Read Falam Chin JEREMIAH 19 Bible Online

JEREMIAH 19 - Falam Chin bible

JEREMIAH 19

¹BAWIPA in tlak beel va lei dingah i fial. Upa hrekkhat pawl le puithiam upa deuh pawlkhat hruai aw i ti.

²Hlamphei Kotka ihsin Hinnom Phairawn ih va feh dingah BAWIPA in i sim. Cutawkah i simmi thu va phuang ding ka si.

³BAWIPA in hiti in sim aw a ti: “Judah siangpahrang pawl le Jerusalem mi pawl, Cungnungbik BAWIPA, Israel ih Pathian Keimah ka sim mi hi ngaihnik uh. Hi hmun ahhin vansiat malmaknak nasa zetin ka thlenter ding ih a theitu hmuahhmuah mangbang in an um ding.

⁴Hi bangtuk thil cu ka thlenter ding, ziangahtile misenpi in in dungtun ih khuavang hnenah thawinak pek tahratin hi ram hi an baalter zo a si. Cuih khuavang pawl cu anmah le an pupa pawl in siseh, Judah siangpahrang in siseh, an theih dah lomi a si. Hi ram cu mawh nei lomi ih thisen in an khahter ih,

⁵an faate pawl cu thawinak meisa ih ur dingah Baal khuavang hrangah biakṭheng an dawl a si. Hi bangtuk tuah dingah thu ka pek dah lo; a ruah hman ka ruat dah lo.

⁶Curuangah tikcu a ra thleng ding ih hi hmun cu Tofeth a si lole Hinnom Phairawn tiah an ti nawn lo ding. Cumi ai ah Mithahnak Phairawn ti a si ding.

⁷Hi hmun ahhin Judah mi le Jerusalem mi pawl ih tumtahnak cu ka phelhsolh ṭheh ding. An ral pawl cu nehtu ka siter ding ih an ral pawl in an that hai ding. An ruak cu vanih vate le leilungih ramsa ei dingah ka pe ding.

⁸Hi khawpi parah a nasa zetmi siatsuahnak ka thlenter ding ih a kiangih a feh suksotu hmuahhmuah an mang a bang ngaingai ding.

⁹Ral pawl in khawpi cu an kulh ding ih minung pawl cu thah an tum ding. Khawpi an kulh cu a nasa tuk ding ih khawsung um mipawl pakhat le pakhat an sa an ei-aw ding ih an fanu le an fapa pawl ih sa tiangin an ei ding a si,” tiah a ti.

¹⁰Cule BAWIPA in keimah thawn a feh tlangtu upa pawl ih mithmuh ah tlak beel cu khuai aw i ti.

¹¹Cun an hnenah Cungnungbik BAWIPA in, “Hi minung pawl le hi khawpi cu kom theih a si nawn lomi hi beel kuai bangtuk in ka khuai ṭheh ding. Mi pawl in an ruak cu Tofeth hmun ah an phum ding. Ziangah tile hmundang khui hmanah anmah phumnak a um lo ding.

¹²Hi khawpi le khawsung mi pawl cu Tofeth vekah ka tuah ding, tiah ka lo tiam cia a si.

¹³Jerusalem inn pawl, Judah siangpahrang ih inn pawl le inn dangdang, a tlunah arsi hnenah rimhmui an urnak le khawzing dang hnenih thawinak sabit an thletnak inn pawl hmuahhmuah cu Tofeth vekin a thiang lomi ah an cang ding,” tiah a ti.

¹⁴BAWIPA in a thusim dingih i thlahnak hmun Tofeth ihsin ka feh sal. Biakinn sungah ka ding ih misenpi hnenah a thu cu ka phuang.

¹⁵Cungnungbik BAWIPA, Israel ih Pathian in an hnenah, “Ka thlenter ding ka timi hremnak hmuahhmuah cu hi khawpi le a kiangkap khawte pawl parah ka thlenter ding; ziangahtile mi lungruh an si ih ka simmi an ngai duh lo a si,” tiah a ti.