Read Falam Chin JEREMIAH 29 Bible Online

JEREMIAH 29 - Falam Chin bible

JEREMIAH 29

¹Jerusalem ihsin Babilon ah Nebuchadnezzar in sal ih a hruaimi lakih hotu pawl, puithiam pawl, profet pawl le midang dang pawl hnenah Jeremiah ih ca nganmi a si.

²Hi ca cu siangpahrang Jehoiakhin le a nu, siangpahrang inn ih bawi le upa pawl, Judah ram hotu le Jerusalem khawsung upa pawl, zungthiam le sodeng pawl saltaannak hmun ah hruaihlo an si hnu ih a nganmi a si.

³Hi ca cu Babilon siangpahrang Nebuchadnezzar hnenah Judah siangpahrang Zedekiah ih a thlahmi Shafan fapa Elasah le Hilkiah fapa Gemariah kut in a kuatmi a si. A ca sungah cun:

⁴“Cungnungbik BAWIPA, Israel ih Pathian in Jerusalem ihsin Babilon ah Nebuchadnezzar a hruaitermi misenpi pawl hnenah hiti in a sim:

⁵‘Hmun luah uhla inn tla ṭhatein sak uhla um uh. Hmuan tuah uhla nan cinmi ei uh.

⁶Nupi ṭhi uhla faate tla nei uh. Nan faate pawl tla nupi ṭhi hai sehla faate nei ve hai seh. Ṭumsuk loin nan ṭhangso sawn pei.

⁷Thawngtla in ka lo fehternak khawpi ih ṭhatnak hrangah hnaṭuan uh. Ka hnenah an hrangah thlacam sak uh. Ziangahtile an ṭhangso ih mi neinung an si ahcun nannih khal mi neinung nan si ve ding.

⁸Keimah BAWIPA Israel ih Pathian in ralrinnak ka lo pek a si. Nan lakih a ummi profet pawl in siseh, hmailam thu ka thei a titu midang dang khal in siseh, lo bum hlah hai seh. Mang an man mi tla zianghman ah va siar hlah uh.

⁹Annih cu ka hmin ih thuphan pertu an si. Ka thlahmi an si lo. Keimah BAWIPA in ka sim zo,’ a ti.

¹⁰“BAWIPA in, ‘Babilon ram ih nan umnak kum sawmsarih a kim tikah nan parah seherhnak ka nei ding ih nan khua le nan ram ah kirter sal dingih ka lo tiammi vekin ka kimter ding.

¹¹Nan hrangih tumtahnak ka neihmi cu keimah lawngin ka thei. Tumtahnak ka neihmi cu siatralnak si loin mi neinung nan sinak dingah a si; cuih tumtahnak cu nan ruahsannak le nan hmailam hrang a si.

¹²Cutikah keimah in ko ding. Ka hnenah ra in thla nan cam tikah ka lo theihsak ding.

¹³In hawl ding ih in hmu ding. Nan thinlung takte ih in hawl tikah cun!

¹⁴Asi, in hmu ding ih nan khua le nan ram ah ka lo kirter ding, tiah ka lo sim a si. Khuakip le ramkip ih ka lo ṭhekdarhnak ihsin ka lo finkhawm hai ding ih sal nan taan hlanih nan rak umnak ram ahcun ka lo hruaikir ding. Keimah BAWIPA in ka sim zo a si,” tiah a ti.

¹⁵“BAWIPA in Babilon ah profet pawl in pek, tiah nan ti.

¹⁶David in a rak ukmi ram a uktu siangpahrang le hi khawpi sungih a ummi, nanmah vekin sal ih hruaihlo a si lomi nan sungkhat pawl ih thu ah BAWIPA ih ṭongkam hi ngai hnik uh:

¹⁷Cungnungbik BAWIPA in ‘Raldonak le paamnak le natnak an parah ka thlenter ding ih ei ṭha loih a ṭawtmi theipi bangin ka tuah ding.

