Read Falam Chin JEREMIAH 33 Bible Online

JEREMIAH 33 - Falam Chin bible

JEREMIAH 33

¹Siangpahrang inn kiltu pawl khaan sungih thawng ka tlak lai ahcun BAWIPA ih thu cu a voihnihnak ka hnenah a thleng sal.

²Leilung a siamtu, a tuahtu le a umnak hmun ih a dintu BAWIPA in ka hnenah a sim. A hmin ah BAWIPA a si mi cun,

³“I ko awla ka lo let ding. Na theih lomi thil khawruahhar le mangbangza ka lo sim ding.

⁴BAWIPA keimah, Israel ih Pathian in Jerusalem inn pawl le Judah ram siangpahrang inn cu ral in an kulh ih an do ciamco ruangah a cim ṭheh ding tiah ka sim.

⁵Mihrek cun Babilon mi pawl cu an do ve ding; a sinan annih in ka thinhengnak le ka ai-thawhnak in ka siatsuah tummi pawl ih ruak thawn inn pawl cu an khahter ding. Himi pawl in thilsual an tuah ruangah hi khawpi cu ka dungtun zo a si.

⁶Sikhalsehla hi khawpi le a minung pawl cu ka damter sal ding ih ka harh ververter ding. An hnenah hnangamnak le daihnak tlamtling in ka thlenter ding.

⁷Judah le Israel cu ka ṭhansoter ding ih a hlan vekin ka dinter sal ding.

⁸An sualnak le ka parih an mawhnak pawl cu ka kholhfai ding ih an sualnak le ral an thawhnak cu ka ngaithiam ding.

⁹Jerusalem cu ka hrangah lungawinak, hmaihngalnak le uannak hrampi a si ding. Jerusalem mipawl hrangah thil ṭha ka tuahmi le hi khawpi hrangih ṭhansonak ka thlentermi cu leilungtlun miphun pawl in an theih tikah an ṭih ding ih an khur rero ding,” tiah a ti.

¹⁰BAWIPA in, “Mi in hi hmun cu nelrawn ram vek a si, milai siseh ramsa siseh an um lo tiah an ti. Asi, an dik a si. Judah khua pawl le Jerusalem khawsung lamzin pawl cu an ṭhing reprep ngai a si. Minung le ramsa zianghman an um lo. Sikhalsehla hi hmun pawl ahhin,

¹¹lungawi aipuannak thawng le mocan puai ih awn-au thawmvang nan thei sal ding. Mi pawl in ka Biakinn ah lungawi thawinak pe dingah hlasak phah ih an rat nan thei ding. Annih in, ‘Cungnungbik BAWIPA hnenah lungawinak pe uh, Ziangahtile amah cu a ṭha; a duhdawtnak cu kumkhua in a hmun,’ an ti ding. Hi ram cu a hlan vekin ka ṭhansoter ding. Keimah BAWIPA in ka sim zo,” tiah a ti.

¹²Cungnungbik BAWIPA in, “Hi ram nelrawn a bangmi le minung le ramsa an um lonak ram hi ṭilva tlannak ram a cang sal ding ih cunah tuukhal pawl in an tuu an khal ding.

¹³Tlangpar ram ih khua pawl, tlanghram ram le Judah ram thlanglam ah, Benjamin ram sung le Jerusalem kiangkap khawfate te ah le Judah ram khua pawl ah tuukhal pawl in an tuu an siar ciamco sal ding. Keimah BAWIPA in ka sim zo,” tiah a ti.

¹⁴BAWIPA in, “Israel le Judah mi hnenih ka thukammi ka kimternak tikcu a ra thleng ding.

¹⁵Cutikah an siangpahrang ah David ih tesinfa mifel pakhat ka hril ding. Cuih siangpahrang in hi ram sungah hin thil dik le thil ding a tuah ding.

¹⁶Judah mi le Jerusalem mipawl cu runsuak an si ding ih hnangam zetin an um ding. Hi khawpi cu, ‘BAWIPA kan Rundamnak,’ ti a si ding.

¹⁷Israel siangpahrang cu David tesinfa a si ringring ding ih,

¹⁸Keimah riantu le mei-ur thawinak petu le sangphut le thawinak dangdang petu dingah Levi phun sungin puithiam an ṭuan ringring ding, tiah keimah BAWIPA in thu ka kam a si,” a ti.

¹⁹BAWIPA in ka hnenah,

²⁰“Sun le zan cu anmah tikcute ih um ringring dingah anmah thawn thukamnak ka tuah zo. Cuih thukamnak cu bal theih a si nawnlo ding.

²¹Cuvek thotho in a tesinfa pawl in siangpahrang ṭuan ringring ding in ka sal pa David thawn thukamnak ka tuah ih keimah riantu si ringring ding in Levi phun puithiam pawl thawn thukamnak ka tuah zo; hi thukamnak pawl cu bal theih a si nawn lo ding.

²²Ka sal pa David ih tesinfa pawl le Levi phun puithiam pawl cu ka karhzaiter ciamco ding ih, van ih arsi le tifinriat kap vunnel siar cawk lo an si bangin siar cawk lo an sive ding,” tiah a ti.

²³BAWIPA in ka hnenah,

²⁴“Hi mipawl in ka hril ciami innsang pahnih Israel le Judah hi a hnong zo a si, tiah an rel rero hi na thei zo maw? Cule ka minung Israel le Judah mipawl cu an nautat ih miphun hmanah an siar nawn lo.

²⁵Asinain keimah BAWIPA in sun le zan thawn thukamnak ka tuah ih lei le van an umzia uktu dingah daan khal ka tuah a si.

²⁶Hi thil pawl a tuahtu ka si vekin Jakob ih tesinfa pawl le i riantu David thawn ka tuahmi thukamnak cu ka hmunter ding. Abraham, Isaak le Jakob ih tesinfa pawl uktu ah David ih tesinfa pakhatkhat ka hril ding. Ka minung pawl parah zaangfahnak ka nei ding ih mi neinungzet ka siter sal hai ding,” tiah a ti.