Read Falam Chin JEREMIAH 34 Bible Online

JEREMIAH 34 - Falam Chin bible

JEREMIAH 34

¹Babilon siangpahrang Nebuchadnezzar le a ralkap pawl le a kut thuai ih a ummi miphun hmuahhmuah pawl ih ralkap pawl in Jerusalem le a kiangkap khua pawl an do rero laiah BAWIPA ih thu cu ka hnenah a rung thleng.

²BAWIPA, Israel ih Pathian in Judah siangpahrang Zedekiah hnenah feh tahratin hiti in va sim dingah i fial, “Keimah BAWIPA in hi khua cu Babilon siangpahrang kutah ka pe ding ih a nih in ciam ko in a ur ding.

³Na luat lo ding; kaih na si ding ih Babilon siangpahrang kut ah pek na si ding. Hmaiton in amah cu na hmu ding ih nan bia aw ding; cule Babilon ah na feh ding.

⁴Zedekiah, na hnenih ka ṭongmi hi ngaihnik! Raldonak ahcun na thi lo ding.

⁵Daite in na thi ding; na hlan ih siangpahrang a cangmi na pu le na pa pawl an thih ih an phum tikah rimhmui an ur bangin na hrang khalah rimhmui an ur ve ding. An lo ṭah ding ih, ‘Kan siangpahrang a thi ee,’ an ti ding. Keimah BAWIPA in ka sim zo,” tiah a ti.

⁶Cuih thu cu Babilon siangpahrang ralkap pawl in,

⁷Jerusalem khua an do rero laiah siangpahrang Zedekiah cu ka sim. Babilon ralkap pawl cun Lakhish le Azekah khua khal an do ciamco; hi khua pahnih cu a taangsun ralhruang kulhmi Judah khawpi an si.

⁸Siangpahrang Zedekiah le Jerusalem mipawl in zohman in kanmah ih miphun Israel mi lala cu sal ah kan zua nawn lo pei;

⁹Hebru sal pawl cu nunau siseh, mipa siseh luatter ṭheh an si pei, tiah lungkimnak an tuah.

¹⁰Mipi pawl le an hotu pawl an zatein an lung a kim ih an sal pawl thlah thluh ih sal ih kaih sal nawn lo dingin an lung a kim ṭheh a si. An lungkimnak vekin an thlah ṭheh.

¹¹Asinain an lung an thleng sal ih an kaih sal ih sal ah an tuah sal ṭheh lala.

¹²Cutikah BAWIPA,

¹³Israel ih Pathian ṭong cu mipi hnenih sim dingah ka hnenah a thleng: “Izipt ram saltaannak ihsin nan pupa pawl ka runsuak ih ka luatter tikah anmah thawn thukamnak ka tuah.

¹⁴Hebru sal kum ruk a lo riantu an um tikah a kum sarihnak ahcun nan luatter ding, tiah ka sim. Asinain nan pupa pawl cun ka thu in thlun lo, ka simmi khal an ngai lo.

¹⁵Naite ah nan thinlung nan thleng ih ka lung i awitertu thil nan tuah. Nan zatein nan phunpi Israel sal pawl cu thlah ṭheh dingah nan lung a kim ih, keimah in biaknak Biakinn sungah ka mithmuh ah thukamnak nan tuah.

¹⁶Sikhalsehla nan lung nan thleng lala ih ka thangsiatnak thil nan tuah lala. Nan zatein an duh vekih nan thlah ciami sal pawl cu nan kaih sal ih sal ah nan tuah lala.

¹⁷Curuangah keimah BAWIPA in ka thu nan thlun lo a si, tiah ka lo ti. Nan phunpi Israel mipawl cu nan luatter lo. A ṭha, nannih tla luatnak ka lo pe ding: Raldonak le paamnak le natnak in duhduh ih thih theinak ka lo pe ding. Nan parih ka tuahmi in leilung tlun miphun hmuahhmuah tuksum ko in a tuah ding.

¹⁸Judah ram le Jerusalem khawsung bawi pawl, siangpahrang inn ih bawi pawl, puithiam pawl le hotu hmuahhmuah in cawcang pakhat an that ih a laifang in an seu ih cuih caw ruang ṭhen hnih karlak ih feh tahratin keimah thawn thukamnak an tuah. Sikhalsehla cuih thukamnak cu an bal ih thlun ding an timi khal an thlun lo. Curuangah cawcang parih an tuah vekin himi pawl parah ka tuah ve ding.

²⁰Anmah thah a hiar zettu an ral pawl hnenah ka pe ding ih an ruak pawl cu vate le ramsa in an ei ding.

²¹Judah siangpahrang Zedekiah le a kut thuai bawi pawl tla anmah thah a duhtu pawl hnenah ka pe ding. Nanmah do lo in a cawltu Babilon ralkap pawl ih kut ah ka pe ding.

²²Cuih ralkap hnenah thu ka pe ding ih hi khawpi ah an ra kir sal ding. An do ding, an neh ding ih an ur ciam ding. Judah khua pawl cu zohman um lonak nelrawn vekah ka tuah ding. Keimah BAWIPA in ka sim zo,” tiah a ti.