Read Falam Chin EZEKIEL 29 Bible Online

EZEKIEL 29 - Falam Chin bible

EZEKIEL 29

¹Sal kan taannak kum hra kum, thla hra thla, ni hleihnih ni ah, BAWIPA in ka hnenah,

²“Milaipa, Izipt siangpahrang ṭhatlonak hi phuang aw. Amah le Izipt ram pumpi hremnak an tuar ding, tiah sim aw.

³Izipt siangpahrang hnenah, “Cungnungbik BAWIPA ih ṭong cu hiti in a si: Nang tiva sungih a bokmi ṭihnungza tisartam, Kei hi na ral ka si. Nail tivapi cu ka ta a si, keimah in ka tuah na ti.

⁴Na khabe ah sio ka thluah ding ih na tivapi ih nga pawl cu na kep parah ka kopter ding. Cuih nga pawl thawn tivapi sung ihsin ka lo dirsuak ding.

⁵Nangmah siseh, nga pawl siseh nelrawn ah ka lo hlon ding. Na ruangpi cu nelrawn ahcun a taang ding ih zohman in an lo phum lo ding. Na sa cu ramsa le vate rawl ah ka pe ding.

⁶Cutiin Izipt mi hmuahhmuah in BAWIPA ka si kha an thei ding,” a ti. BAWIPA in, “Israel mi pawl in bawmtu dingah nanmah Izipt mi an lo ring, asinain funghreu ṭawnṭai tluk fang na si.

⁷An lo vawk tikah na kiak ih an zak nan suntlang; cule an el na merhter.

⁸Curuangah Cungnungbik BAWIPA keimah in ka lo sim: Nangmah do dingah mi ka run thlah ding; na minung le na ṭilva pawl an that ding.

⁹Izipt cu ramṭhing ah a cang ding. Cuticun keimah hi BAWIPA ka si kha in thei ding. “Nail tivapi cu ka ta a si, ka tuahmi a si, na ti ruangah,

¹⁰Keimah hi na ral le na Nail ih ral ka si. Izipt ram pumpi hi, saklam ah Migdol khua ihsin thlanglam ah Aswan khua tiang, Sudan ramri thlengin ramṭhing ah ka canter ding.

¹¹Milai siseh, ramsa siseh a sungin zohman an feh lo ding. Kum sawmli sung a sungah zianghman a um lo ding.

¹²Leilung pumpuluk ah Izipt ram cu ramṭhing bikah ka tuah ding. Kum sawmli sung Izipt ram khua pawl cu khawrop ah ka tuah ding; khuadang a siatmi hnakin a besia sawn ding. Izipt mi pawl cu raltlan mi ah an cang ding. Ramkip ah an tlan ding ih miphun dangdang lakah an um ding,” a ti.

¹³Cungnungbik BAWIPA in, “Kum sawmli hnuah Izipt mi pawl cu ka ṭhekdarhnak ram pawl ihsin ka hruaikir sal ding ih,

¹⁴Izipt thlanglam ram, an suahkehnak khua le ramah ka umter ding. Cutawkah ram ṭawnṭaizet an si ding;

¹⁵ram hmuahhmuah lakah ram ṭawnṭai bik an si ding ih miphun dang uktu an si dah nawn lo ding. Zianghman ih siartlak lo ah ka tuah ding; anmah ih duh zawng ih hruai theimi pakhat hman an um lo ding.

¹⁶Bawmtu dingah Israel mi in an rinsan nawn lo ding. Izipt ih tuarmi an hmuh tikah annih kan rinsan cu kan rak mawh ngai a si, tiah Israel mi in an thei ding. Cule Israel mi in keimah hi Cungnungbik BAWIPA ka si kha in thei ding,” a ti.

¹⁷Sal kan taannak kum kul hluan sarih kum, thla khat thla, ni khat ni ah BAWIPA in ka hnenah,

¹⁸“Milaipa, Babilon siangpahrang Nebuchadnezzar in ṭai-ar a do a si. Nebuchadnezzar in a ralkap pawl kha thilrit a phurhter ih an thil phurhmi a rih tuk ruangah an lu a kolh ṭheh, an liang khal a kok ṭheh; sikhalsehla an zonzaih tlukin siangpahrang siseh ralkap pawl siseh an ngahmi a um lo.

¹⁹Curuangah Cungnungbik BAWIPA in hiti in ka sim: Izipt ram cu siangpahrang Nebuchadnezzar hnenah ka pe ding. An ram cu a ram ding ih an thilri a long ding; a ralkap pawl ih thlahlawh dingah Izipt ram lennak cu a phur ṭheh ding.

²⁰A hnaṭuan man ah Izipt ram ka pe ding, ziangahtile a ralkap pawl in ka hrangah hna an ṭuan a si. Cungnungbik BAWIPA keimah in ka sim zo.

²¹“Cubangtuk thil a thlen tikah Israel cu miphun cakzet ah ka tuah ding ih nang Ezekiel cu mi hmuahhmuah ih an lo theih theinak hmun ihsin ka lo ṭongter ding; cuticun BAWIPA ka si hi in thei ding,” tiah a ti.