Read Falam Chin JEREMIAH 20 Bible Online

JEREMIAH 20 - Falam Chin bible

JEREMIAH 20

¹Cuih thu pawl ka phuanmi cu Biakinn uktu Immer fapa puithiam Pashhur in a theih tikah,

²i vuak ih thir cikcin in i khih hnuah Biakinn sung tlunlam Benjamin Kotka kiangah i ret.

³A thaizing ah ka thir cikcin cu a phawih ih i thlah tikah a hnenah, “BAWIPA in Pashhur tiah hmin a lo sak lo. Hmin a lo pekmi ngaingai cu, ‘Khawzakip ah ṭihphannak,’ a si.

⁴BAWIPA amah rori in ‘Nang cu nangmah le na rualpi hrangah ṭihphannak ah ka lo tuah ding ih an ral pawl in nam thawn na rualpi an thah ṭheh kha na hmu ding. Judah mi hmuahhmuah cu Babilon siangpahrang kut thuaiah ka thlenter ṭheh ding. Anih in a hrekkhat cu a ram ah salah a hruai ding ih a hrekkhat cu a that ding.

⁵Hi khawpi lennak hmuahhmuah, an sumsaw le an hlawnthil pawl, Judah siangpahrang ih thilri le hlawnthil tiangin an ral pawl in an long ding ih Babilon ah an fehpi ṭheh ding.

⁶Cule nang Pashhur, nangmah le na sungkhat pawl tla an lo kai ding ih Babilon ah an lo hruai ding. Cutawkah na thi ding ih voi tampi na bum rero ṭheumi na rualpi pawl thawn an lo phum ding,” tiah a sim.

⁷BAWIPA, nangmah in i bum ih, bummi ka rak si! Nang cu kei hnakin na cak ih i neh a si. Zokhal in hnihsuaksainak ah in hmang ih sun nihlawh in hnihsan a si.

⁸Ka ṭongtinte in au phah in, “Mivuaknak, Siatsuahnak,” tiah napi in ka au. BAWIPA, mi in in sulhseek ih cat loin in nautat, Nangmah ih thu ka phuan ruangah.

⁹Sikhalsehla “BAWIPA cu ka hngilh thlang ding; A hmin in thu ka sim nawn lo ding,” ka ti tikah, Na thu cu meisa bangtuk in ka sungah a alh ciamco; Ka ruh sungah a ceeng a si; Daite ih um ka tum mengmang naón, ka umpi thei hrimhrim lo.

¹⁰Mi hmuahhmuah in a thupte in in rel, “Khawzakip ah ṭihphannak a um; Bawi upa hnenah hi pa ih thu hi ka sim ding,” an ti ka thei. Ka ngam zetmi ka rualpi pawl hman in ka tluk ding cu an hngakhlap a si. “Kan bum thei ko hmang ding, Kan kaih thei ahcun phu kan la ding,” an ti.

¹¹Asinain BAWIPA, nang ka lamah na ṭang, Mi cak le mi maksak na si. Keimah i hremtu pawl cu an sung ding; Kumkhua mualpho in an um ding; Ziangtik hmanah an hlawhtling thei lo ding, An ningzahnak cu hngilh a si nawn lo ding.

¹²Cungnungbik BAWIPA, nang cun diktein mi na hniksak. Mi ruahnak le thinlung sungah, ziang a um ti na thei. Curuangah ka ral pawl parih phu na lak cu i hmuter hram aw. Ziangahtile ka thuhla cu na kut sungah ka lo pek.

¹³BAWIPA hnenah hlasak uh! BAWIPA cu thangṭhat uh! Miṭha lo pawl kut sung ihsin, namnuaimi pawl a runsuak a si.

¹⁴Ka suah ni kha siatserh siseh! Ka nu ih i hrin ni cu hngilh hlo siseh!

¹⁵Ka pa a lungawitertu, Thuthang a rak keng ih, “Mipa a si! Fapa na nei!” a ra titu cu siatcamnak tong seh.

¹⁶BAWIPA in zaangfahnak nei loin, a siatsuahmi khawpi bangtuk siseh! Zinglam ah nat tuar aihramnak a theitu, Sun ah raldonak mumeek aw a theitu siseh!

¹⁷Ka suah thlak hlan ih i rak thah lo ruangah, Ka nu ih pum sung cu ka thlaan a rak si lo a sihi!

¹⁸Ziangah so ka nu ih pum sung ihsin ka rak suah? Harsatnak le riahsiatnak tuar ih, Ningzak in ka nunnak ni liam dingah hin maw?