Read Falam Chin EZEKIEL 35 Bible Online

EZEKIEL 35 - Falam Chin bible

EZEKIEL 35

¹BAWIPA in ka hnenah,

²“Milaipa, Edom ram ṭhat lonak hi sim aw.

³Cungnungbik BAWIPA keimah ih ka ṭongmi hi sim aw: “Edom tlangsaang pawl, keimah hi nan ral ka si! Ramṭhing ah ka lo tuah ding.

⁴Na khua pawl cu khawrop ah ka canter ding; Na ram cu ramṭhing ah ka tuah ding. Cule BAWIPA ka si hi in thei ding.

⁵Israel ih ral na si ringring ih an sual ruangah neta bik hremnak an tuar tik le siatralnak an ton tikah a minung pawl cu thah dingah na ngaihtuah a si.

⁶Curuangah kei cu a nungmi Pathian Cungnungbik BAWIPA ka si vekin ka lo sim: na lamzin cu thihnak lamzin a si ih na luat thei lo ding. Na mawhnak cu mithah a si ih mithahnak in a lo thlun ding.

⁷Edom tlangpar ram cu ramṭhing ah ka tuah ding ih cuih ramsung a fehtu hmuahhmuah cu ka that ding.

⁸Tlangpar cu ruak thawn ka khahter ding; ral kutin a thimi pawl ih ruak in tlang le phairawn pawl cu ka khahter ding.

⁹Kumkhua in ramṭhing ah ka lo tuah ding ih na khua pawl sungah minung zohman an um sal nawn lo ding. Cuticun BAWIPA ka si hi in thei ding.

¹⁰“BAWIPA keimah hi Judah le Israel ih Pathian ka si naón cuih ram pahnih cu an ram hmuahhmuah thawn keimah ih ta an si, na ti.

¹¹Curuangah keimah hi Cungnungbik BAWIPA, a nungmi Pathian ka si bangtuk in ka lo sim: ka minung pawl parah thinhengnak, iksiiknak le huatnak na neih ruangah ka lo thungrul ve ding. An parih thil na tuahmi ruangah ka lo hrem kha an thei ding.

¹²Cuticun Israel tlangsaang pawl hi an ṭhing ih ka duhduh in ka ei ding, tiah hmuhsuamnak thawn na ṭongmi cu keimah BAWIPA in ka thei a si, ti hi na thei ding.

¹³Ka parah puarthauzet le uang-awzet ih na ṭong rero ṭheu cu ka thei ṭheh a si,” tiah a ti.

¹⁴Cungnungbik BAWIPA in, “Ramṭhing ah ka lo tuah ding ih cutiih na siat ṭheh cu leilung pumpi in an lo hmuh tikah an lung a awi ding.

¹⁵Ka ta a si mi Israel in siatsuahnak a ton tikih na di a riam vekin na parah ka tuah ve ding. Seir tlangsaang pawl, a si, Edom ram pumpi in ramṭhing ah a cang ding. Cuticun mi hmuahhmuah in keimah hi BAWIPA ka si kha in thei ding,” a ti.