Read Falam Chin EZEKIEL 27 Bible Online

EZEKIEL 27 - Falam Chin bible

EZEKIEL 27

¹BAWIPA in ka hnenah,

²“Milaipa, tipikap ah a um ih miphun dangdang tipikap ih a um ve mi thawn pursum leilawn a tuahtu,

³Ṭai-ar khawpi hrangah mithi phumnak hla sak aw. Hihi Cungnungbik BAWIPA ih simmi a si tiin sim aw: Maw ṭai-ar, ‘Mawinak lamah cun ka kim a si,’ na ti.

⁴Na inn cu tifinriat a si; A lo dinsuahtu pawl in lawng mawizet vekah an lo tuah.

⁵Na thing ah Hermon Tlang ih farthing an hmang; A lo dinsuahtu pawl cun. Lebanon ihsin sidar thing an lak, Na puan thlainak dingah.

⁶Bashan ram in ṭhil thing an lak, Na lawng hlaunak dingah. Saipras ih farthing in na zial pawl cu an tuah, Saiho in an khuh ih an mawiter.

⁷Na puanzar cu pat femte in an tah, Izipt ramih ṭelhmi coihcinmawi puan a si. Lam hlapi in theih a theih; Na parih thlahliap puanzar cu, Puan ṭha bik pawl an si. Saipras tikulh ih puan sendup an si.

⁸A lo hlautu pawl cu Sidon le Arvad khuami an si. Na mithiam pawl cu lawng kiltu an si.

⁹Hi lawng tuahtu pawl cu Byblos ih a zirfeltu an si. Na sumdawr tuahnak ahcun, Tipi parih lawng kiltu hmuahhmuah in sum an tuah a si.

¹⁰Persia, Lidia le Libia ramih ralkap pawl in na ralkap an ṭuan. An ralphaw le an lukhuh pawl cu na ralkap inn ah an thlai. Na hrangih hminthannak a ngahtu pawl cu anmah an si.

¹¹Arvad ralkap pawl in na ralhruang pawl an kil ih Gamad ralkap pawl in na ralvennak donhleisang pawl an veng. An ralphaw pawl cu na phar parah an thlai. A lo mawitertu cu anmah an si.

¹²“Spain ramah sum na tuah ih na thilri tampi ngun, thir, rangva, le suan thawn na thleng.

¹³Grik ram, Tabul le Meshek ram khalah sum na tuah ih na thilri dar ih tuahmi thilri le sal pawl thawn na thleng.

¹⁴Na thilri dangdang thawn hnaṭuantu rang pawl, raldonak rang pawl le laak pawl cu Beth Togarmah ihsin na thleng.

¹⁵Rhodes mi pawl thawn khal pursum leilawnnak na tuah. Tipi kapih a ummi ram pawl in na thilri cu saiho le thingdum mankhung in an lo thleng.

¹⁶Na zuarmi thilri pawl le na ṭuansuahmi thilri pawl cu Siria mi in an lo lei. Lung hring mankhung, puansen, coihcinmawi puan, pat femte ih tahmi hnipuan, tipi sung ihsin lakmi kep le ruby lungmankhung pawl cu na thilri ai ah an lo pek.

¹⁷Judah le Israel in na thilri ai ah sangvut, khuaitizu, olif hriak le rimhmui pawl an lo pek.

¹⁸Damaskas mi pawl in na zuarmi thilri le na ṭuansuahmi pawl an lo lei ih cuih ai ah Helbon ihsin sabitti le Sahar ihsin tuuhmul an lo pek. Na thilri thawn an tuahciami thir le rimhmui nan thleng aw.

²⁰Dedan mi pawl in na thilri pawl ai ah rangkung dammi puan an lo zorh.

²¹Arab mi pawl le Kedar ram uktu pawl in na zuarmi thilri ai ah tuu le tuufaate le me an lo pek.

²²Sheba le Raamah sumtuahtu pawl in na thilri ai ah sui le ngun hlawnthil, sui le rimhmui ṭha bik pawl an lo pek.

²³Haran, Kanneh le Eden khua pawl, Sheba ih sumtuahtu pawl le Asshur le Kilmad pawl in na hnenah sum an tuah.

²⁴Na hnenah hnipuan ṭha le hnipuan mawi, hnipuan sendup, coihcinmawi puan, a tleumi puanpher, ṭha zetih an hrual mi hripi le hrite pawl an zuar a si.

²⁵Na thil zuarmi pawl cu thil phurtu lawng tum bik pawl in a bur a bur in an phur a si. “Rit zetih thil phurtu, Tifinriat ih lawng bangtuk na si.

²⁶A lo hlautu pawl in tifinriat par an lo thlenpi tikah, Nisuahnak lam thlipi in a lo soihsiat; Leilung thawn a hlatnak hmunah.

²⁷Na lennak le na thil zuarmi hmuahhmuah, Lawng kiltu na minung pawl, Na lawng parih zungthiam pawl le sumtuahtu pawl, Lawng parih ralkap hmuahhmuah, An zatein tifinriat ah an pil, Na lawng thli ih a soihsiat tik ahcun.

²⁸A pil cuahcomi lawng kiltu pawl ih Au thawm cu tipikap ah a ra thang!

²⁹“Lawng an zatein an tlansan ṭheh, Long kiltu hmuahhmuah tikap an thleng ṭheh.

³⁰Nangmah ngai in nasa zetin an ṭap, An lu cu leivut an phulh aw ih Vutcam lakah an lawng ciamco.

³¹Nangmah ruat in an sam an met ṭheh, Buri hnipuan an hruk ṭheh. An thin na in mitthli tla in an ṭap.

³²Na hrangah mithi phumnak hla an seh: ‘ṭai-ar cu zo in so a ṭhim thei ding e, Tipi sungih a pil zomi Ṭaiar cu?

³³Na thilri pawl tipi ral a thlen tikah cun, Mi hmuahhmuah ih haimi na kimter e. Na thilri man ṭhazetzet pawl cun, Siangpahrang pawl na lianter ṭheh hai e.

³⁴Atu cu tipi sungah na pilpi zo, Tipithuanthum taw ah na pilta e. Na thilri le a lo riantu hmuah hmuah cu, Nangmah thawn tipi sungah nan hlota e,’ an ti.

³⁵Tifinriat kapih a ummi miphun pawl in na parih a thlengmi an hmuh tikah an mang a bang. An siangpahrang pawl hman an tuk a sum ih an mithmai ah ṭihnak a lang.

³⁶Nang cu na liam zo, kumkhua in na liamta zo; leilung pumpi ih sumtuahtu pawl cu an tuk a sum, nangmah vek kan cang pang ding, ti an phang,” a ti.