Read Falam Chin EZEKIEL 18 Bible Online

EZEKIEL 18 - Falam Chin bible

EZEKIEL 18

¹BAWIPA in ka hnenah,

²“Israel ram sungih misenpi in, ‘An nu le an pa in sabit thur an in ih an faate pawl ih ha a ṭim,’ tiah an saal leuhleuh mi ṭongṭhimnak hi ziangso a si?

³“Pathian nung ka sinak hmin saal in Cungnungbik BAWIPA keimah in ka lo sim: Israel ram sungah hi ṭongṭhimnak cu nan saal nawn lo ding.

⁴Mi hmuahhmuah ih nunnak cu ka ta a si; nu le pa ih nunnak siseh, faale pawl ih nunnak siseh ka ta an si ṭheh. Sualnak a tuahtu cu a thi ding.

⁵“Thuṭhimnak ah mi ṭhazet, mi ding le mi felzet pakhat a um ti bang sehla.

⁶Israel mi pawl ih biakmi milem a bia ve lo, khawsia biaknak ih ti le rawl khal a in a ei lo. Midang nupi a thlem lo ih thi a neilai mi nunau thawn a sual lo.

⁷Zohman a bum lo ih an thil khal a ru lo. Tangka cawitu ih thukamnak thilri khal ṭhatein a khirh sal. Rilrawngmi a cawm ih hnipuan nei lo pawl hnipuan a pek.

⁸A pungṭhang duh ah tangka mi a cawih lo. Thil ṭha lo tuah cu a duh hrimhrim lo; thu-el awknak ah feltein thu a relcat.

⁹Cuvek milai cun ka thupekmi a tuah ih ka daan feltein a thlun. Miding a si ih a nung ding,” tiah Cungnungbik BAWIPA in a ti.

¹⁰“Thuṭhimnak ah hi pa hin fapa pakhat, sim theih lo fapa, nei sehla; cuih a fapa cun a pa ih a tuah dah lomi thil tuah sehla:

¹¹ruk a ru, mi a that, khawsia biaknak ti le rawl a ei ih mi nupi khal a thlem.

¹²Mifarah a bum, mi thil a ruk, tangka cawitu ih thukamnak thilri khal a khirh nawn lo. Lawki mi raithawinak hmunah a feh, fihnungza milem a biak ih,

¹³a pungṭhang duh ah tangka mi a cawih. Cupa cu a nung ding maw? A nung lo ding. Hi bangtuk thil, fihnungza thil a tuah ruangah a thi ding. A thih cu amah ih mawh ruangah a si ding.

¹⁴“Thuṭhimnak ah hi pa in fapa pakhat a nei ve. A pa ih tuahmi thil ṭha lo tampi kha a hmu, asinain a thlun lo.

¹⁵Israel mi pawl ih biakmi milem kha a bia ve lo; khawsia biaknak ti le rawl a ei lo. Midang nupi a thlem lo;

¹⁶zohman a hmuhsuam lo, zo ih thil hman a ru lo. Tangka cawitu ih thukamnak thil ṭhatein a khirh sal. Rilrawngmi a cawm ih hnipuan nei lo pawl hnipuan hruk ding a pek.

¹⁷Thilsual tuah cu a duh hrimhrim lo ih a pungṭhang duh ah tangka mi a cawih lo. Hi pa in ka daan a thlun ih ka thupekmi a tuah. Hi pa hi a pa ih sual ruangah a thi lo ding; a nung tengteng ding a si.

¹⁸Sikhalsehla a pa cun mi a bum, ruk a ru ih mikip parah thil ṭha lo a tuah. Curuangah a thi, amah rori ih tuahmi sualnak ruangah a thi a si.

¹⁹“Asinain thu nan sut ih, ‘Ziangtin so a pa ih sual ruangah a fapa tuar ve loin a um ding?’ nan ti a si ahcun thulehnak cu: a fapa cun a dingmi le a ṭhami a tuah ruangah a si, tihi a si. Ka daan pawl a thlun ih ralringzet in a tuah a si; curuangah anih cu a nung tengteng ding.

²⁰Midang si loin a sualtu lawng a thi ding. A pa ih sualnak ruangah a fapa a tuar lo ding; cuvek ṭhiamṭhiam in a fapa ih sualnak ruangah a pa in a tuar ve lo ding. Mi ṭha cu a ṭhatnak ruangah laksawng a ngah ding ih miṭha lo cu a ṭhatlonak ruangah a tuar ding.

²¹“Mi ṭha lo pakhat in thilsual tuah a bansan ih ka daan pawl thlun in thil ding le thil ṭha a tuah ahcun a thi lo ding, a nung tengteng ding.

²²A sualnak hmuahhmuah cu ngaihthiam a si ding ih a nung ding, ziangahtile a dingmi a tuah a si.

²³Mi ṭha lo pakhat a thih tikah lung awi dingah maw si in ruat? Si hrimhrim hlah; sir aw in nung sehla ka duh sawn a si,” tiah Cungnungbik BAWIPA in a ti.

²⁴“Miding pakhat in thil ṭha tuah a bansan ih thilsual le fihnungza thil a tuah saal a si ahcun a nung vivo ding maw? Nung hlah! Thil ṭha a rak tuah ciami hman hngilh ṭheh a si ding. Rintlak lo a sinak le a sualnak ruangah a thi ding a si.

²⁵“Sikhalsehla nannih in, ‘Cungnungbik BAWIPA ih a tuahmi hi a dik lo a si,’ nan ti. I ngaihnik uh, Israel mi pawl! Ka thil tuah daan hi a dik lo nan ti maw si? Nanmah ih thiltuah mi sawn a dik lo a si.

²⁶Midingpa pakhat cu a ṭhami tuah a bansan ih thil ṭhalo a tuah sal ih a thi; thilsual a tuah ruangah a thi a si.

²⁷Mi ṭha lopa pakhat in thil ṭha lo tuah a bansan ih a dingmi le a ṭhami a tuah; cutiin a nunnak a hum a si.

²⁸A thiltuahmi ziangvek a si tikha a thei ih sual nawn loin a um ruangah a thi hrimhrim lo ding, a nung vivo sawn ding.

²⁹Cule nannih Israel mi pawl in, ‘BAWIPA ih thiltuahmi hi a dik lo a si,’ nan ti. Ka thil tuah daan hi a dik lo nan ti ngai maw? Nanmah ih thiltuah dan sokhaw a dik lo sawn cu!

³⁰Cungnungbik BAWIPA keimah in ka lo sim: Israel mi pawl, nan thiltuahmi zoh in pumpak ciar in nan thu ka ṭhen ding. Thil ṭha lo nan tuahmi ihsin kir sal uh; nan sualnak in lo siatsuah hlah seh.

³¹Thil ṭha lo nan tuah ringringmi pawl hi tlansan thlang uhla thinlung thar le ruahnak thar nei thlang uh. Israel mi pawl, ziangah so thih cu nan duh?

³²Zohman nan thih ding ka duh lo. Nan sualnak sir uhla nung uh,” tiah Cungnungbik BAWIPA in a ti.