Read Falam Chin JEREMIAH 30 Bible Online

JEREMIAH 30 - Falam Chin bible

JEREMIAH 30

¹BAWIPA, Israel ih Pathian in ka hnenah,

²“Ka lo simmi hmuahhmuah hi cabu sungah ngan ṭheh aw.

³Ziangahtile ka minung Israel le Judah mipawl ka kirter salnak tikcu a ra thleng ding. An pupa pawl hnenih ka rak pekmi ram ah ka kirter sal ding ih anmah ih ta a si sal ding. Keimah BAWIPA in ka sim zo,” a ti.

⁴BAWIPA in Israel le Judah mi hnenah,

⁵“ṭihphannak aw thawm ka thei, daihnak a si lo; Thinphang ih aunak aw thawm a si.

⁶Cawlta uhla ruathnik uh! Mipa in faate a hring thei pei maw? Ziangah so nunau nau neizik bangin, mipa pawl in an pum an dom awk rero? Ziangah so an hmai tla a raam thluh?

⁷Ṭihnung le tuksumza ni a ra thleng ding. Cuvek ni cu a um dah keel lo; Ka minung hrangah awloksongnak ni a si. Asinain an tuar thei suak ding,” tiah a ti.

⁸Cungnungbik BAWIPA in, “Cuih ni a thlen tikah an hngawng ih caw-kawn cu ka khiak ṭheh ding ih an thir cikcin cu ka hlon ṭheh ding. Ramdangmi salah an cang nawn lo ding.

⁹Keimah BAWIPA an Pathian hi in rian ding ih siangpahrang ih ka tuah dingmi David tesinfa kha an rian sawn ding.

¹⁰“Ka minung pawl, ṭih hlah uh; Israel mi pawl phang hlah uh. Ram hlapi ihsin ka lo run ding, sal nan taannak ram ihsin. Nan ram ah nan kirsal ding ih, thlangamte in nan um sal ding. Himzetin nan um ding ih nan thla a ṭeem lo ding.

¹¹Nan hnenah ka ra ding ih ka lo hum ding. Ka lo ṭhekdarhnak ram cu ka siatsuah ding. Asinain nannih cu ka lo tisiat lo ding. Lo hrem loin ka um lo ding; Asinain ka lo hrem tikah dingthluk lairelnak thawn ka tuah ding. Keimah BAWIPA in ka sim zo,” tiah a ti.

¹²BAWIPA in a minung pawl hnenah, “Nan hma hi a dam thei lo ding; Nan hriamhma hi a besia ngaingai a si.

¹³A lo tuamhlawmtu zohman an um lo, Nan hma hnih dingah sii a um fawn lo. Nan damnak dingah beiseinak a um lo.

¹⁴A lo ngaitu pawl in an lo hngilh ṭheh zo. An lo poisa nawn lo. Ral vekin ka lo tuah; Hremnak nan tuarmi hi a nazet. Ziangahtile nan sualnak a tam ih, nan ṭhatlonak hi a nasa ngaingai a si.

¹⁵Nan hriamhma ruangah phunzai nawn hlah uh; Nan damnak ding a um lo. Hiti vekin ka lo hrem, ziangahtile nan sualnak a tam ih, nan ṭhatlonak hi a nasat tuk ruangah a si.

¹⁶Sikhalsehla tu cun a rak lo dolhtu pawl kha, dolh ṭheh an si ve thung ding. Nan ral pawl kha ral kaihmi ah an cang ding. A rak lo hmuhsuamtu pawl kha, hmuhsuam an si ve ding. A rak lo ramtu pawl kha ram an si ve thlang ding.

¹⁷Ka lo harhdamter sal ding, Nan hma pawl cu ka damter ding; Nan ral pawl in, ‘Zion cu hnonmi le khaak mi a si; Zohman in ziangah an siar lo,’ an ti hmanah, Keimah BAWIPA in ka ṭong zo,” a ti.

¹⁸BAWIPA in, “Ka minung pawl cu, An ramah ka kirter ding ih, An innsang kipah zaangfahnak ka nei ding. Jerusalem cu saksaal a si ding ih, A siangpahrang inn cu dinter sal a si ding.

¹⁹Cutawkih a ummi pawl cun, thangṭhatnak hla an sa ding; lungawi in an au ding. Thlawsuah ka pek ding ih an zai ciamco ding. Ka malsawmnak ruangah upatnak an ngah ding.

²⁰Khuahlan ih an rak neihmi nauhak bangin an nei sal ding. An khua le ram cu hngetzet in ka dinter sal ding. Anmah a hmuhsuamtu cu ka hrem ding.

²¹Anmah uktu cu anmah ih miphun sungin a suak ding. An siangpahrang fapa cu anmah ih miphun a si ding. Cupa cun ka kawh tikah i naih ding. Zoso kawh locun a ra ngam ding? Annih cu ka minung an si ding ih, Kei hi an Pathian ka si ding. Keimah BAWIPA in ka sim zo,” tiah a ti.

²³BAWIPA ih thinhengnak cu thlipi vek a si. A huuk reromi thlipi vek a si ih misual pawl ih lu tlun ah a huuk ding. Tuah a tummi a tuah thluh hlan lo a reh lo ding. Hi thu cu a ra dingmi tikcu ah a minung pawl in fiangtein an thei ding.