Read Falam Chin JEREMIAH 49 Bible Online

JEREMIAH 49 - Falam Chin bible

JEREMIAH 49

¹Ammon ram ih thu ah BAWIPA in hiti in a sim, “Israel mipawl khuiah so an si? An ram a humtu zohman an um lo maw? Ziangah so Gad ram cu Molek khawzing a biatu pawl an lakter ih an luahter?

²Sikhalsehla Rabbah khawpi ih a ummi pawl in raldonak thawmvang an theihnak tikcu ka thlengter ding ih an khawpi a siatral ding ih an khawte pawl tla ciam ko in ur ṭheh an si ding. Cutikah an rak lon ciami ram cu Israel mi pawl in an longkir ding.

³Maw Heshbon mipawl, ṭap in ai uh! Ai khua cu a cem zo a si! Maw Rabbah nunau pawl, ṭap in ai rero uh! Buri hnipuan hruk uhla mithi ngai in um uh! Tawivak in suk le so ah tlan uh! Nan khawzing Molek cu a puithiam pawl le a bawi pawl thawn ralkaih mi sal ah an cang ding.

⁴Nannih rintlak lo pawl, ziangah so tluang nan khawn ciamco? Nan cahnak a cem zo a si. Ziangah so nan cahnak ring tahratin zohman in in tawng ngam lo ding, tiah nan ti?

⁵Nan kimvel in tuksumza ka suahter ding. Nan zatein nan tlanhlo ṭheh ding. Zokhal luat duh ah nan tlan ding ih nan ralkap pawl a kokhawmtu zohman nan um lo ding.

⁶“Sikhalsehla netalam ahcun Ammon ram cu neinungzet ah ka canter sal ding. Keimah BAWIPA in ka sim zo a si,” tiah a ti.

⁷Cungnungbik BAWIPA in Edom thu ah hiti in a sim: Edom mi pawl hi thudik an ruat thei nawm lo maw si? An thuronmi pawl in ziangtuah ding an sim thei lo maw si? An fimnak hmuahhmuah a cem ṭheh zo maw si?

⁸Maw Dedan mipawl, her uhla tlan uh! Relh uh! Esau tesinfa pawl ka siatsuah ding, ziangahtile anmah ka hremnak tikcu a ra thleng zo.

⁹Mi in sabit rah an lawh tikah a hri parah malte tal an hlah; rukru pawl in zanih mi an ram tikah an duhmi thil lawng an lak.

¹⁰Sikhalsehla Esau tesinfa pawl cu an tak lawng in ka ret; an relhnak hmun khal ihsin ka phorhsuak ih an relh thei nawn lo. Edom mi hmuahhmuah an hloral ṭheh zo a si. Mi pakhat hman an taang nawn lo.

¹¹Nupa nei lo ngakṭah pawl ka hnenah tanta uh, ka kilkhawi ding. Nan nuhmei pawl khal in in ring thei ding a si.

¹²“Hremnak a tuar lo ding pawl hman ih hremnak khuat hai an in a si ahcun hrem lo ih luat dingah nan ruat aw maw si? Sihlah! Cuih khuat hai cu nan in tengteng pei!

¹³Keimah rori in Bozrah khawpi cu mi hmuh ah tuksumza le ramṭhing ah a cang ding. Khawte hmuahhmuah cu kumkhua in an siatral ta ding. Keimah BAWIPA in ka sim zo,” a ti.

¹⁴Kei in, “Maw Edom, BAWIPA hnen ihsin thu ka ngah. Miphun pawl in an ralkap timtuah in nangmah do dingih tiar dingah palai an thlah zo.

¹⁵BAWIPA in a lo ṭawnṭaiter ding ih zohman in an lo upat lo ding.

¹⁶Na hngalnak hi a lo bumtu a si. In ṭih hmang na ti vek hin zohman in an lo ṭih lo. Lungto khukhaam saangpi le tlang saangpi zim ah na um; muvanlai tlukih hmunsang ih na um hmanah BAWIPA in a lo dirthla ding. BAWIPA in a sim zo a si,” ka ti.

¹⁷BAWIPA in, “Edom parih a thleng dingmi siatsuahnak cu a nasa tuk ding ih a kiangih a fehtu hmuahhmuah an mangbang in an ṭih ding.

¹⁸Sodom le Gomorrah parah le a kiangkap khua pawl parih a thleng mi thil ṭihnung cu Edom par khalah a thleng ding. Cuih hmunah minung zohman an um sal nawn lo ding. Keimah BAWIPA in ka sim zo.

