Read Falam Chin JEREMIAH 8 Bible Online

JEREMIAH 8 - Falam Chin bible

JEREMIAH 8

¹Cuih caanah cun siangpahrang pawl le Judah ram bawi pawl le puithiam le profet pawl le, Jerusalem ih a ummi misenpi pawl ih ruh hmuahhmuah cu an thlaan sung ihsin phorh ṭheh an si pei.

²Hmunkhat ah ṭhatein khawm tahratih phum si loin an ruh pawl cu leilung parah eekdawm bangin ṭhekdarh an si ding. Himi pawl in an sunsakmi le an rianmi, thu an ronmi le an biakmi ni le thlapi le arsi hmaiah pho le darh ṭheh an si ding.

³Hi miphun sualral sungin a nungsun mi malte pawl, ka ṭhekdarhnak hmunih khua a saktu pawl cun nun hnakin thih an duh sawn ding. Cungnungbik Keimah BAWIPA in ka sim zo a si,” tiah a ti.

⁴BAWIPA in a minung pawl hnenah hiti in thusim i fial. “Mi pakhatkhat a bah pang tikah a tho saal lo maw? Mi pakhat in zinpeng a zawh tikah a kir saal lo maw?

⁵Cubangtuk asile, maw ka minung pawl, ziangah so ka hnen ihsin nan tlan hnuah nan kir saal nawn lo? Nan milem lawnglawng nan thihcih ih ka hnenah nan kir duh nawn lo.

⁶Felzet in ka ngai ih zohman thudik simtu nan um lo. Nan sualnak ruangah hin pakhat hman riahsia le ninghang in nan um lo. Zohman in, ‘Ziangvek thilsual so ka tuah?’ a ti-awtu nan um lo. Raldonak rang in raldonak hmunah hmai a nor ciamco bangin nan zatein nanmah ih duhnak lamzin ciarah nan feh vivo.

⁷Van ih vaca hman in kir tikcu a thei ih thuro, peeleeng le ngathur khal in an rak umnak hmun ih kir saal caan an thei. Sikhalsehla ka minung pawl nannih cun ka thupekmi sungih kir saal nan thei lo.

⁸Kan fim ih na daan pawl kan thei a si, tiah ziangtinso nan ti thei? Zohhnik uh, ka daan pawl cu cangantu mi depde pawl in an thleng ṭheh zo!

⁹Nan mifim pawl ningzakin an um; an mang a bang ih an bei a dong zo. Ka thu an hnong ih atu-ah ziang fimnak so an neih nawn?

¹⁰Curuangah an lo pawl cu mi dang ka pek ding ih an nupi pawl cu midang ṭaang ka thlenter ding. An zatein a tum a seen in a dik loin tangka miatnak an hawl. Profet le puithiam pawl hman in misenpi an bum.

¹¹Ka minung pawl ih hmapi cu a vun hiik men ah an ruat. ‘A ṭha ṭheh ko, a ṭha ṭheh ko,’ an ti; zianghman a ṭha ṭheh ngai fawn lo!

¹²Maw ka minung pawl, hi bangtuk ningsinza thil nan tuah ruangah hin nan ning teh a zak maw? A zak lo! Ningzak hna khal nan thiam lo; nan mithmai hman a sen lo! Curuangah midang an tluk bangin nannih khal nan tlu ding. Ka lo hrem tikah cun nan cem ding. Keimah BAWIPA in ka ṭong zo.

¹³“Lo rawl an khawm vekin ka minung pawl ka khawm duh. Sikhalsehla annih cu rah nei lo sabit hri vek an si; rah nei lo theipi kung vek an si; an hnah hman a vuai ṭheh zo. Curuangah hi ram cu miphun dangih co dingah thu ka pek zo,” tiah a ti.

¹⁴Pathian ih minung pawl cun, “Ziangah so kan to ringring lai? Tho uh, ralhruang ih kulhmi khawsungah kan tlan pei ih cunah kan thi pei. BAWIPA kan Pathian in thi dingah in hlon zo; BAWIPA in thihsii in dingah in pek zo. Ziangahtile a parah thilsual kan tuah a si.

¹⁵Hnangamnak kan ruahsan ih damnak tikcu kan beisei naón zianghman a ṭhahnem lo; ṭihphannak sawn kan hnenah a thleng.

¹⁶Kan ral pawl Dan khua ah an lut zo. An rang hnarphiit thawm kan thei. An rangcang pawl an ai tikah kan ram pumpi in a hnin ṭheh a si. Kan ral pawl cu kan ram, kan minung, kan khua le a sung um thil hmuahhmuah siatsuah dingah an ra zo a si,” tiah an ti.

¹⁷BAWIPA in, “Ralringte in zoh uh! Nan lakah rul ka thlah ding; ziangvek rul ai nei hman in an ngamter thei lo dingmi tur neimi ka thlah ding ih a lo cuk ding a si,” a ti.

¹⁸Ka lungawinak a cem, riahsiatnak in ka khat; Ka thinlung mu a na.

¹⁹Ngaihnik uh! Hi ram khuazakip ah, ka minung pawl ih ṭah-ainak ka thei; “Zion ah BAWIPA a um nawn lo maw si? Cutawkah Zion siangpahrang a um nawn lo maw si?” tiah an ai. BAWIPA an Siangpahrang cun, “Ziangah so milem nan biaknak le, Santlai lo ramdang khawzing pawl hmaiah nan lu nan kuun ih ka thin in hengter?” tiin a let.

²⁰Cutikah mipi in, “ṭhal a liam ih rawl lak tikcu a reh zo; Sikhalsehla rundam kan si hrih lo,” tiah an au.

²¹Ka minung pawl an thin a nat ruangah kei khal ka thin a na. Mithi ngai in ka ṭap; Ruahsannak zianghman ka nei nawn lo.

²²Gilead[3] ah damnak sii a um lo maw? Cutawkah sibawi an um lo maw? Ziangah so ka minung pawl in damnak an ngah lo?