Read Falam Chin JEREMIAH 52 Bible Online

JEREMIAH 52 - Falam Chin bible

JEREMIAH 52

¹Zedekiah cu Judah siangpahrang a ṭuan tikah kum kul hluankhat a si ih Jerusalem ihsin kum hleikhat a uk. A nu ih hmin cu Hamutal a si ih Libnah khua ih ummi Jeremiah ih fanu a si.

²Siangpahrang Jehoiakim vek thotho in siangpahrang Zedekiah khal BAWIPA ih parah a sual.

³BAWIPA cu Jerusalem mi le Judah mipawl parah a thin a heng ngaingai ih a mit hmuhlonak hmunah a dawihlo hai a si. Babilon siangpahrang Nebuchadnezzar do duh ah Zedekiah cu ral a tho.

⁴Nebuchadnezzar cu a ralkap thawn a feh ih Zedekiah siangpahrang a ṭuannak kum kua kum, thla hra thla, ni hra ni ah Jerusalem a do. Khawpi lengah riahbuk an sak ih khawpi phardawl leng ihsin a kimvel in leilung an dawl ih,

⁵Zedekiah siangpahrang a ṭuannak kum hleikhat kum tiang an kulh.

⁶Cuih kum hleikhat kum, thla li thla, ni kua ni ah paam a nasat tuk ruangah khawsung mipawl zianghman ei ding an nei nawn lo.

⁷Cule khawkulh phardawl cu an balcim ih Babilon ralkap pawl in Jerusalem khawpi cu an kulh ṭhepṭhep naón Judah ralkap pawl cu zan khawthim ah an rak tlanhlo ṭheh. Siangpahrang hmuan lakin an feh ih phar pahnih a pehtu kotka zin in an feh ih Jordan phairawn lam ah an tlan.

⁸Asinain Babilon ralkap pawl in siangpahrang Zedekiah cu an dawi ih Jerikho khua kiang hmunrawn ah an kai ngah; a ralkap pawl in an tlansan ṭheh.

⁹Cule Zedekiah cu siangpahrang Nebuchadnezzar hnenah an fehpi. Culai ah Nebuchadnezzar cu Hamath ram Riblah khua ah a um ih cutawkah Zedekiah ih thu cu a relsak.

¹⁰Nebuchadnezzar in Riblah ahcun Zedekiah ih fapa pakhat cu a pa ih mithmuh rori ah a that; Judah ram bawi dangdang khal a that.

¹¹Cuih hnuah Zedekiah ih mit a phorh ih thir cikcin in a khih ih Babilon ah a kuat. Babilon ah Zedekiah cu a thih ni tiangin thawng sungah a um.

¹²Nebuchadnezzar ih Babilon siangpahrang a ṭuannak kum hleikua kum, thla nga thla, ni hra ni ah, siangpahrang hnenih ruahnak petu le a ralkap hotu ralbawi Nebuzaradan cu Jerusalem khua sungah a lut ih,

¹³Biakinn le siangpahrang inn le Jerusalem khawsung ih bawi upa pawl ih inn hmuahhmuah meisa in a ur ṭheh.

¹⁴A ralkap pawl in khawpi kulhnak phardawl pawl an rak bal ṭheh.

¹⁵Cule Nebuzaradan in Jerusalem ih a taangmi minung pawl, zungthiam pawl le Babilon ralkap pawl hnenih a relhtu pawl hmuahhmuah cu Babilon ah a fehpi ṭheh.

¹⁶Cule Judah ram ahcun mi farah bik pawl le thilri zianghman a nei lo pawl kha a taan ih lo hnaṭuantu dingah le sabit hmuan thlotu dingah a ret a si.

¹⁷Babilon mi pawl in Biakinn sungih a ummi dar ih tuahmi ṭhuam pawl le leng pawl an denkuai ṭheh ih dar tikuang tumpi khal an siat ṭheh. A dang dar ih tuahmi thilri hmuahhmuah cu Babilon ah an phur ṭheh.

