Read Falam Chin JEREMIAH 4 Bible Online

JEREMIAH 4 - Falam Chin bible

JEREMIAH 4

¹BAWIPA in, “Maw Israel mi pawl, kir sal nan duh ahcun ka hnenah ra kir sal uh. Ka ningsin zetmi milem biaknak cu nan hlon ih ka hmaiah rintlak le hngetkhoh ih nan um ahcun,

²ka hmin sal in siatserhnak nan tuah tikah thudik le dingthluk lairelnak le dingfelnak thawn nan tuah a si ahcun nan hrangah a ṭhami a si ko ding. Cuticun miphun hmuahhmuah in an parih thlawsuah pe dingah in dil ding ih in thangṭhat ding a si,” a ti.

³BAWIPA in Judah mi le Jerusalem khua mi hnenah, “Nan leileh hrih lomi cu let thlang uh, nan thlaici cu hling lakah vorh hlah uh.

⁴Maw Judah mi le Jerusalem mi pawl, nan BAWIPA keimah thawn nan tuahmi thukamnak cu kimternak in ka hmaiah serhtanmi si uh; cuticun ka hrangah thianghlim zetin hlan-aw uh. Cutiih nan tuah lo asile thil nan tuahsual ruangah nan parah ka thinhengnak cu meisa bangin a alh ding ih a hmit theitu zohman an um lo ding,” tiah a ti.

⁵Hi ramsung khuazakip ah tawtawrawt tum uh, Ringzet le fiangzetin tum uh. Judah mi le Jerusalem mi pawl cu ralhruang ih kulhmi khawpi sungih tlan dingin sim uh.

⁶Zion fehnak lamzin hmuh uh; Himnak hmunah tlan uh; Muangcang hlah uh! BAWIPA in harsatnak a thlenter ding; Saklam ihsin a nasazetmi siatralnak a thleng ding.

⁷A relhnak ihsin kiosa a rat vekin, Ram tampi siatsuahtu a tho zo; Judah siatsuah dingin a ra lai rero. Judah khua pawl cu khawrop ah an cang ṭheh ding ih, zohman a sungah an um lo ding.

⁸Curuangah buri hnipuan hruk uhla, ṭap-ai in rak ciamco uh; Ziangahtile BAWIPA ih thinhengnak cu Judah par ihsin a kiang hrih lo a si.

⁹Cule BAWIPA in, “Cuih ni ahcun siangpahrang le a kut thuai bawi pawl ih ralṭhatnak a cem ding. Puithiam pawl an khawruah a har ding ih profet pawl khal mangbangin an um ding,” a ti.

¹⁰Cutikah kei in, “Maw Cungnungbik BAWIPA, Jerusalem mi pawl hi nasazetin na bum hai a sihi! Daihnak a um ding, tiah na sim naón ralnam cu an hngawng thawn a dai-aw thlang a si,” tiah ka ti.

¹¹Jerusalem mi pawl lamah nelrawn ih tlangram ihsin thlipi nasazetin a hrang ding ti simfiang ding can a thleng zo a si. Cuih thli cu meisa vekih a sami thlipi a si ding. Fanghii a seemtu thlizil nem a si lo ding.

¹²BAWIPA ih thupek in a ra hrangmi thli cu cuhnak ih a cak deuhmi thli a si ding. Cuih thli cu a minung pawl parih thu ṭhennak a si dingih thu a petu cu BAWIPA amah a si ding.

¹³Zohhnik uh, ral pawl khawdur bangin an ra. An rangleng pawl cu phusiing thli hnakin an cak deuh ih an rang pawl cu muvanlai hnakin an zamrang deuh. Kan lamzin a pit! Kan cem a si!

¹⁴Maw Jerusalem, thilsual na tuahmi pawl cu na thinlung ihsin kholhfai ṭheh awla cutiin runnak na ngah ding. Ziangtik tiangso thilsual cu na thinlung in na ngaihtuah hrih ding?

