Read Falam Chin EZEKIEL 12 Bible Online

EZEKIEL 12 - Falam Chin bible

EZEKIEL 12

¹BAWIPA in ka hnenah,

²“Milaipa, raltho duh minung pawl lakah na um. Mit an nei naón zianghman an hmu lo; hna an nei naón zianghman an thei lo; ziangahtile raltho pawl an si.

³“Curuangah, milaipa, raltlanmi pakhat vekin na puan zual awla khua a thim hlanah feh aw. Na suak ih hmun dangih na feh kha mi hmuahhmuah in lo hmu ṭheh hai seh. Hi raltho pawl hin an lo hmu ngah ih raltho pawl an si kha an theih theinak tla a si pangah!

⁴Khawvang laiah hin na puan tom awla an lo hmu ding ih zanlam ah saltaang vekih na feh kha lo zoh hai seh.

⁵An lo zoh laiah, na inn pharah ong pakhat bauh awla cuih ong ihsin na thil tom kha suah aw.

⁶Na liangah na thil tom pu tahratin na mit hup ih khuilamah ka feh ti hman thei loin khawthim lakih feh vekin na feh kha lo zoh hai seh. Cuti ih na tuahmi kha Israel mi pawl hrangah ralrin peknak a si ding,” tiah a ti.

⁷Cule BAWIPA ih i simmi vek cun ka tuah ṭheh. Cuih ni ahcun raltlan bangin ka puan ka tom ih zanlam khawthim zawng ah ka inn phar cu ka kut in ka bauh ih cuih ong cun ka suak. Mizapi hmuhhngan ah ka puantom cu ka liang in ka pu ih ka feh.

⁸A thaizing ah BAWIPA in,

⁹“Milaipa, na thil tuahmi thu cu Israel mi raltho pawl in an lo sut asile,

¹⁰Cungnungbik BAWIPA keimah in an hnenih ka ṭongmi hi sim aw; hi thu cu Jerusalem ih mi uktu lal le cutawkih a ummi misenpi hrangah a si.

¹¹Hitiih na tuahmi hi an parih a thleng dingmi hmuhsaknak a si kha sim aw; raltlanmi le ralkaihmi an si ding.

¹²Anmah uktu lal pakhat cu phar ong an tuahsakmi in a tlan ding ih a puantom pu phah in khawthim lakah a feh ding. A mit a hup aw ding ih khuilamah ka feh ti hman a hmu lo ding.

¹³Sikhalsehla ka sur ka rak vorh ding ih ka rak awk ding. Cule Babilon khawpi ah ka hruai ding ih cuih khawpi hmu ngahta loin a thi ding.

¹⁴A innsang pawl, amah ruahnak petu pawl le a kiltu pawl cu khuazakip ah ka ṭhekdarh ding ih thah dingah mi in an hawl rero ding a si.

¹⁵“Ram dangdang le miphun dangdang lakih ka ṭhekdarh tikah BAWIPA ka si kha in thei ding.

¹⁶Anmah lakah mi malte cu raldonak, paam le natnak a phunphun sung ihsin ka luatter ding ih, ramdangmi pawl lakah cun an thil rak tuahmi pawl ziangtluk fihnungza a si ti kha an theih hnuah, keimah cu BAWIPA ka si kha in thei ding a si,” tiah i ti.

¹⁷BAWIPA in ka hnenah,

¹⁸“Maw milaipa, na ei phah ah khur awla na in phah ah thinphang in ṭhia thlohthlo aw.

¹⁹An khawpi Jerusalem ih a um hrih mi pawl hnenah Cungnungbik BAWIPA ih thu cu hiti in a si tiah ram pumpi ah than aw: Rawl an ei phah ah an khur ding ih tidai an in phah ah thinphang in an ṭhia ciamco ding. Ramsung mi hmuahhmuah cu daan balsiattu an si thluh ruangah an ram a siatral ṭheh ding.

²⁰Minung tamzet an umnak khawpi pawl hi siatsuah ṭheh an si ding ih rampi cu ramṭhing ah a cang ding. Cutiin keimah hi BAWIPA ka si kha in thei ding a si,” tiah a ti.

²¹BAWIPA in ka hnenah,

²²“Milaipa, ziangah so Israel mi pawl in, ‘Tikcu a liam vivo, asinain profet ih rak simciami cu a kim dah lo,’ timi ṭongṭhimnak hi an rel leuhleuh?

²³Keimah Cungnungbik BAWIPA ih ka simmi cu hiti in a si. Cuih ṭongṭhimnak cu ka cemter ding. Israel ramsungah an rel sal nawn lo ding. Tikcu a kim zo, profet pawl ih rak simciami cu a kim vivo zo,’ tiah sim aw.

²⁴“Israel mi pawl lakah a dik lomi langnak le mi hruaisualtu simsungnak a um nawn lo ding.

²⁵Keimah Cungnungbik BAWIPA in an hnenah thu ka sim ding ih ka simmi cu kimtein tuahsuak a si ding. A rei nawn lo ding. Maw raltho pawl, nan nun sungah ka tuah ding ti ih ralrinnak ka lo pekmi cu ka tuah ngaingai ding. Keimah in ka lo sim zo,” tiah Cungnungbik BAWIPA in a ti.

²⁶BAWIPA in ka hnenah,

²⁷“Milaipa, Israel mi pawl in langnak na hmuhmi le na simsungmi pawl cu hmailampi hrangah a si, an ti.

²⁸Cungnungbik BAWIPA keimah ih ka simmi hi simsin aw: A rei nawn lo ding. Ka simmi cu tuahsuak a si ding. Cungnungbik BAWIPA keimah in ka sim zo,” tiah a ti.