Read Falam Chin EZEKIEL 28 Bible Online

EZEKIEL 28 - Falam Chin bible

EZEKIEL 28

¹BAWIPA in ka hnenah,

²“Milaipa, ṭai-ar uktu bawi hnenah Cungnungbik BAWIPA keimah ih ka ṭongmi hi sim aw: Na zum aw tuk ih khawzing ka si na ti. Khawzing ka si ih siangpahrang tokham parah ka to ih tifinriat in i kulh ṭheh, khawzing ka si ko, na ti. Nangmah le nangmah cu khawzing tlukah na ruat ngaingai aw ding naón khawzing cu na si lo, milai lawng na si.

³Daniel hnakin ka fim sawn, ka hnen ihsin thuh theimi thuthup a um lo, tiah na ruat.

⁴Na fimnak le na thil thiamnak in sui le ngun thawn a lo lianter ngai.

⁵Sumtuah cu na thiamzet ih a miat tampi na ngah. Na len ruangah na puarthau ngaingai.

⁶“Atu-ah Cungnungbik BAWIPA keimah ih ka ṭongmi cu hiti in a si: khawzing tlukin ka fim tiih na ruah awk ruangah,

⁷nangmah do dingah, zianghman mizawn ruat lo ral pawl, ka rak hruai ding. Na fimnak le na thil thiamnak thawngin thil mawizet tampi na khawl zomi pawl cu an siatsuah ṭheh ding.

⁸Nangmah an lo that ding ih a ciarmi thlaan ah an lo phum ding.

⁹Nangmah that dingih an rat tikah khawzing sokhaw ka si na ti thotho ding maw? Nangmah a lo thattu pawl thawn nan ton awk tikah cun khawzing si loin milai lawng na si ko ding.

¹⁰Pathian thei lo ramdangmi kutah uico bangin na thi ding. Cungnungbik BAWIPA keimah in thu ka pek zo,” a ti.

¹¹BAWIPA cu ka hnenah a ṭong sal.

¹²“Milaipa, ṭai-ar siangpahrang ih a tuar dingmi hi ruat in riahsia in um aw. A hnenah Cungnungbik BAWIPA keimah ih ka ṭongmi hi sim aw: Mi famkim na rak si ih zohṭhim tlak na rak si. Ziangtluk mifim le mipiang so na rak si?

¹³Pathian hmuan - Eden ah na rak um ih lungmankhung a phunphun na rak hruk: ruby le daimon lungmankhung, a aihre lungmankhung, a sen karnelian le jasper lungmankhung, safaira, emerald le garnet lungmankhung pawl na hruk. Sui hlawnthil tampi na nei. Cupawl cu seemsuah na si ni ih na hrangih tuahmi pawl an si.

¹⁴A sunglawi vancungmi cherub cu nangmah kiltu dingah ka ret. Ka tlang thianghlim ah na um ih a tle zohzomi lungmankhung lakah na feh.

¹⁵Seemsuah na si ni in thil ṭha lo tuah na thok ni tiang na nuncan cu soisel ding zianghman a um lo.

¹⁶Thil na lei na zuar ih na buai ih cin le daan nei loin sualnak ah na thleng a si. Curuangah ka tlang thianghlim in ka lo dawi ih a lo kiltu vancungmi in a tleumi lungmankhung pawl lakin a lo dawihlo a si.

¹⁷Mipiang na si ruangah na hngal ih na hminthannak in mi aa ah a lo canter. Curuangah leilung ah ka lo hlon ih siangpahrang dangdang ih ralrinnak dingah ka lo tlansan.

¹⁸Thil na lei i na zuarnak ah a baalmi tampi na tuah ruangah na biakinn hmun pawl tla na borhhlawhter ṭheh. Curuangah khawpi cu meisa in ka ur ih leilung ah a ciam zo. A lo zohtu hmuahhmuah in vutcam ih na can kha an lo hmu.

¹⁹Na van a duai, na cem tariai; a lo theitu miphun hmuahhmuah cu an tuk a sum; nangmah vekah kan cang pang ding, ti an phang,” a ti.

²⁰BAWIPA in ka hnenah,

²¹“Milaipa, Sidon khawpi ṭhatlonak hi rel aw:

²²An hnenah Cungnungbik BAWIPA keimah ih ka ṭongmi hi sim aw: Maw Sidon, keimah hi na ral ka si. Na parih thil ka tuahmi ruangah mi in in thangṭhat ding. Na sungih a ummi pawl ka hrem tikah ziangtluk a thianghlim mi ka si ti kha ka langternak a si ih cutiin BAWIPA ka si hi in thei ding.

²³Natsia ka run thlengter ding ih na lamzin ah thisen a luang ding. A kiil ih kip in an lo do ding ih na minung pawl an that ding. Cule BAWIPA ka si hi in thei ding,” tiah a ti.

²⁴BAWIPA in, “Ramhnen pawl, Israel a hmuhsuamtu le a tisiatu pawl cu pakhat hman Israel hrangah hling le so vek an si thei nawn lo ding. Cule keimah hi BAWIPA ka si kha in thei ding,” a ti.

²⁵Cungnungbik BAWIPA in, “Israel mi pawl cu ka ṭhekdarhnak ram pawl ihsin ka kirter sal ding ih cuticun miphun hmuahhmuah in a thianghlim mi ka si kha in thei ding. Israel mi pawl cu anmah ih ram, ka siahhlawh Jakob hnenih ka rak pekmi ramah an um ding.

²⁶Cutawkah daihnak thawn an um ding. Inn an sak ding ih sabit hmuan an tuah ding. Anmah a hmuhsuamtu le a tisiatu an kiangkap ram pawl cu ka hrem ding ih Israel cu thlangamte in a um ding. Cule keimah hi BAWIPA an Pathian ka si kha in thei ding,” tiah a ti.