Read Falam Chin JEREMIAH 3 Bible Online

JEREMIAH 3 - Falam Chin bible

JEREMIAH 3

¹BAWIPA in, “Mi pakhat cu a nupi a mak ih cu nu in mipa dang a pasal hnuah cu nu cu a nupi ah a lak sal pei maw? A lak sal asile an ram a borhhlawhter a si. Sikhalsehla Israel, nang cun ngaitu tampi na neih hnuah ka hnen ih ra kir sal na duh.

²Tlangzim kip khi zohhnik! Hlawhhlang na ṭuan lonak hmun pakhat tal a um maw?. Nelrawn ramṭhing ah Arab mi in a ral a bawh vekin lamzin tluan kipah na ngaimi na hngak a si. Hlawhhlang na sinakin hi ram cu na borhhlawhter ṭheh zo.

³Curuangah a si ruah a sur thei lo ih thlatang ruah tiangin a sur lonak hi! Na hmuihmel tiangin hlawhhlang na bang zo ih ningzah tikhal na nei nawn lo.

⁴“Atu-ah ka hnenah ‘Nang cu ka pa na si ih ka nauhak lai ihsin i rak duhtu na si.

⁵Ka parah kumkhua in na thin a heng lo pei ih na ai a thok ringring lo pei cu,’ i ti. Maw Israel, na hmurka cun cutin na ṭong, a sinan thilsual cu na tuah theizat in na tuah fawn,” tiah a ti.

⁶Josiah siangpahrang a si laiah BAWIPA in ka hnenah, “Hlawhhlang nunau vek a si mi Israel ih thiltuahmi hi na hmu maw? Ka hnen ihsin a tlan ih tlang sang kip le thing niim thuai tinah hlawhhlang in a um.

⁷Hi bangtuk thil a tuah hnuah cun ka hnenah a ra kir sal tengteng ding tiah ka ruat. Asinain a kir cuang lo. Cule zumtlak lo a si mi a unau nu Judah in a hmu ṭheh fawn.

⁸Ka hnenih a ra kir lo ruangah le hlawhhlang ih a um ruangah Israel cu ka maak ih ka dawi hlo khal cu Judah in a hmu ṭheh ko. Sikhalsehla zumtlak lo a si vemi Israel ih unau nu Judah cun ṭihnak zianghman nei cuang loin anih khal hlawhhlang a cang ve ih,

⁹zianghman ningzahnak a nei lo. Hi ram cu a balhter ṭheh ih lungto le thingkung biak tahrat in mah ih pasal ṭaang sung ihsin mipa dang ngaitu ah a cang.

¹⁰Hi hmuah hnuah Israel ih unau hlawhhlang nu Judah cu ka hnenah a kir sal vekin a tuah aw. Asinain a thinlung taktein a kir lo. Keimah BAWIPA in ka sim zo,” tiah a ti.

¹¹Cule BAWIPA in ka hnenah, “Israel cun i dungtun zo naón zumtlak lo nu Judah hnak cun a ṭha deuh lai hrih a si.

¹²Curuangah Israel hnenah va feh awla, ‘Maw zumtlak lo Israel, ka hnenah ra kir sal aw. Zaangfahnak neitu ka si ih ka thin a heng lo ding. Kumkhua cun na parah ka thin a heng lo ding.

¹³BAWIPA na Pathian parah na sual zo ih amah na dodalnak cu feltein phuang aw. Ka thukham pawl na thlun lo ih thing niim kipih thuai ah ramdang khawzing pawl ngai in na um hi phuangṭheh aw. BAWIPA Keimah in ka sim zo a si,’ va ti aw.

¹⁴“Maw zumtlak lo minung pawl, ra kir sal uh; Keimah ih ta nan si. Khua pakhat in mi pakhat ciar le hnam khat in mi pahnih fingfing ka lo lak ding ih Zion tlang ah ka lo kirpi hai ding.

¹⁵Ka thu a thluntu hotu pawl ka lo pe ding ih fimnak le theihthiamnak thawn an lo uk ding.

¹⁶Cule cuih ram ah nan karhzai ding ih cutikah cun mi in ka Thukham Kuang thu an rel nawn lo ding. Cuih Kuang thu cu an ruat nawn lo ding ih a ciin khal an ciing nawn lo ding; a ṭul khal an ṭul nawn lo ding. Cuvek Kuang khal an tuah nawn lo ding.

¹⁷Cuih tikcu a thlen tikah Jerusalem khua cu ‘BAWIPA ih Bawi tokham,’ an ti ding ih miphun hmuahhmuah cutawkah keimah biak dingah an khawm aw ding. An thinlung ruh le thinlung siava ih a fialmi ruahnak pawl thawn thil an tuah nawn lo ding.

¹⁸Israel in Judah a kom ding ih sal ih an taannak hmun saklam ram ihsin hmun khatah, nan pu le nan pa pawl hnenah kumkhua hrangin ka pekmi ram ah, an kir ding a si,” tiah a ti.

¹⁹BAWIPA in, “Maw Israel, Ka fapa si dingah ka lo duh; Ram ṭha le leilung tlun ih ram mawi bik na hnenih pek dingah ka duh a si. ‘Ka pa,’ tiih i kawh dingah le, Ka hnen ihsin tlan nawn lo dingah ka lo duh a si.

²⁰Asinain rintlak lo nupi bangin, ka hrangah rintlak lo na si ṭheu. BAWIPA Keimah in ka sim zo a si,” tiah a ti.

²¹Tlangpar phul lak ihsin thawmvang a thang, Israel mi pawl sualral in an nung; BAWIPA an Pathian an hngilh ṭheh zo ruang ih an ṭahhramnak le an ngennak aw thawng a si.

²²BAWIPA a dungtuntu mi pawl tla, ra kir sal uh; A lo damter ding ih rintlak ah a lo tuah ding a si. Nannih in, “Asi, BAWIPA hnenah kan ra kir, ziangahtile amah cu kan Pathian a si.

²³Tlangpar ih khuavang biaknak in kan hrangah ṭhathnemnak zianghman in pe lo. Israel rundamnak cu BAWIPA kan Pathian hnen lawngin a ra a si.

²⁴Sikhalsehla ningzakza a si mi Baal khawzing biaknak in khuahlan laiih kan pupa pawl ih hna an rak ṭuan mi man, an tuu rual le an caw rual, an fanu le an fapa pawl tiangin a ei ṭheh a si.

²⁵Ningzak in kan it pei ih kan mualphonak cun in khuh seh. Kanmah siseh, kan pupa pawl siseh, BAWIPA kan Pathian parah kan no lai ihsin tuih sun tiang a sual ringringtu kan si. Ziangtik khalah a mai thu ngai lotu kan si,” nan ti.