Read Falam Chin ṬAHHLA 4 Bible Online

ṬAHHLA 4 - Falam Chin bible

ṬAHHLA 4

¹A tle zohzo mi kan sui pawl cu An dal ṭheh zo. Biakinn ih lungto pawl cu lamzin ah ṭhekdarh ṭheh an si zo.

²Kan hrangah Zion tlangval pawl cu Sui tlukin an rak sunglawi. Sikhalsehla atu ahcun tlakbeel tluk men ah ruah an si.

³Cinghnia pinu hman in a faate cu ṭhatein zoh a thiam. Asinain ka minung pawl cu nelrawn kalauk vate vek an si; Zaangfahnak zianghman an thiam lo.

⁴Ka minung in an fano an thihter, Rawl lo le ti loin. Nauhak in rawl an dil naón, Zohman in an pe lo.

⁵Lamzin ah rawl loin an thi, Rawl thawbik a rak eitu pawl cu. Hnawmhne hlonnak ah rawl an hawl, Nunnuam zetih rak cawmmi pawl cun.

⁶Ka minung pawl in cawhkuan hremnak an tuar. An tuarnak cu a luar sawn; Milai kut tel loin rin loih a siatmi Sodom khuami pawl hnakin.

⁷Jerusalem lal pawl cu borhhlawh loin vur vekin an thiang; Cawhnawi bangin an raang. An harhdam ih an cakzet; Mepian lungvar bangin an mawi ih an naal zenzen.

⁸Atu ahcun lamzin ah an thi, Rapṭing hnakin an dum sawn; Zohman in an thei thiam nawn lo. An vun cu an ruh ah a erh aw ṭheh, Thingro vekin an caar.

⁹Ral kut in a thimi kha an van nei sawn; Neta ih a thimi pawl hnak cun. Ei ding zianghman nei loin, Rawl loih nuamte ih thih cu a har sawn.

¹⁰Tuksumza ngaingai a si, Ka minung hnenih a thlengmi vanduainak cu; Lainatu nule pawl in rawl ai ah an suan hai, An sungsuak an faate pawl cu.

¹¹BAWIPA in a ai thawhnak cu, Meivam bangin a run burh. Zion ah meisa a alhter ih, A hramṭohnak tiang ciam ṭheh ko in a kang.

¹²Zohman in an zum thei lo, Ramdang uktu bawi khal in an zum thei lo; Jerusalem khawpi sung luh thei ding cu; Jerusalem kotka sungih ral pawl luh thei ding cu.

¹³Asinain an lut thei, A profet le a puithiam pawl an sual ruangah. A profet le a puithiam pawl in thil poimawh an tuah, Mawh nei lomi ih thisen an luanter ruangah.

¹⁴An hotu pawl cu an vakvai, Lamzin tluan ah mitcaw bangin. Thisen an hnih awknak a luar tuk, Zohman ih tham ṭha lo an si.

¹⁵Misenpi pawl in, “Tlan uh, Mi borhhlawh nan si, In dai hlah uh,” an ti. Curuangah ram kip ah an vakvai, Khui hmanah tlun inn an tong lo; “Hinah nan um thei lo” an ti.

¹⁶BAWIPA in an hrangah helhkamnak zianghman a nei lo; A ṭhekdarh sawn hai a si. Kan puithiam le kan upa pawl cu Zianghman ah a siar lo.

¹⁷Bomnak a ra hmang ding ti zoh na ah kan mit a kham ṭheh; Bomnak cu a ra dah si lo. Bomnak in pe hmang ding tiah kan hngak rero naón, Khui ram hman in bomnak in pe thei lo.

¹⁸Kan ral pawl in in thlingthla, Kan dung in in thlun ringring; Lamzin hmanah kan vak ngam lo. Tikcu le caan kan nei nawn lo, Kan cem netnak ni a thleng zo a si.

¹⁹Van ih khaupi hnakin, Zamrang sawn in kan ral in in dawi. Tlangpar ah in dawi ih, Nelrawn ah rinlopi in in man.

²⁰Kan nunnak hrampi an kai ngah, BAWIPA ih hriakculhmi kan rinsan bikmi cu. In dotu pawl kut ihsin in hum ding; A thla thuai ah kan um ding, kan timi cu.

²¹Hni rero uh, Edom le Uz mipawl, Nan lung awi ko uh, tikcu nan neih sungah cun. Nan siatralnak tikcu a ra thleng ve ko ding; Taklawng le ningzak in nan sawn nan ril rero ve ko ding.

²²Zion in a sualman cu a kuan ṭheh zo; BAWIPA in saltaannak ah in re nawn lo ding. Sikhalsehla Edom, nang cu BAWIPA in a lo hrem ding; Na mawhnak hmuahhmuah a langter ṭheh ding.