¹⁹Jordan Tiva kap tupi sungih sin suak tahratin ṭilva tlannak lenkolh ih a hung suakmi kiosa bangin keimah ka ra thleng ding ih rinlopi in Edom mipawl cu an ram ihsin ka tlanhloter ding. Cule hotu ka hrilmi in ram cu a uk ding. Keimah thawn ṭhim ding zoso a um? Keimah i zuam ngamtu zoso a um? I dodal ngamtu uktu zoso a um?

²⁰Curuangah Edom mipawl siatsuahnak ding ka tummi le Teman khua sung mipawl ziangtluk in tisiat ka tum tikha ngaihnik uh! An faate pawl hman caihhlo an si ding ih mi hmuahhmuah an tuk a sum ding.

²¹Edom a tluuk tikah cun a thawm a nasa tuk ding ih leilung pumpi hman a hnin ṭheh ding. Ṭihphannak awn-au thawm cu Agaba Tikel tiang a thang ding.

²²Khaupi in ar a nam bangin Bozrah cu ral in an nam ding. Cuih ni ah Edom ralkap pawl cu nau neizik nunau bangin thinphang in an um ding,” tiah a ti.

²³BAWIPA in Damaskas thu ah hiti in a sim: “Thusia an theih ruangah Hamath le Arpad khawsung mipawl cu donhar le thinphang in an um. Thinharnak in tipi bangin a khuh ih colhdamnak an ngah thei lo.

²⁴Damaskas mi pawl cu an ṭawnṭai ih thinphang in an tlanhlo. Nau neizik nunau bangin mangbang vansaang le harsa in an um.

²⁵Khua nuamzet le khua hminthangzet cu ṭiosan ṭhehmi khua ah a cang.

²⁶Cuih ni ah an tlangval pawl cu khawsung lamzin ah thah an si ding ih a ralkap pawl cu an siatral ṭheh ding.

²⁷Damaskas kulhnak ralhruang pawl cu meisa in ka ur ding ih siangpahrang Benhadad inn pawl cu ciamko in ka ur ṭheh ding. Keimah Cungnungbik BAWIPA in ka sim zo,” tiah a ti.

²⁸Babilon siangpahrang Nebuchadnezzar ih nehmi Kedar hrin le Hazor ih ukmi peng pawl thu ah BAWIPA in hiti in a sim: “Kedar mi pawl khi do uhla nisuahnak lam hrin cu siatsuah uh!

²⁹An puanthlam le an tuu rual pawl, an puanthlam puanzar pawl le an puanthlam sungih a ummi thilri hmuahhmuah long ṭheh uh. An kalauk pawl hruai uhla mipi hnenah, ‘Nan kiangkap khuazakip ah ṭihphannak a um,’ ti uh.

³⁰“Hazor mi pawl, keimah BAWIPA in ralrinnak ka lo pe: Tlan uhla relh uh. Babilon siangpahrang Nebuchadnezzar in a lo phiar ih hiti in a ṭong:

³¹‘Ra uh, kan him a si tiah a ruattu pawl kan do ding. An khawpi cu kotka a nei lo; tawhkalh hrennak khal a nei lo ih zohman in an kilveng lo a si,’ a ti.

³²“An kalauk le an caw pawl la uh! An sam tawite ih a mettu pawl cu hmunkip ah ka ṭhekdarh ding ih hmunkip ihsin an hnenah siatralnak ka thlenter ding.

³³Hazor cu kumkhua in hmunṭhing ah ka tuah ding ih cinghnia lawng umnak hmunah a cang ding. Cuih hmun ah minung zohman an um sal nawn lo ding. Keimah BAWIPA in ka sim zo,” a ti.

³⁴Zedekiah cu Judah siangpahrang a can ṭheh vete in Elam ram thu ah Cungnungbik BAWIPA in ka hnenah a sim:

³⁵“Elam ram a caktertu conkiang saithiam pawl kha ka that ṭheh ding.

³⁶Hmunkip ihsin Elam parah thlipi ka hranter ding ih hmunkip ah a minung pawl cu ka ṭhekdarh ṭheh ding. A minung raltlan pawl an thlen lonak ram pakhat hman a um lo ding.

³⁷Anmah thah a tumtu an ral pawl kha an ṭih ding ih Elam mi thinlung ah ṭihnak ka umter ding. Ka thinheng in Elam mipawl cu ka siatsuah ding ih an ci ka mitter lai hlanlo anmah dotu ah ralkap ka thlah ding.

³⁸An siangpahrang pawl le an hotu pawl ka hloralter ding ih an rak tonak hmunah ka siangpahrang tokham ka ret ding.

³⁹Asinain netalam ahcun Elam mipawl cu mineinung ka siter sal ding. Keimah BAWIPA in ka sim zo,” tiah a ti.