Read Falam Chin JEREMIAH 42 Bible Online

JEREMIAH 42 - Falam Chin bible

JEREMIAH 42

¹Cun ralkap hotu pawl hmuahhmuah le Kareah ih fapa Johanan le Hoshaiah ih fapa Azariah[8] le mipi pawl a tum a seen in ka hnenah an ra ih,

²annih in, “Kan lo dilmi hi in tuahsak hram aw. BAWIPA kan Pathian hnenah kan hrangah thlacam hram aw. A nungmi kan zate hrangah hin thla in cam sak aw. Tuih hlanah cun minung kan tamzet, a sinan atu-ah cun in hmuh vekin mi malte lawng kan taang a si.

³Kan fehnak ding lamzin le kan tuah dingmi thil kan hmuh theinak dingah BAWIPA kan Pathian hnenah thla in cam sak hram aw,” tiah in ra dil.

⁴Cutikah kei in, “A ṭha; nan dil vekin BAWIPA kan Pathian hnenah cun thla ka cam ding. A simmi hmuahhmuah cu ka lo sim ṭheh ding; zianghman ka suup lo ding,” ka ti.

⁵Cule annih in, “BAWIPA kan Pathian in kan hrangih thu a lo pekmi kan thlun duh lo a si ahcun BAWIPA cu in dodaltu sisehla kan parah thu theitu dikzet le felzet si hram seh!

⁶A hnenah thlacam sak dingih kan lo dil ruangah kan duh ah siseh, duh lo ah siseh, BAWIPA kan Pathian ih thu cu kan ngai ding. A thu kan ngai asile kan lamzin a tluang ding a si,” tiah in ti.

⁷Ni hra hnuah BAWIPA ih ṭong cu ka hnenah a rung thleng.

⁸Curuangah Johanan le a hnen ih a ummi ralkap hotu pawl le misenpi pawl cu ka ko.

⁹An hnenah, “A hnenah dil dingih in thlahmi BAWIPA Israel ih Pathian in nan hnenah,

¹⁰‘Hi ram sungih um nan duh ahcun ka lo siatsuah lo ding, ka lo tungding sawn ding; ka lo phawi lo ding, ka lo phunhnget sawn ding a si. Nan parih ka thlentermi siatralnak hin ka thin in natter zo a si.

¹¹Curuangah Babilon siangpahrang cu ṭih nawn hlah uh. Nan hnenah ka um ih a cahnak huham sungin ka lo run ding.

¹²Zaangfah thinpemnak neitu ka si ruangah nan parah zaangfahnak ka neihter ding ih nan khua le nan ram ah a lo kirter ding. Keimah BAWIPA in ka sim zo,’ a ti.

¹³“Sikhalsehla nannih Judah ram ih a taangmi pawl in BAWIPA nan Pathian thu cu nan el lo pei ih hi ram sungih um khal nan nuar lo pei. Nannih in ‘Asilo, Izipt ram ah kan feh ding ih kan vung um sawn ding. Izipt ram ahcun ral kan do nawn lo ding, raldo ding kawhnak aw tla kan thei lo ding ih kan ril tla a rawng lo ding,’ nan ti lo pei. Nan ti a si ahcun Cungnungbik BAWIPA, Israel ih Pathian in, ‘Izipt ram ah feh in a um nan tumtah hrimhrim a si ahcun,

¹⁶nan ṭih zetmi ral in a lo man ding. Nan phan zetmi rilrawnnak cun a lo thlun ding ih Izipt ram ah nan thi ding.

¹⁷Izipt ram ah feh in um a tum hrimhrimtu pawl cu ral kut in maw, paamnak in maw, a si lole natnak in maw an thi ṭheh tengteng ding. Zohman an nung lo ding. An parih ka thlenter dingmi siatralnak in zohman an luat lo ding,’ a ti.

¹⁸“BAWIPA, Israel ih Pathian in, ‘Ka thinhengnak le ka ai-thawhnak cu Jerusalem khuami parih burh a si vekin Izipt ram ih nan feh a si ahcun nan parah burh a si ve ding. Midang pawl mithmuh ah tuksumza nan si ding. Mi ih puahcokmi ah nan cang ding ih nan hmin cu midang siatcamnak ah an hmang ding. Cule hi ram hi nan hmu sal nawn lo ding,’ a ti,” tiah ka sim.

¹⁹Cuih hnuah hiti in ka sim beet sal, “BAWIPA in Judah ram ih a taangmi nannih pawl cu Izipt ram ih feh lo dingin a lo sim zo. Atu ah ralrinnak ka lo pek.

²⁰Nan feh a si ahcun nan ti sualzet ding a si. BAWIPA kan Pathian hnenah nan hrangih thlacam sak dingin in dil ih a thupek mi hmuahhmuah tuah dingah thu nan kam aw.

²¹Atute ah ka lo sim ṭheh. Asinain BAWIPA kan Pathian in i simtermi hmuahhmuah nan el thluh fawn.

²²Curuangah ciing ṭha uh: Um nan duhnak ram ah feh tahrat in ral in maw, rawl loin maw, a si lole natnak in maw nan thi ding a si,” ka ti.