¹⁸Raldonak, paamnak le natnak thawn ka thlun ding ih cumicu leilung tlun miphun tampi in an hmuh tikah an tuk a sumzet ding. Ka ṭhekdarhnak ram kipih mipawl in an parih a thlengmi thil an hmuh tikah mangbang le ṭihphang in an um ding. Mi in hnihsuahsainak ah an hmang ding ih an hmin cu mi siatcamnak ah an hmang ding.

¹⁹An hnenah cat loin keimah riantu profet pawl hnen ihsin ka thu cu ka thlenter ringring naón an ngai duh lo ruangah hi bangtuk ih an tuarnak a si.

²⁰Babilon ih ka lo kuatmi nan zatein keimah BAWIPA ih ka sim mi hi ngaihnik uh,’ a ti.

²¹“Cungnungbik BAWIPA, Israel ih Pathian in, nan hnenah amah hmin ih thuphan a rel rerotu Kolaiah ih fapa Ahab le Maaseiah ih fapa Zedekiah thu ah simmi a nei zo. Annih cu Babilon siangpahrang Nebuchadnezzar kut ah ka pe ding ih nan mithmuh rori ah a that ding, a ti.

²²Jerusalem ihsin Babilon ih hruaimi sal kaihmi pawl in mi pakhatkhat an cam duh tikah, ‘Babilon siangpahrang in an nungcung in a kiomi Zedekiah le Ahab vekin BAWIPA in lo tuahseh,’ an ti ding.

²³Cubangtuk in an tuar ding, ziangahtile thilsual an tuah. Mi nupi le mi pasal parah an sual ih BAWIPA ih hmin in thuphan an per ruangah a si. Cumi cu BAWIPA ih duh lomi an si. An tuahmi hmuahhmuah a thei ṭheh ih amah cu an sualnak ah thu theitu a si. BAWIPA in a sim zo,” tiah a ngan.

²⁴Cungnungbik BAWIPA, Israel ih Pathian in Nehelam mi Shemaiah hnen ih thu sim dingah i fial. Shemaiah in Jerusalem mi le Maaseiah ih fapa puithiam Zefaniah le puithiam dangdang hnenah amah ih hmin in ca a kuat. A cakuat sungah cun Shemaiah in Zefaniah hnenah,

²⁶“BAWIPA in Jehoiada ai ah puithiam ah a lo tuah zo ih atu-ah Biakinn sungih bawi tum bikah na cang zo. Curuangah mi aa asinain profet a ṭuanter awmi hmuahhmuah thir cikcin in an hngawng khit ṭheh aw; cumi cu na ṭuanvo a si.

²⁷Ziangah so mipi hnenah profet ṭong ih a ṭong rerotu Anathoth khuami Jeremiah kha cuvekin na tuah lo?

²⁸Reipi awhter nawn ding a si lo. Ziangahtile Babilon ih minung pawl cu cutawkah reipi sal ah nan taang ding. Inn nan sak pei, nan um pei. Hmuan nan tuah pei ih nan cinmi rawl nan ei pei, a titu cu amah a si,” tiah ca a kuat.

²⁹Cuih ca cu Zefaniah in ka hnenah a siar.

³⁰Cule BAWIPA in ka hnenah,

³¹Shemaiah thu thawn peh aw in Babilon ih sal taangmi hmuahhmuah hnenah hiti ih thucah dingin i sim, “Keimah BAWIPA in Shemaiah le a tesinfa hmuahhmuah cu ka hrem ding. Amah cu ka thlah mi a si lo naón nan hnenah profet ngai vekin a ṭong ih a lo bum a si. Nanmah lakah tesinfa pakhat hman a nei lo ding. Ka minung pawl hrangih thil ṭha ka tuah ding mi cu a hmu man nawn lo ding. Ziangahtile keimah dodal dingah ka minung pawl a forh a si. Keimah BAWIPA in ka sim zo,” tiah a ti.