Read Falam Chin EZEKIEL 19 Bible Online

EZEKIEL 19 - Falam Chin bible

EZEKIEL 19

¹Pathian in hi ṭah hla hi Israel siangpahrang fapa pahnih hrangah sak dingin i fial:

²Ziangvek kiosa pinu so na nu hi a rak si! Ṭihnungza kiosa cang lakah a fano a cawm hai.

³Fanote a cawm ih sadeh daan a zirh; A fano cu milai dehtu ah a cang.

⁴Miphun pawl in cuih a fano thu cu an thei ih, Khurthang an kam ih an awk; Sio thawn Izipt tiang an hruai.

⁵A nu cun zianghman ruahsannak a um nawn lo hnu tiang a hngak. Cule fano dang pakhat a cawm sal, Cuih a fano khal ṭihnungza kiosa ah a cang.

⁶Kiosa cang pitling a hung si tikah, Kiosa dang thawn an vak. Sa deh daan a zir ve ih, Milai dehtu ah a cang ve.

⁷Khawsung ruhkulh pawl a bauh ih, Khua tampi a siatsuah a si. Ramsung milai pawl cun an ṭihzet, Nasa zetih a huuk tinte in.

⁸Miphun tampi amah do dingah an pum aw; Khawzakip in an ra suak. Ramsa awhnak sur an kam ih, Cuih an thang cun an awk.

⁹Thir bawm sungah an ret ih, Babilon siangpahrang hnenah an kuat. Amah kilvengtu ding an ret, Israel tlang par ramah, A huuk thawm thei nawn lo dingah.

¹⁰Na nu cu sabit hri vek a si, Tiva kapih cinmi sabit hri vek. Cuih sabit hri cu a rah le a hnah in a khuh; Tidai tampi a um ruangah.

¹¹A hnge pawl tla an khoh zet ih, Siangpahrang kianghrol ah an cang. Cuih sabit hri cu a ṭhang zet ih, Mero tawt tiangin a saang. Hnah a neihzia le a san zia cu, Mi hmuahhmuah in an hmu.

¹²Sikhalsehla thinhengtu pawl in, An kut in an phawi ih leilung ah an hlon. Nisuah lam thli in a rah a carter ṭheh. A hnge pawl tla an khiak ṭheh, An ro ṭheh ih meisa in an ur.

¹³Atu ahcun nelrawn ah an ciing, Ramcaar le tidai um lonak ramah.

¹⁴Sabit hri ihsin meisa a alh, A hnge le a rah pawl an kaang ṭheh. A hnge pawl cu an cerh sal nawn lo ding, Siangpahrang kianghrol ah an cang nawn lo ding. Himi hi ṭahnak hla a si ih an sak leuhleuh mi a si.