Read Falam Chin EZEKIEL 1 Bible Online

EZEKIEL 1 - Falam Chin bible

EZEKIEL 1

¹Kum sawmthum kum, thlali thla, ni nga ni ah, keimah puithiam Ezekiel, Buzi ih fapa cu Babilon ram Khebar Tivapi kiangah sal ih kaihmi Judah mipawl thawn kan um. Van a ong aw ih Pathian langnak ka hmu.

²Cuih kum cu siangpahrang Jehoiakhin sal ih an kaihnak kum nganak kum a si.

³Cuih Babilon ram Khebar Tivapi kiangah cun ka hnenah BAWIPA ih ṭongmi ka thei ih a huham cahzia khal ka thei.

⁴Ka hun zoh ih saklam ihsin thlipi huuk a run kha ka hmu. Khawdur sahzet sungin nimthla a kau zohzo ih a kiangkap cu a vaang zukzo. Nimthla a kaunak zawn ahcun dar bangin a tleumi ka hmu.

⁵Thlipi laifangah a nungmi ramsa bangtuk milai hmuihmel kengmi pali ka hmu;

⁶asinain hmai pali le thla pali an nei fingfing.

⁷An ke pawl cu an ding zerzer ih an tin pawl cu cawcang tin bangtuk an si; tleuzet ih hnawtmi dar vek an si.

⁸Hmai pali le thla pali an nei fingfing ih tlunah an thla pakhat hnuai ah milai kut pakhat an nei fingfing; cutin pakhat in kut pali ciar an nei.

⁹Cuih ramsa nung pakhat in an thla pahnih ciar an pharh ih kil li nei, tung le vang can-aw in an um ih an thlazim cu an dai aw ṭheh. An ṭhawn tikah an taksa her aw lotein a burpi in an ṭhawn.

¹⁰Ramsa nung pakhat in hmai phun dangdang pali fingfing a nei. Hmailamah milai hmai a nei; vorhlam ah kiosa hmai a nei; kehlam ahcun cawcang hmai a nei ih dunglamah muvanlai hmai a nei.

¹¹Ramsa nung pakhat in an thla pahnih fingfing an pharh ih cuticun ramsa dangih thlazim kha an dai fingfing. An thla pahnih cu pharh loin an taksa parah an khup fingfing.

¹²Ramsa nung pakhat in kap li fingfing an hoi ih cuticun an taksa her ṭul loin an duhnakah a burpi in an feh thei a si.

¹³Cuih ramsa nung pawl lakah cun meisa vaampi vekih a tleu zohzo mi a um ih amah cu catbaang loin a ṭhawn aw rero. Cuih meisa vaampi sung ihsin nimthlakau vekih a tleu zohzo mi a suak.

¹⁴Cuih ramsa pawl cu nimthlakau tlukih cak in dung le hmaiah an pet rero.

¹⁵Cuih ramsa pali cu ka zoh rero laiah ramsa pakhat kiangah lengke pakhat fingfing, lengke pali leilung dai in ka hmu.

¹⁶Cuih lengke pali cu an bangrep; lungmankhung bangin an tleu fingfing; cuih lengke sungah lengke dang pakhat dingzet in a tan zawng in a vunglutmi a um fingfing;

¹⁷cuticun lengke cu an duhnakah an her-aw thei.

¹⁸Leengke pawl ih tlangkap cu an saangzet ih an makzet; mit hlir in an khat.

¹⁹Ramsa nung pawl an ṭhawn tikah lengke pawl khal an ṭhawn ve; leilung ihsin tlunlam ih an kaiso tik khalah lengke pawl khal an so ve a si.

²⁰Ramsa nung pawl cu an duhnak kipah an feh; cuvek cekci in lengke pawl khal an feh ve; ziangahtile ramsa pawl in an uk a si.

²¹Curuangah ramsa nung pawl an feh ah siseh, an din ah siseh, a si lole thli lakih an kai ah siseh, lengke pawl khal cun an tuah ṭheh ve a si.

²²Cule ramsa pawl ih lu tlunah cun mangbangza in a vaarmi tlunkhuh-kuum a um.

²³Cumi hnuai ahcun ramsa nung pawl cu an ding. An thla pahnih cu an rualpi ramsa lamah an pharh ih a dang thla pahnih in an taksa an khuh fingfing.

²⁴An thla khawn thawng ka thei ih tipi huuk thawm bangtuk a si. Ralkap siarcawklo ih thawmvang bangtuk a si; Cungnungbik Pathian aw bangtuk a si. An zam lo tikah cun an thla an khup.

²⁵Asinain a lu tlunih a ummi tlunkhuh-kuum ihsin thawmvang cu a ra thang thotho.

²⁶Cuih tlunkhuh-kuum tlunah cun lungmankhung tleu ih tuahmi siangpahrang tokham bangtuk a um. Cuih tokham parih totu cu minung pianhmang a keng.

²⁷Cuih pianhmang cu meisa sungih a tleumi dar vaam bangtuk a si. A kiangkap hmuahhmuah cu vaangzet in a tleu.

²⁸Vaangro bangtuk in pianzia phunkim a nei. Hi tleunak cu BAWIPA ih umnak langtertu a si.