Read Falam Chin EZEKIEL 25 Bible Online

EZEKIEL 25 - Falam Chin bible

EZEKIEL 25

¹BAWIPA in ka hnenah,

²“Milaipa, Ammon ram hi mawhthluk awla a ṭhatlonak hi phuangsuak aw.

³Cungnungbik BAWIPA keimah i ka ṭongmi hi ngai dingah sim aw: Ka Biakinn borhhlawh in a um hi na lung a awi; Israel ram siatsuah ṭheh in a um ih Judah mi pawl sal ih an taan hi na di a riam a si.

⁴Cutiih na lung a awi ruangah nisuahnak lam nelrawn ih a um miphun pawl ka lo nehter ding. Na ram sungah ralkap riahnak an sak ding ih na ram an luah ding. Na ei dingmi le na in dingmi thingrah le cawhnawi pawl cu an ei an in ding.

⁵Rabbah khawpi cu kalauk tlannak ramah ka tuah ding ih Ammon ram pumpi cu tuu pawl tlannak hmunah ka cangter ding; cuticun keimah hi BAWIPA ka si kha in thei ding.

⁶“Cungnungbik BAWIPA in hiti in a ti: na za na beng ih lungawi in na khir ciamco; Israel ram parah iksiiknak na nei.

⁷Cutiih na um ruangah miphun dang kut ah ka lo pe ding ih annih in an lo ram ding, na thilri an lo long ding. Ka lo siatsuahnak cu a besia zet ding ih miphun pakhat na si thei nawn lo ding; ka ram ti ding khal na nei nawn lo ding. Cutikah keimah hi BAWIPA ka si kha na thei ding,” a ti.

⁸Cungnungbik BAWIPA in, “Moab,[12] in Judah khal hi midang vek thotho a si ko ual, a ti ruangah,

⁹Moab ramri kiltu khua pawl, khua mawi bik Beth Jeshimoth, Baal Meon le Kiriathaim pawl tla telin, ral pawl ka doter hai ding.

¹⁰Nisuahnak lam nelrawn ih ummi miphun pawl in, Ammon mi thawn Moab ram cu an neh ding. Keimah in ka nehter ding ih Ammon mipawl ti a um nawn lo ding.

¹¹Moab cu ka hrem ding ih keimah hi BAWIPA ka si kha an thei ding,” a ti.

¹²Cungnungbik BAWIPA in, “Edom mi pawl in Judah mi parah zaangfahnak nei loin phuba an lak ruangah Edom mi pawl cu kumkhua in mawhphurtu ah an cang.

¹³Atu-ah ka than a si: Edom cu ka hrem ding ih minung le ṭilva hmuahhmuah ka that ṭheh ding. Teman khua ihsin Dedan khua tiang an ram cu ramṭhing ah ka tuah ding ih an minung pawl cu ralnam in an thi ding.

¹⁴Ka minung Israel mi pawl in ka ai ah Edom mi parah phuba an la ding ih ka thinhengnak le ka aithawhnak cu Edom mi pawl an tuarter ding. Keimah ih phuba lakmi cu ziangvek a si ti cu Edom in a thei ding,” a ti. Cungnungbik BAWIPA in a sim zo.

¹⁵Cungnungbik BAWIPA in, “Filistin mi pawl in kumkhua an ral a si mi pawl parah zaangfahnak zianghman nei loin phuba an lak ih an mitkem in an siatsuah ṭheh a si.

¹⁶Curuangah atu-ah thu ka than: Filistin cu ka do ding ih ka that ṭheh hai ding. Filistin Rawn ih a nung hrihmi pawl khal ka siatsuah ding.

¹⁷Nasa zetin ka hrem ding ih an parih phuba ka lakmi cu a na ngaingai ding. Ka thinhengnak an tuar rero ding. Cuticun keimah hi BAWIPA ka si kha in thei ding,” a ti.