Read Falam Chin EZEKIEL 2 Bible Online

EZEKIEL 2 - Falam Chin bible

EZEKIEL 2

¹Cumi ka hmuh tikah leilungah ka bok. Cule aw pakhat ka thei ih, cuih aw cun, “Milaipa, ding aw. Na hnenah thu ka sim ding,” tiah i ti.

²Cutiih a ṭong laiah cun Pathian ih thlarau ka sungah a lut ih i dinter. Cule cuih aw cun,

³“Milaipa, nang cu Israel mi pawl hnenah ka lo thlah ding. An pu le an pa pawl bangtuk in ral tho in in dodal ih atu tiangah ral an si hrih lai.

⁴Milungruh an si ih keimah upatnak an nei lo; curuangah Cungnungbik BAWIPA keimah in an hnenih ka ṭong duh mi va sim dingah ka lo thlah ding.

⁵Hi raltho phun pawl in na thusimmi an lo ngaikhal le ngai lo khalle an lakah profet a um a si, tital cu an thei ding.

⁶“Milaipa, anmah siseh, an ṭongmi siseh, na ṭih lo pei. An lo dodal ding ih hling le so lakih um le varngen lakih um na bang ding. Sikhalsehla annih raltho pawl cu ṭih hlah; an ṭongmi khal ṭih hlah.

⁷An ngai khalle ngai lo khalle an hnenih ṭong ding ka timi cu na sim pei. Annih pawl cu i raltu an si kha ciing ringring aw.

⁸“Milaipa, thu ka lo simmi hi ngai aw. Anmah vekin ral tho hlah. Na kaa ang awla ka lo pekmi hi ei aw,” i ti.

⁹Kut pakhat in i run dawh kha ka hmu ih cuih kut sungah cun cazual a um.

¹⁰Kut cun cazual cu a hun pharh ih a sunglam le a lenglam thawn canganmi a um kha ka hmu: riahsiat ṭahnak le aihramnak thu a si.