Read Falam Chin JEREMIAH 37 Bible Online

JEREMIAH 37 - Falam Chin bible

JEREMIAH 37

¹Babilon siangpahrang Nebuchadnezzar in Jehoiakim ih fapa Jehoiakhin ai ah Josiah ih fapa Zedekiah cu Judah siangpahrang ah a tuah.

²Asinain Zedekiah in siseh, a kut thuai bawi pawl le misenpi pawl in siseh, BAWIPA in ka hnenih a simmi thu cu an ngai duh lo.

³Kan miphun ai-awh in BAWIPA kan Pathian hnenih thlacam dingah siangpahrang Zedekiah in Shelemiah ih fapa Jehukal le Maaseiah ih fapa puithiam Zefaniah cu ka hnenah a rak thlah.

⁴Culai ahcun thawng ah in thlak hrih lo ih luat zetin misenpi lakah ka tlang thei lai.

⁵Babilon ralkap pawl in Jerusalem an kulh ṭheh zo; sikhalsehla annih in Izipt siangpahrang Faro ralkap pawl cu Izipt ramri an rak lan zo ti an theih tikah Jerusalem ihsin an siip thluh sal.

⁶Cule BAWIPA, Israel ih Pathian in,

⁷Zedekiah sim dingah hiti in i sim, “Izipt ralkap pawl cu nangmah bawm dingah an ra lai rero. Asinain an ram ah an kir sal ding.

⁸Babilon ralkap pawl cu an ra sal ding ih Jerusalem khawpi hi an do ding, an lak ding ih ciam ko in an ur ding.

⁹Babilon mipawl an ra nawn lo ding tiin ruat tahratin nangmah le nangmah bum aw rero hlah; Keimah BAWIPA in ralrinnak ka lo pek: an ra tengteng ding.

¹⁰Babilon ralkap an zatein na neh ṭheh ih hmapu pawl lawnglawng an taang ih an buuk sungih hlum ṭhehmi an si hmanah cupawl cu an tho sal ding ih hi khawpi cu meisa thawn ciam ko in an ur thotho ding,” tiah a ti.

¹¹Izipt ralkap pawl an ra ti an theih tikah Babilon ralkap pawl cu Jerusalem ihsin an siip.

¹²Curuangah kei khal sungkhat thilri co ding ka neih ve ruangah Benjamin ram ih feh dingah Jerusalem ihsin ka pok.

¹³Asinain Benjamin Kotka ka thlen tikah cutawkih kotka kiltu ralkap pawl hotu ralbawi, a hmin Irijah an timi, Shelemiah ih fapa, Hananiah ih fasuan cun i rak kham ih, “Babilon mi hnenah na tlan tum a si lo maw?” tiah i sut.

¹⁴“Sihlah, tlan ka tum lo,” tiah ka sawn. Asinain Irijah cun ka simmi cu a ngai lo. I kai ih bawi pawl hnenah i hruai.

¹⁵In hmuh tikah an thin a heng ih in vuak ih sungṭuan Jonathan inn ah, thawnginn ih an tuahmi inn sungah cun in ret ih tawh an hren.

¹⁶Leilung thuai khaan sungah in ret ih cutawkah reipi ka um.

¹⁷Cuih hnuah siangpahrang Zedekiah in i ko ih a inn sungah cun a thupte in, “BAWIPA hnen ihsin ziang thu a ra maw?” tiah i sut. “A ra a si. Babilon siangpahrang kut ah pek na si ding,” tiah ka ti.

¹⁸Cule thusuh ding ka neih ruangah a hnenah cun, “Ziang sualnak so nangmah le na kut thuai bawi pawl parah siseh, misenpi parah siseh, ka neih ih thawng ah i thlak?

¹⁹Babilon siangpahrang in nangmah le hi ram cu a lo do lo ding, tiah a lo simtu na profet pawl teh khui-ah so an si ṭheh?

²⁰Atu-ah siangpahrang BAWIPA, na hnen ah ka lo dilmi i tuahsak dingah zaangfah ka lo dil, i theih sak hram aw. Jonathan inn, thawnginn sungah cun i kuat sal hram hlah aw. I kuat sal a si ahcun cunah ka thi tengteng ding,” tiah ka ti.

²¹Curuangah siangpahrang Zedekiah in siangpahrang inn kiltu pawl umnak khaan sungah i khum. Cutawkah ka um ih khawpi sungih sang a cem hlan lo, sangtuahtu lamzin timi ihsin, nitinte sang zawl khat ka ngah ringring.