Read Falam Chin JEREMIAH 15 Bible Online

JEREMIAH 15 - Falam Chin bible

JEREMIAH 15

¹BAWIPA in ka hnenah, “Moses le Samuel hman hitawk ah ding in i dil rero khal hai sehla, hi minung pawl parah cun zaangfahnak ka nei lo ding. Tlan hai seh; ka mithmuh ah um hlah hai seh.

²Khuiah so kan feh ding ti ih an lo sut a si ahcun keimah ih ka ṭongmi vekin sim aw: Mi hrek cu natnak in an thi ding; Cunah feh hai seh. Midang cu raldonak ih thi ding an si; Cunah feh hai seh. Mi hrek cu rawl lo ih thi ding an si; Cunah feh hai seh. Mihrek cu salkaihmi an si ding; Cunah feh hai seh.

³Keimah BAWIPA in an parih a thleng dingmi thil pali ka ruat cat zo. Raldonak ah thah an si ding; an ruak cu uico in an thiar ding; vate in an ei ding ih an hlahmi cu ramsa in an ei ding a si.

⁴Jerusalem ah Hezekiah fapa Manasseh in Judah siangpahrang a ṭuan laiih thilsual a tuahmi ruangah hi bangtuk in ka tuah ding ih cumi cu leilung mi hmuahhmuah in an hmuh tikah ṭihnung le mangbang in an um ding,” a ti.

⁵BAWIPA in, “Maw Jerusalem mi pawl, Zoso a lo zaangfah ding? Zoso a lo riahsiatpi ding? Cawl tahratin ‘Ziangtin nan um?’ a lo titu zotal an um pei maw?

⁶Nannih sawn in in hnong ih in dungtun zo a si. Curuangah ka kut ka hawi ih ka lo tisiat hai a si. Ka thin suup in nanmah dimdoih rero hi ka paih nawn lo.

⁷Ramsung khawkip ah fangkung ro bangin, thli lakah ka lo hlon hai. Ka minung pawl keimah in ka lo siatsuah a si. Nan faate pawl tiangin ka that, thilsual tuah nan baang cuang lo ruangah.

⁸Nan ram sungih nuhmei cu tifinriat kap vunnel hnakin an tam sawn. Nan tlangval pawl an no laiah ka that ih an nule pawl an tuar ngaingai; Rinlopi in donharnak le thinphannak an hnenah ka thlenter.

⁹A fapa pasarih in an thihsan mi nunau cu a lung mit in a ril, a thawthawt ding a hawl. Sun laitakah a hrangah cun khua a thim, Mualpho in a um ih thinnatnak in a khat. A nungsun nannih khal thah dingah, nan ral kut ah ka lo pe hai ding. Keimah BAWIPA in ka sim zo,” tiah a ti.

¹⁰Leilung parah ka nu in i hrin hi mi vanduai ka va si so! Ramsung mi hmuahhmuah in in hua ih in heek. Paisa ka cawih dah lo, midang paisa khal ka cawi dah lo; a sinan zozo khal in in camriam.

¹¹Maw BAWIPA, nangmah ṭhatein ka lo rian lo ih ka ral pawl harsatnak le mangbangnak an ton tikah an hrangah na hnenih ka ngensak lo a si ahcun siat in serhnak hi kim hram seh.

¹²Zokhal in thir an khiak thei lo, saklam ram ihsin a rami thir hrimhrim cu, ziangahtile daar thawn rawimi a si.

¹³BAWIPA in ka hnenah, “Hi ram sungih ka minung pawl sualnak an tuah ruangih cawhkuan peknak ah an thilri le an sumsaw longtu dingah ral ka thlah ding.

¹⁴An thei dah lomi ram, an ral pawl ih ram ah an ral pawl riantu ah ka tuah hai ding. Ka thinhengnak cu meisa vek a si ih kumkhua in a alh ding a si,” a ti.

¹⁵Cutikah kei in, “Maw BAWIPA nang cun i thei. I thei ringring awla, i bawm aw. I hremtu pawl parah phulaknak um hram seh. An parah na thin sau nawn hlah aw, in thatsuak ngaingai pang ding. Nangmah ruangih hmuhsuam ka si hi ciing ringring hram aw.

¹⁶Ka hnenah na ṭong ih na ṭongkam kam khat khal ka thei ṭheh a si. Maw Cungnungbik BAWIPA Pathian, na hmin ih kawhmi ka si; na minung ka si ih na ṭongkam in ka thinlung cu lungawinak le thinnomnak in a khahter.

¹⁷Midang thawn capohnak le hnihsuaksainak ah ka tikcu ka hmang dah lo. Na thupekmi ngai in keimah te in ka um ih thinhengnak in ka khat.

¹⁸Ziangah so ka tuarnak hi a reh dah lo? Ziangah so ka hma hi an dam dah lo? An dam thei nawn lo ding maw si? ṭhal can ih tiva kang bangin ka ruahnak na cemter ding maw si?” tiah ka ti.

¹⁹Cule BAWIPA in, “Na ra kirsal a si ahcun ka lo la sal ding ih i riantu na si sal ding. Thulolak men ṭong loin thungai le thudik na phuang a si ahcun ka profet na si sal ding. Mipi hnenah na feh a ṭul lo ding, anmah sawn na hnenah an ra ding.

²⁰An lo do hmanah an lo neh lo ding. Daar ih tuahmi phar vekah ka lo tuah ding ih an lo ti thei lo ding. Na hnenah ka um ding, ka lo hum ding ih ka lo run ding.

²¹Misual le mi ṭha lo pawl kut sung ihsin ka lo run suak ding. Keimah BAWIPA in ka sim zo a si,” tiah a ti.