Read Falam Chin EZEKIEL 17 Bible Online

EZEKIEL 17 - Falam Chin bible

EZEKIEL 17

¹BAWIPA in ka hnenah,

²“Milaipa, Cungnungbik BAWIPA keimah in Israel mi pawl hnenih ka simmi hi an theihnak dingah,

³tahṭhimnak hi sim aw: Muvanlai tumpi pakhat a um ih a thla a tumzet; a thla kaupi in a pharh ih a mawi ngaingai. Lebanon Tlang parah a va zuang ih sidar thing zik a va khiak ih,

⁴cuih thingzik cu sumtuahnak ramah a zuanpi hnuah sumtuahtu pawl ih khawsungah a va ret.

⁵Cuih hnuah thingkung note pakhat Israel ram in a lak ih ram ṭhatnak[10] hmunah a phun; cutawkah cun thingkung ṭhangtertu dingah tidai a um ringring.

⁶Cuih thingkung cu a ṭhang ih niam nawn in kauzet ih a zaam liailiai mi sabit hri ah a cang. A hnge pawl cu tlunlam muvanlai umnak lamah an kai vivo ih a hram pawl cu thuukpi ah an pil vivo. A hri cu a hnge le a hnah pawl in an khuh a si.

⁷“Cule a dang muvanlai tumzet pakhat a um ve ih a thla cu a hlai demdem ih a thlahmul cu an sah ngaingai. Sabit hri cun atu ih a dinnak hmunih tidai hnakin tidai tam deuh ka ngah ding ti beisei in cuih muvanlai lamah cun a hram pawl a fehter ih a hnah pawl tla in an pan vivo.

⁸Sikhalsehla cuih Sabit hri cu ram ṭhazet le tidai tamzet umnak hmunah ciin a si zo ih hnah nei tahrat in tamzet a rahmi sabit hri ṭhazet si ding lawng a bak.

⁹“Curuangah Cungnungbik BAWIPA keimah in hiti in thu ka sut: Hi sabit hri hi nung in a ṭhang ding maw? A hmaisa muvanlai in a hram ihsin a phawicat lo ding maw? A rah pawl tla thlong ṭheh in a hnge pawl a khiak ṭheh lo ding maw? Cutiin a vuai ṭheh lo ding maw? Hi sabit hri phawi dingah cun thacah zet a ṭul lo, miphun cak zet si tla a ṭul lo.

¹⁰Asi, phun zo mi cu a si; sikhalsehla a nung ding maw, a ṭhang ngaingai ding maw? Nisuahnak lam thli in a soih tikah a vuai lo ding maw? Atu ih a ṭhannak hmunah khin a vuai ṭheh ko lo ding maw?” a ti.

¹¹BAWIPA in ka hnenah,

¹²“Hi tahṭhimnak ih tican an theih le theih lo, hi raltho pawl hi sut hnik. Sim hai aw: Jerusalem ah Babilon siangpahrang a ra ih Judah siangpahrang le a kuthnuai bawi pawl kha a hruai.

¹³Siangpahrang sungkhat lakih pakhat a ko ih amah thawn lungkimnak cakhen a tuah ih ka lo rian ding ti in siatserh thukamnak a tuahter. Cuih cakhen vekih an thlun ringringnak dingah le,

¹⁴hi miphun hi raltho nawn hlah hai seh tinak ah mi upa pawl cu ralkaihmi ah a hruai.

¹⁵Sikhalsehla Judah siangpahrang cu ral a tho ih rang tampi le ralkap tampi ngah duh ah Izipt ramah palai a thlah. A hlawhtling ngai ding maw? A tisuak thei ngai ding maw? A thukamnak balsiat tahratin hremnak tuar loin a luat thei lo ding.

¹⁶“Pathian nung ka sinak hmin saal in Cungnungbik BAWIPA keimah in ka sim: Siangpahrang tokham parih a retu Babilon siangpahrang thawn an tuahmi siatcam thukamnak a pahbal ruangah hi siangpahrang cu Babilon ah a thi tengteng ding.

¹⁷Babilon ralkap pawl an ra ih leilung an burh ih mi tampi thah duh ah khawpi phardawl leng ihsin phar an dawlsang ciamco tikah cun a cak zetmi Izipt siangpahrang ralkap pawl hman in an bawm thei lo ding.

¹⁸A siatcam thukammi a pah ih lungkimnak cakhen a tuah ciami a bal zo. Hi bangtuk a tuah hnu ahcun a luat hrimhrim lo ding,” a ti.

¹⁹Cungnungbik BAWIPA in, “Pathian nung ka sinak hmin saal in ka sim: Ka hmin saal in thlun dingah siatcam ih a kam ciami cakhen a bal ruangah ka hrem ding.

²⁰Sadawi pawl ih hmanmi sur ka kam ding ih cuih sungah ka awk ding. Ka parah rintlak lo ih a nun ruangah Babilon ah ka hruai ding ih cutawkah ka hrem ding.

²¹A ralkap ṭha bik pawl raldonak ah an thi ding ih a taangsun pawl cu khuazakip ah ṭhekdarh an si ding. Cuih hnuah keimah BAWIPA in ka sim ti kha na thei ding,” a ti.

²²Cungnungbik BAWIPA in hiti in a ti: “Sidar thing saangpi ziik cu ka la ding ih thing note cu ka khiak ding. Tlang saangpi parah ka phun ding.

²³Israel tlangsaangbik parah cun ka phun ding. A hnge pawl an cerh ding ih cii an nei ding; Sidar thing ṭhazet ah a cang ding. Vate phunkip a parah an fu ding ih, A hneemdai ah colhnak an ngah ding.

²⁴Ramsung thingkung hmuahhmuah in BAWIPA ka si kha in thei ding. Thingkung sang zet pawl cu ka hau ih A niam pawl sangseh tiah ka ṭhanter. Thinghring pawl cu ka vuaiter ih Thingro pawl thinghring ah ka tuah. Keimah BAWIPA in ka sim zo. Tuah ding tiih ka sim ciami cu ka tuahsuak tengteng ding.”