Read Falam Chin JEREMIAH 21 Bible Online

JEREMIAH 21 - Falam Chin bible

JEREMIAH 21

¹Judah siangpahrang Zedekiah in Malkhiah fapa Pashhur le Maaseiah fapa puithiam Zefaniah cu ka hnenah a rak thlah ih hiti in in dil,

²“Kan ai ah BAWIPA hnenah in ṭongsak aw. Ziangahtile Babilon siangpahrang Nebuchadnezzar in a ralkap pawl thawn kan khawpi an kulh ṭheh a si. BAWIPA in a hlanih a rak tuah ṭheu vekin mangbangza thil pakhatkhat tuah tahratin Nebuchadnezzar cu dungah a kirter tla a si thei men,” tiah a ti.

³Cule BAWIPA ih ṭong cu ka hnenah a thleng ih Zedekiah ih mi a rak thlah mi hnenah cun,

⁴BAWIPA, Israel Pathian ih ṭong cu Zedekiah va sim dingin ka phuan. BAWIPA in, “Zedekiah, Babilon siangpahrang le a ralkap pawl a dotu na ralkap pawl cu keimah in ka do ding ih ka neh ding. Na ralkap ih hriamnam pawl cu khawpi laifang ah ka peng ṭheh ding.

⁵Nangmah cu ka ban thacahnak hmuahhmuah le ka thinhengnak le ka ai-thoknak hmuahhmuah thawn ka lo do ding.

⁶Hi khawpi sungih a ummi hmuahhmuah ka that ṭheh ding. Milai siseh, ramsa siseh, natsia in an thi ding.

⁷Asinain nangmah le na kut thuai bawi pawl cu, raldonak, paamnak le natnak ihsin a luattu mipi pawl thawn nangmah thah a lo duhtu siangpahrang Nebuchadnezzar le na ral pawl ka lo kaiter ding ih Nebuchadnezzar in a lo that ding. Zohman a lo zuah lo ding. Zaangfahnak le zawnruahnak zianghman nan parah a nei lo ding. Keimah BAWIPA in ka sim zo,” tiah a ti.

⁸Cule mipi hnenih sim dingah BAWIPA in i fial, “Ngai uh, keimah BAWIPA in hril dingmi pahnih ka lo pek: Nunnak lamzin le thihnak lamzin an si.

⁹Hi khawpi sungah a ummi cu raldonak ah an thi ding. Asilole rawl loin le natnak in an thi ding. Asinain hi khawpi a do rerotu Babilon mi hnenah feh tahratin kan sung tiih a va pe-awtu cu an lo that lo ding; a nunnak tal cu a luat ding a si.

¹⁰Hi khawpi cu zuah lo dingah ka ruatcat zo; ka siatsuah ding a si. Babilon siangpahrang hnenah pek a si ding ih ciamko in a ur ding. Keimah BAWIPA in ka sim zo,” tiah a ti.

¹¹BAWIPA in David tesinfa Judah siangpahrang ih innsang ah va sim dingin hiti in i sim: “Keimah BAWIPA ih ka sim mi hi ngaihnik uh! Nitinte thudik in thu rel uh. An bum ih an namnuai rero mipa cu a namnuaitu kut ihsin hum uh. Cutiih nan tuah lo a si ahcun thilsual nan tuahmi hin ka thinhengnak cu meisa bangin a alhter ding ih zohman in an hmit thei lo ding.

¹³Jerusalem, nang cu phairawn tlun hmun saang ah na to, hmunrawn lakih a saangmi lungto bangin. Asinain nangmah ka lo do ding. ‘Zohman in in do thei lo ding ih ṭanṭhat ka khuarnak hmun ahcun zohman an lut thei lo ding,’ na ti.

¹⁴Sikhalsehla na thil tuahmi ruangah ka lo hrem ding. Na inn ṭhaṭha cu meisa ih ka ur ding ih a kiangkap ziang hmuahhmuah a kaang ṭheh ding. Keimah BAWIPA in ka sim zo,” a ti.