Read Falam Chin EZEKIEL 22 Bible Online

EZEKIEL 22 - Falam Chin bible

EZEKIEL 22

¹BAWIPA in ka hnenah,

²“Milaipa, mithat pawl an khahnak khawpi hi a thu ṭhen dingah na tim na tuah maw? Fihnungza thil tampi a tuahmi hi fiangtein a hnenah simta aw.

³Cungnungbik BAWIPA keimah ih ka ṭongmi hi sim aw: na minung tampi na that ih milem bia tahratin na borhhlawhter awk ruangah na tikcu a rathleng cing ding.

⁴Mi na that ih na tuahcopmi na milem pawl thawn na borhhlawhter awk ruangah na tikcu a rathleng ding, na caan a cem cing ding a si. Curuangah a si miphun pawl ih hnihsuahsainak ah ka lo canter ih ram tampi ih hmuhsuam dingah ka lo tuah.

⁵Cin le daan zianghman na neih lo ruangah ram hla tilo, ram nai tilo in an lo nautat ciamco.

⁶Israel hotu pawl in anmah ih thazaang an ring ih mi an that.

⁷Khawpi sung mi zohman nu le pa upattu an um lo. Ramdang mikhual pawl nan bum ih nuhmei le ngakṭah pawl par ihsin hlawknak nan hawl.

⁸Hmun thianghlim pawl zianghman ah nan siar lo ih Sabbath khal nan buar.

⁹Mihrek in midang pawl thah duh ah thuphan an per. Mihrek in raithawinak sa an ei. Mihrek in an taksa hiarnak lawnglawng an diriamter.

¹⁰Mihrek cu an pa ih nupi thawn an it tlang. Mihrek in nunau pawl thi an neih lai hmanah hranhram in an sualpi.

¹¹Mihrek cu an uire; Midang in an mo nu siseh an pa ih fanu siseh an thlem.

¹²Nanmah lakih mihrek in tangka duh ah mi nan phil. Mihrek in an unau Israel mi hnenah tangka cawih tahratin tangka ṭhang an lak ih a miat hawl in an lian. Kei cu in thei nawn lo,” a ti. Cungnungbik BAWIPA in a sim zo.

¹³“Ruk nan ru ih mi nan thah ruangah ka kuttum in ka lo cuum ding.

¹⁴Cutiih ka lo tuah ngaingai ni ahcun, cahnak le ralṭhatnak kan nei ding tiah mawsi nan ruat? Keimah BAWIPA in ka sim zo ih ka thu cu ka kimter ding.

¹⁵Nan minung pawl cu miphun dang hnenah le ram dangdang ah ka ṭhekdarh ding ih thil sualral nan tuahmi cu ka cemter ding.

¹⁶Cuticun miphun dang pawl in an lo thangsiat ding, asinain nannih in BAWIPA ka si kha in thei ding,” tiah a ti.

¹⁷BAWIPA in ka hnenah,

¹⁸“Milaipa, Israel mi pawl hi ka hrangah hman tlak an si lo. Thir-eek vek an si: sodengtu in somei sungih a taantami ngun, dar, rangva, thir le suan pawl ih eek bangtuk an si.

¹⁹Curuangah Cungnungbik BAWIPA keimah in thir eek vekih santlai lo an si ti kha atu-ah ka sim a si: Jerusalem ah ka ko ṭheh ding ih,

²⁰ngun, dar, thir, suan le rangva pawl somei sungih an finkhawm vekin ka finkhawm ding. Cupawl cu somei sungih an titter vekin ka tuah ding. Ka thinhengnak le ka aithawhnak in ka titter ṭheh hai ding.

²¹Asi, Jerusalem ah ka finkhawm ding ih an hnuai ihsin meisa ka muah ding ih ka thinhengnak in ka titter hai ding a si.

²²Somei sungih ngun an titter vekin Jerusalem ah ka titter hai ding ih cuticun BAWIPA ih thinhengnak kan tuar ti an thei ding,” tiah a ti.

²³BAWIPA in ka hnenah hiti in a sim sal.

²⁴“Milaipa, Israel mi pawl hi sim aw: an ram hi a thianghlim lo; curuangah ka thinheng in ka hrem ding.

²⁵An hotu pawl cu anmah ih deh ciami ramsa tlunih a huuk reromi kiosa bangtuk an si. Mi an that, an zatein an ngah theizat in tangka le thilri an lak; mi an thah ruangah nunau tampi nuhmei ah an cangter.

²⁶Puithiam pawl in ka daan an bal ih thil thianghlim kha an upat lo. Thil thianghlim le thil borhhlawh an thleidang thiam lo. A thiangmi le a baalmi an dan awknak kha mi an zirh lo. Sabbath khal zianghman ah an siar lo. Curuangah Israel mi pawl hin keimah in upat lo a si.

²⁷Acozah bawi pawl cu an deh ciami ramsa a bauhthlek rerotu cinghnia hraang vek an si. Milian si duh ah mi an that.

²⁸Mi in phar pawl cu siirang an hnih vekin an sualnak cu profet pawl in an thuhsak a si. Profet pawl in langnak dik lo an hmu ih simsungnak thuphan an sim. Cungnungbik BAWIPA ih thu ka sim an ti; asinain BAWIPA keimah in an hnenah thu ka sim dah lo.

²⁹Milian pawl in mi an bum ih mi an ram. Farah zonzai an tisiat ih ramdangmi parah hlawknak an hawl.

³⁰Phardawl a dawl theitu minung ka hmu lo; phar pawl bal ṭheh a sinak zawn ih a ding theitu le ka thinheng in ram pumpi siatsuah ding ka tum tikah rampi a ṭan theitu ding minung ka hawl rero naón pakhat hman ka tong lo.

³¹Curuangah ka thinhengnak cu an parah ka burh ding ih an thil tuahmi ruangah ka thinlingnak meisa in ka siatsuah ding,” tiah a ti. Cungnungbik BAWIPA in a sim zo.