Read Falam Chin EZEKIEL 10 Bible Online

EZEKIEL 10 - Falam Chin bible

EZEKIEL 10

¹Ramsa nung cherubim pawl lu tlunih tlunkhuh-kuum cu ka hun zoh ih a tlunlam ah safaira lungmankhung in tuahmi siangpahrang tokham bangtuk pakhat ka hmu.

²Pathian in puan paate a sintupa hnenah cun, “Ramsa nung cherubim pawl thuai ih a ummi lengke pawl karlak in va feh awla na sumpi khatión meiling keng aw. Cuih meiling cu khawpi parah va ṭhehdarh aw,” tiah a ti. Ka zoh ih a va feh lai kha ka hmu.

³Biakinn sung a vungluh zawng ah cherubim pawl cu Biakinn thlanglam kapah an ding; cule Biakinn sunglam khaan cu mero in a khat.

⁴A tleu zukzomi BAWIPA ih umnak tleu cu cherubim hnenin a hung kai ih Biakinn sangka lamah a ṭhawn. Cutiin Biakinn sung cu mero in a khat ih a tual cu a tleu pempem.

⁵Cherubim pawl ih thla khawn thawm cu a lenglam tual khalin a thang ṭheh. Ziangkimtithei Pathian ih aw vekin a thang.

⁶BAWIPA in puan paate a sintupa cu cherubim pawl hnuai ih a ummi lengke pawl karlakin meisa la dingah thu a pek ih cupa cu a feh ih lengke pakhat kiangah a ding.

⁷Cherubim pawl lakih pakhat in an kiang ih a ummi meisa cu a kutin a hei dawh ih meiling hrekkhat a hei lak ih puan paate sintupa kut sungah a ret. Cupa cun meiling kha a lak ih a suak.

⁸Cuih cherubim pawl cun an thla hnuai ciarah milai kut vek a si mi an neih fingfing kha ka hmu.

⁹Leengke cu an pali in an bangrep ih cherubim kiangah an um fingfing khal kha ka hmu. Leengke pawl cu lungmankhung vekin an tleu zukzo ih lengke pakhat sungah lengke dang pakhat dingzetin a tan zawng in a vunglut mi an nei fingfing.

¹¹Cuih cherubim pawl an ṭhawn tikah her ṭul loin khuitawk lam khalah an ṭhawn thei hluahhlo. An feh duhnak lamah hmunkhatah an feh tlang hluarhlo; dunglam herta ṭul loin an feh tlang thei a si.

¹²An ruang pumpi, an dunglam zaangtluan, an kut pawl, an thla pawl le lengke pawl khal mit hlir in an khat.

¹³Hi lengke pawl cu hmaisabik langnak ih ka rak hmuhmi lengke pawl thawn an bangrep a si.

¹⁴Cherubim pakhat in hmai pali fingfing an nei. Hmaisa bik cu cawcang hmai a si; pahnihnak cu milai hmai a si; pathumnak cu kiosa hmai a si ih palinak cu muvanlai hmai a si.

¹⁵(Hi cherubim pawl cu Khebar Tivapi kiangih ka rak hmuhmi ramsa nung thotho kha an si.) Cherubim pawl cu thli lakah an zamso ih,

¹⁶an ṭhawn tikah lengke pawl khal an feh ve. Zam dingih an thla an pharh tik khalah lengke pawl an tel ve.

¹⁷Cuih cherubim pawl an colh tikah lengke pawl khal an cawl ve; an zam tikah lengke pawl khal an tel ve; ziangahtile cherubim pawl in lengke pawl cu an uk a si.

¹⁸Cule a tleu zukzo mi BAWIPA ih umnak cu Biakinn sangka ihsin a suak ih cherubim pawl ih tlunah a ṭhawn.

¹⁹Ka mit hmuhhngan ahcun an thla pharh tahratin leilung ihsin an hung zam ih lengke pawl khal an tel ve. Biakinn nisuahnak lam kotka ah an cawl ih a tleu zukzomi tleunak cu an tlunah a um.

²⁰Hi cherubim pawl cu Khebar Tivapi ah Israel ih Pathian thuai ih ka rak hmuh zomi ramsa nung pawl an si, ti ka theithiam.

²¹An zatein hmai pali an nei fingfing; thla pali fingfing le an thla hnuai ah milai kut bangtuk pakhat ciar an nei fingfing.

²²An hmai pawl cu Khebar Tivapi ih ka rak hmuhmi ramsa nung pawl hmai vek cekci an si. Cherubim pawl cu hmailamah dingtein an feh fingfing.