Read Falam Chin ṬAHHLA 5 Bible Online

ṬAHHLA 5 - Falam Chin bible

ṬAHHLA 5

¹Maw BAWIPA, kan parih a thleng mi hi in theihsak hram aw. In run zoh awla kan ningzahnak hi in run hmuhsak hram aw.

²Kan ram le kan ro neihmi pawl cu Kan theih dah lomi pawl ih kut sung an thleng. Kan inn pawl cu ramdangmi pawl ih ta ah an cang.

³Kan pale pawl ral kut in an thi, Ngakṭah farah ah kan cang. Kan nule pawl nuhmei ah an cang.

⁴Kan inmi tidai kan lei a ṭul; Kan tihmi zanthing khal a man kan pek a ṭul.

⁵Kan hngawng ah hngawngkol in thlaih; Ramsa bangin cat lo ih dawimi kan si. Kan bang nasa zet naón colh ni kan nei lo.

⁶Rawl khopkham ih ngah duh ah, Izipt ram le Assiria ram ah rawl dil ah kan feh.

⁷Kan pupa pawl cu an sual ih an um nawn lo; Asinain an sual man cu kannih in kan tuar.

⁸Sal hnakin a ṭha cuang lomi pawl, Kan tlun ah lal an cang. An kut sung ihsin in suah theitu Zohman an um fawn lo.

⁹Mi thah hmang pawl hramlak ah an vak rero; Thih ṭih cingin nun duh ah rawl kan hawl.

¹⁰Kan rilrawnnak in kan taksa a satter thluh; Kan vun cu lungthu bangin a ling.

¹¹Kan nupi pawl an kaihrem, Zion tlang rori ahcun. Judah khawte kipah kan fanu pawl Sualpinak an tuar.

¹²In hotu pawl an hruai ih, An hngawng in an awk that. Kan patar pawl khal zianghman hmaizahnak an pe lo.

¹³Kan tlangval pawl sal bangin Fang an rialter; Kan nauhak tualleng pawl cu an sawn rero, An phurhmi zanthing a rit tuk ruangah.

¹⁴Kan patar pawl in an tlansan zo, An to ṭheunak khawpi kotka cu. Tlangval khal in an tlansan zo, An tum ṭheumi ṭingṭang pawl cu.

¹⁵Kan nunnak sung ihsin Lungawinak a suakhlo zo. Kan nomnak le kan laamnak cu, Riahsiatnak in a airawl zo.

¹⁶Kan suilukhuh kan lu ihsin a tla zo. Kan sual zo ih kan lamzin a pit a si.

¹⁷Hi ruangah kan thin a na, Kan thin muril tiangin a na. Hi bangtuk ruangah hin Kan mit a mal thlang a si.

¹⁸Ziangahtile Zion tlang cu a ṭhing, ṭio sanmi hmun a si; Hramlak ih cinghnia pawl an vak, Siatbalmi khawrop ahcun.

¹⁹Asinain, maw BAWIPA, nang cu Kumkhua in uktu bawi na si. Na bawi tokham cu san ih-khuk in a hmun ringring ding a si.

²⁰Ziangah so atu tiang, In dungtun ringring hrih? Ziangtik talah in thei sal nawn pei maw?

²¹Na hnenah in kirter hram aw, Maw BAWIPA, in kirter hram aw. Khuahlan kan rak sunlawinak pawl cu In pe kir sal hram aw.

²²Culole kannih hi kumkhua in maw in hnong ding? Kan parih na thinhengnak hi Cem ni a nei lo ding maw si?