Read Falam Chin EZEKIEL 36 Bible Online

EZEKIEL 36 - Falam Chin bible

EZEKIEL 36

¹BAWIPA in, “Milaipa, Israel tlangsaang pawl hnenah thu sim awla Cungnungbik BAWIPA keimah in an hnenih ka sim mi thu hi ngai dingah sim aw.

²Israel ih ral pawl cun, ‘Khi khuahlan tlang pawl cu kan ta an si zo,’ tiah tluang an khawng.

³“Profet ṭong in phuangsuak awla Cungnungbik BAWIPA keimah ih ka simmi hi than aw. Kiangkap ram pawl in Israel tlangpar ram pawl an lak ih an siim tikah mi hmuahhmuah in Israel cu an hnihsan.

⁴Curuangah Cungnungbik BAWIPA keimah in kiangkap ram pawl in an siim ih an hnihsan rero mi nannih tlangsaang le tlangniam pawl, tivate le phairawn pawl, hmunrop ih cantermi hmun pawl, ṭiosanmi khua pawl hnenih ka simmi hi ngai uh:

⁵“Cungnungbik BAWIPA keimah in ka thinsahru in kiangkap ram pawl, hleice in Edom ram parah ka sim zo a si. Hni surso le nautatnak thawn ka ram cu an lak ih hmun nuam pawl an luah ṭheh a si.

⁶“Curuangah Israel ram hnenah profet ṭong in phuang aw. Miphun dang pawl in an hmuhsuam ih mual an photer ruangah Cungnungbik BAWIPA keimah in thiiknak le thinhengnak thawn ka simmi hi Israel tlangsaang le tlangniam pawl, tivate le phairawn pawl hnenah sim aw.

⁷Cungnungbik BAWIPA keimah in siatcam in ka kam a si: kiangkap ram pawl cu ningzak le mualpho in an um ding.

⁸Sikhalsehla nan tlangsaang parah zanthing kung pawl ih hnah cu an cerh sal ding ih ka minung Israel nanmah pawl hrangah an rah ding. Nan inn ah nan tlung cing ding.

⁹Nan lamah ka ṭang ding ih nan ram cu thlawhmi le thlaici tuhmi ramah ka canter tengteng ding.

¹⁰Nan minung khal ka lo pungzaiter ding. Khawpi sungah nan um ding ih siatsuah ciami pawl cu nan dinsal vivo ding.

¹¹Milai siseh, ṭilva siseh ka karhzaiter ding. A hlan hnakin minung nan tam deuh ding ih faate tla tampi nan nei ding. A hlanih nan rak um ṭheu vekin cutawkah nan um ding ih tuihhlan hnakin mi ṭhangso ah ka lo tuah ding. Cuticun BAWIPA ka si hi nan thei ding.

¹²Ka minung Israel pawl cu ka lo hruaikir ding ih ram sungah ka lo umter sal ding. Nanmah ih ram a si ding ih nan tefa pawl khal rilrawng in an um lo ding.

¹³“Cungnungbik BAWIPA keimah in ka sim: Mi in hi ram cu a minung a eitu le amah ih ramsung fa lala a rutu ram a si, tiah an ti ngai.

¹⁴Sikhalsehla atu thok ihsin misa eitu le mahih faate pawl a rutu a si nawn lo ding. Cungnungbik BAWIPA keimah in ka sim zo.

¹⁵Anmah hnihsuahsainak ah a hmangtu le a rak hnihsan rerotu miphun pawl ih thu cu hi ram in a ngai nawn lo ding. Hi ram in a miphun ih faate pawl khal a ru nawn lo ding. BAWIPA Pathian keimah in ka sim zo,” a ti.

¹⁶BAWIPA in ka hnenah,

¹⁷“Milaipa, Israel mi pawl an ram sungih an rak um laiah an nuncan le an tuahmi in an ram a balter. Nunau cu thlatin thi a neih laiah cun mi thiang lo ih ruah an si vekin an nuncan hi ka hmaiah a thiang lo a si.

¹⁸An ram sungah mi thisen an luanter ih milem pawl bia tahrat in an ram an balhter ruangah ka thinhengnak cu nasa zetin an parah ka burh.

¹⁹An nuncan le an tuahmi ruangah ka hnong hai ih ram dangdang ah ka ṭhekdarh ṭheh.

