hmanah an parah ka lung a awi cuang lo ding. Raldonak, paamnak le natnak in ka siatsuah thotho hai ding,” tiah a ti.

¹³Cutikah kei in, “Maw Cungnungbik BAWIPA, hi ram ah do awknak le paamnak cu a um nawn lo ding, ziangahtile BAWIPA in daihnak lawng a um thlang ding tiah thu in kam zo, tiah profet pawl in misenpi hnenih an ṭongmi na thei ko,” tiah ka ti.

¹⁴Sikhalsehla BAWIPA in, “Profet pawl ka hmin in thuphan an per a si. Ka thlahmi an si lo, thu ka pekmi khal an um lo; an hnenah ṭong kam khat ṭong dingih ka fialmi khal an um lo. An rel celcelmi langnak an hmuhmi pawl cu ka hnen ihsin a rami an si lo; hmailam thu an simcia mipawl cu thulolak, anmah ih thinlung ruahmi men a si.

¹⁵Keimah BAWIPA in cuih ka thlah lomi profet pawl, ka hmin saal tahratin hi ram ah raldonak le paamnak a thleng lo ding a titu pawl parah ziang ka tuah ding ti cu ka lo sim ding: raldonak le paamnak in ka siatsuah ṭheh hai ding.

¹⁶An thu a rak ngaitu pawl khal cuvek thotho in siatsuah an si ding. An ruak cu Jerusalem khawpi lamzin ah hlon an si ding ih zohman in an phum lo ding. Anmah lawng si loin an nupi pawl, an fanu le an fapa pawl khal cuvek thotho in tuah an si ding. An sual man nasa zetin an kuan ding a si,” tiah a ti.

¹⁷BAWIPA in ka riahsiatnak hi misenpi hnenih phuang dingin thu i pek ih hiti in ka sim, “A sun a zan in ka mitthli luang ringring seh, Ka mitthli hul ni um hlah seh; Ziangahtile ka minung nasa zetin, tuahmawhnak an tuar ih, an hma a besia ngaingai.

¹⁸Hramlak ih ka feh tikah, ral ih thah mi ruak ka hmu. Khawpi sungih ka feh tikah, rawl loih a thi mi ka hmu. Profet le puithiam pawl in an hna an ṭuan, Asinain ziang kan tuah ti an thei lo,” a ti.

¹⁹Maw BAWIPA, Judah cu na hnongthla rori maw si? Zion mi pawl na hua ngaingai maw si? Ziangah so hiti lawmmam in in tuahmawh? Kan hma a dam thei nawn lo. Daihnak kan hngak naón ṭhatnak zianghman a ra lo. Damnak kan ruahsan naón ṭihphannak sawn a thleng.

²⁰Maw BAWIPA, na parah kan sual ngaingai zo. Na hmaiah kan sualnak le, kan pupa pawl ih sualnak tla kan phuang a si.

²¹Na hmin ih zaar ah in nautat hram hlah aw; Na sunlawinak tokham Jerusalem parah cun, Mualphonak thlenter hram hlah aw; Kanmah thawn na tuahmi thukamnak cu bal hram hlah aw.

²²Ramdangmi pawl ih tuahmi milem cun ruah a surter thei lo. Van in amahte ruah hmaikhat hman a tlakter thiam lo. Maw BAWIPA kan Pathian, kan ruahsannak cu na hnenah kan ret zo. Hi thil hmuahhmuah a tuahtu cu Nangmah lawng na si.