Read Falam Chin JEREMIAH 5 Bible Online

JEREMIAH 5 - Falam Chin bible

JEREMIAH 5

¹Maw Jerusalem mi pawl, Nan khawsung lamzin tluanah hin tlan vivo uhla, Khuadang tang in zoh hnik uh. Dawr tuahnak hmun pawl tiangin hawl hnik uh! Dingthluk lairelnak a hawltu le thil dik a tuahtu, Mi pakhat tal nan tong pei maw? Nan hmu asile Jerusalem cu BAWIPA in a ngaithiam ding.

²BAWIPA ih hmin saal in thu nan kam-aw naón nan ṭong vek cun nan tum ngai lo.

³BAWIPA ih hawlmi cu thudik a si. A lo vuak naón zianghman nan poisa lo. A lo palcih naón zianghman nan thlun duh cuang lo. Mi lungruh nan si ih nan sualnak ihsin nan kir duh lo.

⁴Cule ka thinlung in, “Himi pawl cu mi farah le mi lungmol, thu thei lo pawl an si! An Pathian ih daan an thei lo, A duhmi khal an tuah thei lo.

⁵Thuneitu upa hnenah ka feh pei ih thu ka sim ding; Annih cun an Pathian daan an thei ih, an BAWIPA ih dingnak khal an thei ko a si,” tiah ka ruat. Asinain an zatein BAWIPA ih thuneihnak cu an el ih, a thupekmi an thlun duh lo.

⁶Curuangah tupi sungih kiosa in a deh hai ding; Nelrawn ih cinghnia in a bohthlek ṭheh hai ding. Tlavang pawl khal an khawsungah an vak ciamco ding; Khawlengih an suah tikah sahrang in a bohthlek ṭheh hai ding. Ziangahtile an sualnak a tamtuk ih, atu le atu an Pathian an dungtun a si.

⁷BAWIPA in, “Ziangah so ka minung pawl ih sualnak cu ka ngaithiam ding? Ka hnen ihsin an tlan ih Pathian ngaingai a si lomi khawzing pawl an biak. An pum puar zetin ka cawm hai; Asinain nupa sualnak an tuah ih, An caan cu hlawhhlang pawl hnenah an hmang.

⁸Anmah pawl cu cawm thau zetmi rang cang hur an bang; An innhnen pa ih nupi sualpi ding lawng an hiar.

⁹Hi vek thilsual an tuah ruangah hin, ka hrem lo ding maw? Hi bangtuk miphun parah hin zoso phuhlam loin a um thei ding?

¹⁰Ka minung pawl ih sabit hri sattan dingah an ral pawl ka thlah ding. Asinain a cem ṭheh hlan lo siatsuahtu an si lo ding. A hnge sattan dingah ka sim ding, Ziangahtile a hnge pawl cu ka ta an si lo.

¹¹Judah mi le Israel mi pawl in in phiar zo; Keimah BAWIPA in ka sim zo,” a ti.

¹²BAWIPA cu a minung pawl in zianghman ah an siar lo ih, “Zianghman a tuah zik lo; vansiat malmaknak khal kan tong lo ding; Raldonak le paamnak khal kan tuar lo ding,” an ti.

¹³Cule, “Profet pawl cu zianghman an si lo, thli vek lawng an si; BAWIPA hnen ihsin a rami thusim ding zianghman an nei lo,” tiah an ti. Cungnungbik BAWIPA Pathian in, “Jeremiah, ka minung pawl in hi bangtuk ih an ṭong ruangah na kaa sungih ka retmi ka thu cu meisa bangtuk ka siter ding. Hi minung pawl cu zanthing vek an si ding ih meisa in a kaang ṭheh hai ding,” a ti.

¹⁵Maw Israel mi pawl, ram hlapi ihsin miphun phunkhat nanmah do dingah BAWIPA in a rak hruai a si. Miphun hlun le miphun cakzet a si ih an ṭong nan theih lomi le an aan khal nan cin lomi an si.

¹⁶An conkiang ralkap pawl cu mi cakzetzet an si ih zaangfahnak zianghman nei loin mi an that.

¹⁷Nan lo rawl siseh, nan inn rawl siseh, an ei ṭheh ding ih nan fanu le fapa pawl tla an that ṭheh ding. Nan tuurual le nan cawrual pawl khal an that ṭheh hai ding ih nan sabit hri le nan theipi kung tla an hau ṭheh ding. Nan rinsan zetmi, ralhruang in kulhmi khawpi pawl cu an ralkap in an siatter ṭheh ding.

¹⁸BAWIPA in, “Cubangtuk tiang a thlen khalle ka minung pawl cu ka siatsuah ṭheh lo ding.

¹⁹Hi bangtuk in ziangah so kan parah thil na tuah? ti ih in sut tikah, Jeremiah ṭhatein sim aw: Keimah in tlansan ih an ram sungah hin miphun dang ih khawzing an biak ih an rian ruangah an ram a si lomi ah, miphun dang riantu ah an cang ding a si,” a ti.

²⁰BAWIPA in Jeremiah hnenah, “Jakob tesinfa pawl le Judah mi pawl hiti in sim aw.

²¹Ṭhatein ngai uh, nannih mi aa le mi lungmal pawl, mit nei na ih zianghman hmu thei lo pawl, hna nei na ih zianghman thei thei lo pawl,

²²Keimah hi BAWIPA cu ka si. Ziangah so in ṭihzah lo? Ka hmaiah ziangah so nan khur rero lo? Tifinriat kapvel ah vunnel a rettu, tidai in ziangtik hmanih lansuak thei lo dingih a rettu ka si. Tisuar cu suk le so ah a seep ding. Asinain a kap ih vunnel lengah a lan thei lo ding. Tilet khal a tho ding, asinain a pahsuak thei dah lo ding.

²³Sikhalsehla nannih pawl hi cu thinlung ruh le dodalnak thinlung lawng nan nei a si. In dungtun ih in tlansan zo.

²⁴Fur ruah le ṭhal ruah ka surter ih kumtin rawl laknak tikcu ka lo pek naón upatnak pek ding hmanah in ruat dah lo.

²⁵Nan sualnak in nan hrangih thil ṭha ding hman hi a tisual ṭheh a si.

²⁶“Ka minung lakah mi ṭha lo pawl an um. Mi in vate awk dingah thang an kam ih an bawh vekin annih in minung awknak ah thang thawn mi an bawh. Mi awk dingah thang an kam.

²⁷Mihrio pa in a inn ah vate a khahter vekin mi sual pawl in an inn sungah mi an rammi thil in an inn an khatter. Curuangah a si milian le thunei zetih an can cu!

²⁸Curuangah a si neinungzet le pumpuar in an um ih an thaunak cu! An thilsual tuahmi cu cem ni a nei lo. Nu le pa nei lo ngakṭah farah hnenah an covo an pe dah lo; namnuaimi parah dingthluk lairelnak thawn an nung dah lo.

²⁹“Sikhalsehla hi bangtuk thil an tuah ruangah keimah BAWIPA in ka hrem hai ding. Hi miphun parah phu ka la ding.

³⁰Hiram ah mangbang ṭihnungza le rapthlakza thil an tuah:

³¹Profet pawl in thuphan an sim; profet pawl ih thupek vekin puithiam pawl in mi an uk ih ka minung zohman in an el lo. A netnak tikcu a thlen tikah ziangtinso an um leh ding?” tiah a ti.