Read Falam Chin ṬAHHLA 2 Bible Online

ṬAHHLA 2 - Falam Chin bible

ṬAHHLA 2

¹BAWIPA in Zion cu thimnak in a khuh; BAWIPA a thin a heng ruangah. Israel ih sunlawinak cu, Van ihsin lei ah a run thlak; A Biakinn pi hman a dungtun, A thinheng ni ahcun.

²Judah ram khawte hmuahhmuah a siatsuah ṭheh, Zawnruahnak zianghman um loin. An ralhruang pawl a balsak ṭheh, An ram hum in an ṭannak ruhkulh pawl cu. Ningzah mualphonak a thlenter, An uknak le uktu pawl parah cun.

³Israel cahnak a sattan ṭheh, A thin-ai a thawh tikah cun. A pharh cia a baan a zuuk sal, Ral pawl ih in ra do tikah cun. Meisa alh bangin kan parah a hlio ciamco, Ziang hmuahhmuah a siatsuah ṭheh.

⁴A conkiang in kanmah in bat, Ral pawl ih in bah vekin. Amah in a that ṭheh hai, Kan hmai in hngaltertu hmuahhmuah cu. Hi Jerusalem khawpi sungah hin, A thinhengnak mei alh bangin kan tuar.

⁵BAWIPA in Israel a tisiat ṭheh zo, An do ral lian bangin. Hnawmpen ah a cangter ṭheh zo, An ruhkulh le an siangpahrang inn pawl cu. Cem neilo riahsiatnak a thlenter zo, Judah misenpi parah cun.

⁶Sop seksek in a deengkuai theh, Amah kan biaknak Biakinn pi cu. Kan ulhmi ni pawl a cemter, Sabbath ni le ni thianghlim pawl cu. Siangpahrang le puithiam pawl khal in an tuar, Tuar harzetmi a thinhennak cu.

⁷BAWIPA in a biakṭheng a hnong zo, A Biakinn thianghlim hman a tlansan. Ral pawl a balsiatter ṭheh, Biakinn phar pawl cu. An ral nehnak an aupi ciamco, Lungawi in Pathian kan rak biaknak hmun ahcun.

⁸BAWIPA in siatter dingah a tum hrimhrim, Zion kulhnak phar pawl cu. A hlan in a rak tah cia ṭheh zo, Siat ṭheh dingah a ui hrimhrim lo. Hmunkhatah hnawmpen ah an cang ṭheh zo; Donhleisang inn pawl le a phar pawl cu.

⁹A kotka pawl hnawmpen sungah an pil ṭheh; A kothrolh pawl tla an kiak ṭheh. Salkaihmi thawng thlaknak ah an thleng ṭheh, Siangpahrang le bawi upa pawl cu. Daan cu zohman in an zirh nawn lo; BAWIPA hnen in langnak an ngah nawn lo, profet pawl cun.

¹⁰Jerusalem patar pawl cu, Leilung ah dai zirziar in an to. An lu ah vutcam an phulh aw, An ruangpi ah buri puan an khuh aw. Jerusalem fala pawl cu, Lei dai in an lu an kun.

¹¹Ka ṭahnak ah ka mit a kham ṭheh, Ka donhar ah ka thin a pit ṭheh; Ka riahsia in ka tha a celh ṭheh, Ka minung pawl vanduainak an ton ruangah. Nauhak le naute pawl khawpi lamzin ih an sawn an rilh ruangah.

¹²Tihal le rilrawng in, An nu le pawl an ṭah. Lamzin parah cun an ril, Ral hmapu bangin. Nuamtete in an nunnak a cem, An nule pawl ih ṭaang parah cun.

¹³Maw duhnungza Jerusalem, Ziang so ka ṭong nawn ding? Ziangtizawng in so ka lo hneem thei ding? Nang vekih a tuartu hi an um keel lo. Na hma hi tipithuanthum tluk in a thuk; Zoso a lo damter thei ding?

¹⁴Na profet pawl in lo sim ding an nei lo, thuphanper dah ti lo cu! An thusimmi in an lo bum, Na sualnak an phuang dah fawn si lo! Thudik lo an lo sim ruangah, Sirawknak ṭul lo ah na ruat-aw.

¹⁵Na kiangih a fehtu pawl in, Hmuhsuam nautatnak thawn an lo zoh. An lu an thing ih an lo hnihsan, Jerusalem siatralnak cu. “Hihi maw khawpi mawi bik an timi cu? Leilung pumpi ih hmaihngalpimi cu hihi maw a si?” an ti.

¹⁶Na ral pawl in an lo nautat, Huatnak mit thawn an lo zoh. An hmur ciip in an lo hnihsan, “Kan siatsuah ṭheh zo, Kan hngakhlapmi ni cu hihi a si,” an ti.

¹⁷BAWIPA in a tisuak ngaingai zo, Ka tuah ding a rak ti ringring vekin. Zaangfahnak nei loin in tisiat ṭheh zo, Ralrinnak in rak pek cia vekin. Nehnak a pek hai, kan ral pawl hnenah; Lungawinak a pek hai, kan siatral ṭheh ruangah.

¹⁸Maw Jerusalem, BAWIPA hnenah, Nangmah kulhnak phardawl rori hi au hai seh. Na mitthli cu sun zan in, Tiva bangin luang hai seh. Na hrangah colh ni um hlah seh, Na mitthli khal hul ni nei hlah seh.

¹⁹Zanvarte tho cingcing awla, BAWIPA cu ko cingcing aw. BAWIPA ih hmaiah na thinlung natnak cu tidai bangin luangter aw. Na faate pawl hrangah baan pharh in zaangfahnak dil aw; Lamzin kel kipih a thi zikmi na faate pawl, Rawl loih a thi ṭheh zikmi na faate pawl hrangah cun.

²⁰Maw BAWIPA, zohhnik, Na hrem reromi pawl hi zohhnik. Nunau pawl in an faate sa an ei, An duhdawtmi an faate pawl cu! Puithiam le profet pawl an that, Biakinn pi sung rori ahcun.

²¹Mino mitar ti loin an thi, Khawpi lamzin ahcun. Fala le tlangval khal an thi, Ral pawl ih ralnam cun. Zaangfahnak nei loin na that hai, Na thinheng ni ahcun.

²²Ka ral pawl cu khuazakip in na sawm, puai zawh ding bangin. Zohman a luat theitu an um lo, Na thinheng ni ahcun. Ka faate pawl an that ṭheh, Ka duhdawtmi le ka cawmmi pawl cu.