¹⁸Cule sawhleek pawl le biakṭheng thianfai tikih hmanmi vutcam khawlnak kheng pawl, meisa vanmi mei-inn ih thuam pawl, thawinak pek tikih sathi donnak maihum pawl, rimhmui ur tikih hmanmi khengkuum pawl le Biakinn sungih hmanmi dar thilthuam hmuahhmuah an lak ṭheh.

¹⁹Ngun le sui ih tuahmi thilri hmuahhmuah khal an lak ṭheh; pakan kuum pawl, meivam laknak kheng pawl, raithawi tikih sathi khawlnak maihum pawl, vutcam retnak kheng pawl, mei-inn ṭhuam pawl, rimhmui urnak kheng pawl le sabitti thawinak pek tikih sabitti thletnak maihum pawl khal an lak ṭheh a si.

²⁰Siangpahrang Solomon in dar ih a tuahmi thilri pawl: ṭhuam pahnih, leng pawl, tikuang tumpi le tikuang dotu cawcang hleihnih pawl cu cuai ih thlai theih lo ding in an rit.

²¹Ṭhuam pahnih cu an bang aw; pakhat cu pi kul hluansarih a sang ih pi hleiriat a tum; a sung a kua ih a thir cu pi thum a sah. Ṭhuam ziik ah dar ih tuahmi lubo a um ih pi sarih le a hrek a sang; a kimvel ah taleti rah cuang in mawiternak sermi a um ih a zatein dar ih tuah ṭhehmi an si.

²³Cutiih mawiternak sermi taleti rah cu ṭhuam lu pakhat ah zakhat a um ih cuih sungah sawmkua le paruk cu leilung ihsin hmuh thei an si.

²⁴Cuih tlunah Babilon ralkap hotu ralbawi Nebuzaradan in Puithiam Sang Seraiah le puithiam sang sangtu puithiam Zefaniah le Biakinn ih bawi tumpipi pathum kha thawng thlak dingah a hruaihlo.

²⁵Khawpi sungih ralkap pawl hotu ralbawi pakhat, khawpi sungih a taang hrihmi siangpahrang ruahnak petu sungin minung pasarih, ralkap zung ih cazin kaitu le ralbawi sangtu pakhat le mi upa deuhdeuh minung sawmruk tla a fehpi a si.

²⁶Nebuzaradan in Hamath ram, Riblah khua ih a rak ummi,

²⁷Babilon siangpahrang hnenah a hruai. Cutawkah Babilon siangpahrang in a thawiter ih a thahter hai. Cuticun Judah mi pawl cu an ram ihsin saltaannak ram ah hruaihlo an si.

²⁸Nebuchadnezzar in sal dingih a hruaihlo mi minung cazin cu a thuailam vekin a si: Siangpahrang a ṭuannak kum sarih kum ah minung thawng thum le kul hluan thum;

²⁹A kum hleiriat kum ah Jerusalem ihsin minung zariat le sawmthum le pahnih;

³⁰Kum kul hluanthum kum ah minung za sarih le sawmli le panga; an zate in minung thawngli le zaruk Nebuchadnezzar in a hruaihlo a si.

³¹Evilmerodak cu Babilon siangpahrang a can kum ah Judah siangpahrang Jehoiakhin parih zaangfahnak a neih ruangah thawng inn ihsin a suah. Cutiih a suah cu Jehoiakhin thawng thlak dingih an hruaihlo hnu kum sawm thum le kum sarih kum, thla hlei hnih thla, ni kul hluannga ni ah a si.

³²Evilmerodak in Jehoiakhin cu ṭhatein a zoh ih Babilon ih thawng a tla vemi siangpahrang dangdang hnenih upatnak a pekmi hnakin tam sawn in upatnak a pek a si.

³³Cuti cun Jehoiakhin cu a zoh ṭha ih a thawng tlaknak hnipuan a thleng awkter ih a nunsung hmuahhmuah siangpahrang cabuai ah rawl a eiter.

³⁴A nun sung nitinte a ṭulmi leinak ih hman dingah Babilon siangpahrang in Jehoiakhin cu tangka a pek ringring.