Read Falam Chin JEREMIAH 18 Bible Online

JEREMIAH 18 - Falam Chin bible

JEREMIAH 18

¹BAWIPA in Jeremiah hnenah,

²“Beel tuahtu inn ah vung feh awla cunah thu ka lo sim ding,” tiah i ti.

³Curuangah ka vung feh ih beel tuahtu pa cu a beel tuahnak lengkual thawn hna a ṭuan rero lai ka hmu.

⁴Beel a tuah tikah tlak a hlum ih a tuahmi a ṭhat lo ahcun beel dang a duhmi ah a tuah sal.

⁵Cutikah BAWIPA in ka hnenah,

⁶“Beel tuahtu in tlak in a duhduh a tuah vekin Israel mi nan parah tuah theinak ka nei ve lo maw si? Tlak cu beel tuahtu kut sungih a um vekin nannih khal ka kut sungah nan um.

⁷Voikhat khatah miphun pakhat a si lo le uknak pakhat ka phawisuak ding, ka khuai ṭheh ding ih ka siatsuah ding ka ti hnu ah,

⁸cuih miphun cu a thilsual tuahnak ihsin a kirsal a si ahcun ka tuah ding ka timi cu ka tuah suak lo ding.

⁹Sikhalsehla voikhat khatah miphun pakhat a si lo le uknak pakhat ka dinter dingih ka ṭhansoter ding ka ti hnuah,

¹⁰cuih miphun in ka thu a thlun lo ih sualnak a tuah a si ahcun ka tuah ding ka timi cu ka tuah suak lo ding.

¹¹Atu-ah Judah mi le Jerusalem mi pawl kha sim aw: an hrangih a ṭha lomi tuah dingah tumtahnak ka nei ih anmah hrem dingah tim ka tuah rero lai a si. An nunnak sualral hi baang thlang hai seh; an nunzia le an thil tuah mi pawl hi ṭhin hai seh.

¹²Annih cun, ‘Ziangah so kan ṭhin ding? Kan duh vekin mi lungruh le mi ṭha lo kan si ko pei cu,’ an ti ding,” tiah a ti.

¹³BAWIPA in, “Hi bangtuk hi, khui ram talah a cang dah maw? Miphun hmuahhmuah sut hnik uh. Israel mi pawl in thil poimawh an tuah a si.

¹⁴Lebanon ram lungto tlangsaangpipi parah vur tla loin a um dah maw? A daizetmi tlangsaang ihsin tiva luangmi ziangtik talah an kang dah maw?

¹⁵Sikhalsehla ka minung pawl cun in hngilh, Milem hnenah rimhmui an ur a si. An fehnak ding lamzin ah an feh ih an bah, Lamzin hlun an thlun nawn lo; Sial lomi lamzin sawn an zawh.

¹⁶Hi ram cu tuksumza ah an canter, Kumkhua ih hmuhsuam dingah. A kiangih a fehtu le a hmutu pawl, an mang a bang ding. An khawruah har in an lu an thing ding.

¹⁷Ka minung pawl cu an ral hmaiah, ka ṭhekdarh ṭheh ding; Nisuahnak lam thlipi ih vunnel a sem hlo bangin. Ka dung ka tun hai ding; Vansiat malmaknak a thlen tikah ka bawm hai lo ding,” a ti.

¹⁸Cule misenpi pawl in, “Jeremiah hi ziangtital in kan phiar pei. In zirhtu dingah puithiam pawl le thuron dingah mifim pawl le Pathian thu phuangtu dingah profet pawl an um ringring ko ding. Asinain a parah thu kan tuah pei ih a thusimmi kan ngai nawn lo pei,” tiah an ti.

¹⁹Curuangah hiti in thla ka cam, “Maw BAWIPA, ka ṭong mi hi ngai hram awla ka ral pawl ih an simmi hi run thei hram aw.

²⁰Ṭhatnak cu ṭhatlonak ih rulh ding maw a si? Asinain ka tlaknak dingah khur an lai zo. Na hnenah ra in na thinheng ih na tuahsiat hai lonak dingah ka lo dilnak ka ṭong na thei ko.

²¹Asinain maw BAWIPA, an faate pawl cu rawl loin thi hai seh, ral kut in thi ko hai seh. Nunau pawl khal an pasal le an faate pawl in thihsan ṭheh hai seh. An pasal pawl cu nat in thi hai sehla an tlangval pawl tla raldonak ah thi ṭheh hai seh.

²²Rinlopi in an inn ram dingah miburpi thlah awla thinphang in au ciamco hai seh. Keimah tlaknak ah khur an lai ih keimah awk dingah thang an kam zo.

²³Sikhalsehla maw BAWIPA, in phiarnak le thah in tumnak cu na thei ṭheh ko. An ṭhatlonak cu ngaidam hlah aw; an sualnak khal thlahsak hlah aw. Na mithmuh ah sawnter hai awla na thinheng lai ah siatsuah ṭheh hai aw,” ka ti.