²⁰An fehnak ram kipah mi in ‘An Pathian ih pekmi ram an tlansan a si,’ an ti ruangah ka hmin thianghlim cu an thangsiat.

²¹Israel mi pawl in an fehnak ram kipah in thangsiat ruangah ka hmin thianghlim ka pamhmaih a si.

²²“Atu-ah Cungnungbik BAWIPA keimah in an hnenih ka sim duhmi thu hi Israel mi hnenah sim aw: Thil ka tuah dingmi cu Israel nanmah ih zawn ka ruah ruangah a si lo, nan fehnak ram kipah ka hmin thianghlim nan thangsiat ih cuih ka hmin thianghlim cu pamhmai ka ti ruangah a si sawn.

²³Miphun pawl lakah ka hmin cu nan thangsiat. Cuih mi pawl lakah a nasami ka hmin ih thianhlim zia ka langter tikah BAWIPA ka si hi an thei ding. Cungnungbik BAWIPA keimah in ka sim zo. Miphun pawl hnenih ka hmin thianhlimnak langtertu dingah nanmah ka lo hmang ding.

²⁴Miphun kip le ramkip ihsin ka lo la ding ih nanmah ih ramah ka lo kirpi ding.

²⁵Tidai thiangfai ka lo theh ding ih milem biaknak hmuahhmuah le a lo borhhlawhtertu hmuahhmuah khal ka thiangfaiter ding.

²⁶Thinlung thar le nunnak thar ka lo pe ding. Lungto bangih a hak mi nan thinlung cu ka la ding ih thinlung neemte ka lo pe ding.

²⁷Nan sungah ka thlarau ka khum ding ih ka daan pawl le ka thupekmi pawl nan thlun thei ding.

²⁸Cuticun nan pupa pawl hnenih ka pekmi ram sungah nan um ding. Nannih cu ka minung nan si ding ih kei hi nan Pathian ka si ding.

²⁹A lo baaltertu hmuahhmuah ihsin ka lo hum ding. Nan rawl ka karhzaiter ding ih cuticun paam nan tong nawn lo ding.

³⁰Nan thingrah le nan lorawl ka karhter ding ih cuticun paam tong loin miphun pawl lakah nan ning a zak nawn lo ding.

³¹Nan nuncan ṭha lo le thilsual nan tuahmi pawl nan thei sal ding ih nan sualnak le nan mawhnak ruangah nanmah le nanmah nan fih aw ding.

³²Israel mi pawl, ziang hmuahhmuah ka tuahmi hi nanmah zawnruah ah a si lo, tihi nan theih dingah ka duh a si. Nan thil tuahmi ruangah ningzak le mualpho in um uh. Cungnungbik BAWIPA keimah in ka sim zo,” a ti.

³³Cungnungbik BAWIPA in, “Nan sualnak hmuahhmuah ihsin ka lo thianfaiter tikah nan khawsungah nan um sal ding ih a siatmi pawl cu nan sak sal ding.

³⁴Nan lo kiangkap ih a fehtu hmuahhmuah in nan lo pawl hrampi a khah ih hrambulak vek a si kha an hmu ṭheh; asinain nan lo pawl cu ka lo thloter sal ding.

³⁵Ramṭhing ih a cang ciami ram cu Eden Hmuan vekih a can sal kha mi hmuahhmuah in an hmu ding; balsiat ciami, ram ciami le khawrop ih a cang ciami khua pawl cu luahsal in ralhruang ih kulh ṭheh sal an si kha an hmu ding.

³⁶A luatsun ramhnen pawl in hi khua pawl a dinsaaltu le ramṭhing pawl sungih rawl a ciingsaaltu cu BAWIPA keimah ka si kha an thei ding. Cuvekin ka tuah ding tiah thutiamtu cu BAWIPA keimah ka si ih ka tuah suak ding,” a ti.

³⁷Cungnungbik BAWIPA in, “Israel mi pawl cu bomnak i diltu miphun ah ka tuah sal ding ih tuurual bangin ka pungzaiter ding.

³⁸Jerusalem khawpi cu puai tikcu ih thawinak tuu pawl in a khah vekin atu-ih khawrop ah a cangmi khua pawl hi minung in ka khatter ding. Cuticun BAWIPA ka si hi in thei ding,” a ti.