Read Falam Chin EZEKIEL 23 Bible Online

EZEKIEL 23 - Falam Chin bible

EZEKIEL 23

²“Milaipa, hlanlai ah nunau unau hnihte an rak um.

³An nolai ihsin Izipt ramah an um ih an falat vete in an nuncan a ṭha lo; an pawhte duhduh ih thammi an si ih fala him si nawn loin hlawhhlang ah an cang.

⁴Upa sawn cu Oholah ti a si, a naunu cu Oholibah ti a si. An pahnih in ka nupi an si ih fanu le fapa pawl in hrin. Oholah cu Samaria a si ih, Oholibah cu Jerusalem a si.

⁵Oholah cu ka ta a si ko naón hlawhhlang hna a ṭuan thotho ih Assiria ramih a mi duhmi pawl a ngai ciamco.

⁶A mi duhmi pawl cu sendup pianzia hnipuan a hruktu ralkap pawl, miphun ṭha hrin le hnaṭuan tumzetzet a ṭuantu pawl an si ih an zatein rangpar ralkap bawi, mi piangzet pawl an si.

⁷Assiria ralbawi pawl hrangah hlawhhlang hna a ṭuan ih Assiria milem pawl biaknak le a taksa hiarnak thawn a borhhlawhter aw a si.

⁸Fala si nawn loin hlawhhlang ih a cannak Izipt ramih a um vek ṭhiamṭhiam in hlawhhlang cu a ṭuan thotho. A tleirawl lai ihsin mipa pawl a hnenah an it ṭheu ih hlawhhlang tlukah an rak tuah zo a si.

⁹Curuangah a duh kuahko mi le amah a hiartu Assiria mi pawl hnenah cun ka pekta a si.

¹⁰Annih in a hnipuan an hlit ih taklawng in an ret; a fanu le a fapa pawl an kai; cule amah khal ralnam in an that; cutiin thuṭhennak a tong. Khawzakip ah nunau pawl in a thuhla cu an rel hiamhiam.

¹¹“Cumi cu a naunu Oholibah in a hmu naón a poisa cuang lo. A unu Oholah hnakin a hur sawn le a luar sawnmi hlawhhlang ah a cang.

¹²Anih khal taksa hiarnak in a khat ih Assiria miphun ṭha hrin pawl, hnipuan tleu a hruktu ralkap bawi pawl, rangralkap bawi mipiang zetzet pawl cu a duh a si.

¹³Nuncan sia in a borhhlawh awter. Upa sawn vek thotho in a nauta deuh khal a sia thotho a si.

¹⁴“A nuncan siava sungah cun thuk deuhdeuh ah a pil sinsin. Babilon ram bawi pawl ih zuk cu phar parah an suai, siisen an hnih, taikhap an khap ih lupawng an pawngter; cupawl cu a ngai ciamco.

¹⁵

¹⁶Cupawl a hmuh vete in a ngaizet ih Babilon ahcun palai a hei thlah.

¹⁷Babilon mi pawl an ra ih an ra ihpi; an hurnak an riamter ih an borhhlawhter. Cutiih a borhhlawh awkter hnuah cun a ninghang in a ningsin hai a si.

¹⁸Asinain mikip theih dingin a tuah aw ih hlawhhlang a si kha mi hmuahhmuah ih hmuh dingah a phozaar aw. A unu ka ningsin vekin anih khal ka ningsin a si.

¹⁹Izipt ramih tleirawl a si lai ihsin hlawhhlang hna a rak ṭuan vek thotho in a tu khalah a ṭuan ih a luar vivo.

²⁰Laakcang le rangcang bangin zahmawh le ti a neitu mipa hur pawl kha a hiar hai a si,” a ti.

²¹Oholibah, Izipt ramah tleirawlte na rak si laiah na nuncan a ṭha lo ih mipa pawl in na pawhte an lo tham ih fala him na sinak hlo tiangih na sualnak kha na pehzom duh vivo a si!

²²“Cuti a si ruangah Oholibah, Cungnungbik BAWIPA keimah in ka lo sim duhmi cu hiti in a si: Na duhmi pawl cu na khop neknek zo, sikhalsehla na parah an thin ka hengter ding ih nangmah kulh dingah ka run hruai hai ding.

²³Babilon mi, Khaldean mi, Pekod mi, Shoa mi, Koa mi le Assiria mi pawl ka run hruai ding. Cuih mipiang zetzet, miphun ṭha hrin pawl le bawi upa pawl, acozah bawi pawl le rangralkap ralbawi pawl cu ka finkhawm ding.

²⁴Saklam ihsin an run do ding, ralkap tampi le rangleng le rawl phurhnak leng pawl thawn an rung ding. Ralphaw le thir lukhuh thawn an thuam aw ding ih an lo kulh ṭheh ding. An kut sungah ka lo pe ding ih anmah ih daan in na thu an ṭhen ding.