¹⁵Dan khua le Efraim tlangpar ram ihsin thuthang sia thantu dingah tirhmi an ra thleng.

¹⁶Ral pawl ram hlapi ihsin an ra ding tiah miphun pawl le Jerusalem ralrinnak pe dingah an ra a si. Ral pawl in Judah khua pawl cu an auh ding ih,

¹⁷mi in an lo an kil vekin Jerusalem khawpi cu an kulh ṭheh ding. Ziangahtile a minung pawl in BAWIPA an dodal in ral an tho a si. BAWIPA in a sim zo.

¹⁸Maw Judah, na nunzia le na thil tuahmi in hi thil poimawh cu na parah na thlengter. Na sualnak in hi tuarnak cu a suahter. Feipi bangin na thinlung a lo sun zo a si.

¹⁹A va na ve! A nat ka tuar thei lo! Ka thinlung a na! Ka thin a tur dukdo! Daite in ka um theilo. Tawtawrawt tum thawm ka thei! Raldonak au thawm ka thei.

²⁰Siatralnak pakhat hnu pakhat an thlun aw; Ram pumpi cu hnawmpen ah a cang; Rinlopi in kan puanthlam pawl cu siat ṭheh an si. An puanzar pawl cu an thlek ṭheh a si.

²¹Ziangtik tiangso raldo awknak thawng hi ka theih ding ih, Tawtawrawt tum thawm cu ka theih hrih ding?

²²BAWIPA in, “Ka minung pawl hi an aa a si; Keimah in thei nawn lo, Nauhak aa vek an bang; Theihthiamnak zianghman an nei lo. Thilsual tuah cu an thiamzet, Asinain thil ṭha cu an tuah suak dah lo,” a ti.

²³Leilung ka zoh ih ṭiosanmi ramṭhing le hnawmpen a si. Van ka hun zoh ih tleunak zianghman a um lo.

²⁴Tlangsaangpi ka zoh ih an hnin aw durdo; Tlang fate pawl an seep-aw rero.

²⁵Milai zohman an um nawn lo; Vate pawl khal an zamhlo ṭheh zo.

²⁶Ram ṭhazet cu nelrawn ah a cang zo. An khawpi pawl cu hnawmpen ah an cang ṭheh zo. BAWIPA ih thinhengnak ruangah.

²⁷BAWIPA in, “Leilung pumpi cu ramṭhingah a cang ding, asinain ka siatter ṭheh lo ding,” a ti.

²⁸Leilung cu mithi a ngai ding; Van tla khi a thim ṭheh ding. BAWIPA in a sim zo ih a thinlung a thleng nawn lo ding. A thu a ruat cat zo ih, dungah a siip nawn lo ding.

²⁹Rang ralkap le conkiang ralkap pawl ih thawmvang an theih tikah zokhal an tlan ṭheh ding. Mihrek cu tupi sungah an relh ding, Midang cu lungkhaamah an van ding. Khua hmuahhmuah in a ṭhing ṭheh ding ih milai zohman an um sal nawn lo ding.

³⁰Maw Jerusalem, na cem riai a si! Ziangah so hnipuan sen in na thuam awk ciamco? Ziangah so nan sui le nan ngun hlawnthil nan suah ih nan thuam awk hi? Ziangah so nan mit tla mawinak sii nan hnih? A lakah nan mawi-awter men a si! A lo ngaitu na tlangval pawl in an lo hnong zo ih, thah an lo tum sawn a si.

³¹Nunau nau neih tikih ai thawm bangtuk ka thei; Fatir nau neih ih ṭah-ai thawm vek a si. Cumi cu Jerusalem in a thaw a thawh thei lo ih ai thawm a si. A kut a hun thlir ih, “Kei cu ka cem zo e, Keimah thah dingah an ra zo,” tiih a ainak thawm a si.