²⁵Na parih ka thin a heng ruangah an thinheng in ka lo siatsuahter ding. Na hnar an tan ding, na hna an hlep ding ih na faate pawl an that ding. Asi, na fanu le na fapa pawl an lo long ding ih an nungcung in meisa in an ur ding.

²⁶Na hnipuan an thlek ding ih na hlawnthil pawl an la ding.

²⁷Izipt ram ihsin na rak thok zomi nuncan siava le taksa hiarnak na tuah ringringmi cu ka cemter ding. Milem pawl cu na zoh nawn lo ding ih Izipt ram khal na ruat nawn lo ding,” a ti.

²⁸Cungnungbik BAWIPA in, “Nanmah a lo huatu le a lo mitkemtu pawl ih kut sungah ka lo pe ding.

²⁹Cutiih an lo huat ruangah hna na ṭuan man hmuahhmuah an lak ṭheh ding ih na hnipuan hlit in lawngfangkheh in hlawhhlang vekin an lo thlah ding. Na taksa hiarnak le hlawhhlang na sinak in,

³⁰na parah hibangtuk thil hi a thlengter a si. Miphun tampi hrangah hlawhhlang na ṭuan ih an milem pawl thawn na borhhlawhter aw zo.

³¹Na unu ih thu na cawn ruangah hremnak khuathai na in dingah ka lo pe ve ding,” tiah a ti.

³²Cungnungbik BAWIPA in, “Na unu ih khuathai in na in ding, A khuat cu a tum ih a thuuk zet fawn. Mi hmuahhmuah in an lo hmuhsuam ding ih an lo nautat ding. Na in dingmi khuat cu a liam thluahthlo.

³³Cuih khuat cun vansaanglam in a lo tuah ding; Na ri ciamco ding. Ṭihnak le siatsuahnak khuat a si, Na unu Samaria ih khuat a si.

³⁴Na in dingih a cemfai ṭheh ding, Na khuat kuai phelte pawl in, Na pawhte an lo aat ding. Cungnungbik BAWIPA in ka sim zo,” a ti.

³⁵Cungnungbik BAWIPA in, “Keimah i hngilh ih i dungtun ruangah le na taksa hiarnak le hlawhhlang na sinak ruangah na tuar ding a si,” a ti.

³⁶BAWIPA in ka hnenah, “Milaipa, Oholah le Oholibah parih thuṭhen dingah na tiar zo maw? Fihnungza thil pawl an tuah ruangah mawhthluk aw.

³⁷Ṭaangṭawm sualnak an tuah ih mi an that: milem pawl thawn an sual ih fapa in hrinsakmi pawl an that. Ka fapa pawl cu milem hnenih thawinakah an pek.

³⁸An tuahmi cu culawng a si lo. Ka ṭunghmuntermi ka Biakinn an borhhlawhter tikcu ah Sabbath khal an buar.

³⁹Milem pawl thawinak ih ka faate pawl an thah ni rori ah ka Biakinn ah an ra ih an borhhlawhter.

⁴⁰“Ram hlapi ih a ummi mipa pawl an sawm leuhleuh ih mipa pawl cu an ra ngaingai. Unau pahnihte cu ti an kholh aw, an mithmul an dumter ih sui le ngun thil mankhung an hruk.

⁴¹Tokham mawizet parah an to ih an hmaiah cabuai pakhat an ret ih a parah cun thil ṭhaṭha ka pekmi, rimhmui le olif hriak pawl an ret.

⁴²Zianghman a poisa lotu miburpi ih awn-au thawm a thang; nelrawn ihsin rak hruaimi miburpi an si. Nunau unau hnih ih ngeel ah faute an hrukter ih an lu ah a mawizetmi lukhuh an khumter.

⁴³Ka thinlung tein nupa sualnak tuah tahratin a baang hnephnep mi nunau cu an hman reromi an hlawhhlang nu a si thotho, ka ti.

⁴⁴Hi hlawhhlang nunau pahnih hnenah atu le atu an feh. Nuncan siava nunau Oholah le Oholibah hnenah cun an kir leuhleuh.

⁴⁵Miding pawl in hi nunau pawl cu ṭaangṭawm sualnak an tuahmi le mi an thah ruangah an hnong hai ding, ziangahtile nupa sualnak an tuah ringring ih an kut khal thisen a hnih aw a si,” tiah a ti.

⁴⁶Cungnungbik BAWIPA in hiti in a ti: “Anmah thinphangtertu le an thil longtu ah miburpi rak hruai uh.

⁴⁷Miburpi cun lungto in deng hai sehla ralnam thawn do hai seh; an faate pawl that hai sehla an inn pawl ur hai seh.

⁴⁸Hi ram sungah nuncan siava ih nun cu ka kham ding; cumicu nunau hmuahhmuah in hi nunau pahnih vekih nupa sualnak an tuah lonak dingah ralrin peknak a si ding.

⁴⁹Cule nannih unau hnih tla: nan nuncan fihnungza a si ruangah le milem nan biaknak sual ruangah ka lo hrem ding. Cuticun keimah hi Cungnungbik BAWIPA ka si kha in thei ding,” a ti.