Read Falam Chin EZEKIEL 38 Bible Online

EZEKIEL 38 - Falam Chin bible

EZEKIEL 38

¹BAWIPA in ka hnenah,

²“Milaipa, Magog ram ih miphun pawl Meshek le Tubal uktu bawi Gog hnenah a ṭhatlonak thu sim aw: A hnenah,

³Cungnungbik BAWIPA keimah ih ṭongmi hi sim aw: Keimah hi a ral ka si.

⁴A dunghmai ka her ding, a khabe ah sio ka thlaih ding ih a ralkap pawl thawn ka dirsuak ding. A ralkap cu an rang le an rangralkap pawl thawn an tam ngaingai ih ralphaw le ralnam an keng fingfing.

⁵Persia mi, Sudan mi le Libia mi pawl a hnenah an ṭang ih ralphaw le lukhuh an nei fekfek.

⁶Gomer ram le Beth Togarmah ramih raldo theimi hmuahhmuah khal a hnenah an ṭang ih miphun dang tampi tla a hnenah an tel.

⁷Tiar cia ih um dingah sim awla a ralkap pawl tla a thupekmi vekih tiar-aw dingin sim aw.

⁸Kum reipi hnuah, miphun tampi hnen ihsin hi minung pawl hmun khatih finkhawm an sinak le ral ṭih ding um lo in himte ih an umnak ram hi do dingah thu ka pe ding. Israel tlangpar ram, kum reipi ramṭhing a rak si naón atu ahcun mi hmuahhmuah hnangamzet ih an umnak ram cu a do ding.

⁹Amah le a ralkap pawl le amah hnenih a ṭangtu miphun pawl in thlipi bangin an do ding ih cuih ram cu khawdur le mero bangin an khuh ṭheh ding,” tiah a ti.

¹⁰Cungnungbik BAWIPA in Gog hnenah cun, “Cuih tikcu a thlen tikah thu ṭha lo na ruat ding ih na ngaihtuah ciamco ding.

¹¹Ralhruang le ruhkulh zianghman nei loin khawsungah daite le hnangamte in a ummi, zohman bawmtu nei lo pawl kha do na tum ding.

¹²Khawrop a rak si dahmi khawpi pawl sungih a ummi minung pawl cu na ram ding ih an thil na long ṭheh ding. Miphun tampi hnen ihsin finkhawmmi an si ih atu ahcun ṭilva tampi le thilri tampi an nei ih leilung pumpi lamzin ton awknak ah an um a si.

¹³Sheba le Dedan mi pawl le Spain ramih sumtuahtu pawl in, ‘Mi thil ram ding le lon dingah maw na ralkap pawl khawm tahratin mi na do? Sui le ngun, ṭilva le thilri pawl la tahratin cuih lonmi hransaw thawn tlanhloh na tum maw si?’ tiah an sut ding,” a ti.

¹⁴Cungnungbik BAWIPA in Gog hnenih a ṭongmi sim dingah i thlah. “Ka minung Israel mi pawl thlangamte ih an um laiah,

¹⁵miphun tampi lakin na khawmmi a cakzet le a tamzet na ralkap pawl thawn na umnak saklam ram ihsin na rungsuak ding. An zatein rang par in an rung ding.

¹⁶Khatlam ihsin khatlam deng tiang ka minung Israel pawl cu thlipi bangin na do ding. Tikcu a kim tikah, miphun dang pawl hnenah zo ka si ti langternak ah le nan lakih ka hnaṭuannak thawngin ka thianhlimnak a lang theinak ah ka ram do dingih ka lo thlahsannak cu a si.

¹⁷Khuahlan laiih i riantu Israel profet pawl hnen in thu ka rak than ih hmailam tikcu ah Israel do dingah mi pakhatkhat ka thlah ding, ka rak timi kha nangmah hi na si,” a ti. Cungnungbik BAWIPA in a sim zo.

¹⁸Cungnungbik BAWIPA in, “Gog in Israel a do ni ahcun ka thin a hengzet ding.

¹⁹Ka thinhengnak meisa bangih a ling laiah thu ka than: cuih ni ahcun Israel ramah ling nasazetin a hnin ding.

²⁰Nga le vate hmuahhmuah, ramsa hmuahhmuah a tum a seen a bok a vakmi tiang in le leilung tlun mi hmuahhmuah in keimah ṭih ah an khur thlohthlo ding. Tlang saangpipi an min ding, khaam saangpipi an cim ding ih khawkulh phardawl hmuahhmuah an cim ṭheh ding.

²¹Siatralnak a phunphun in Gog cu ka ṭhihṭhaih ding. Cungnungbik BAWIPA keimah in ka sim zo. A ralkap pawl cu anmah le anmah parah an ralnam an hawi ding.

²²Natnak le thisen suahnak in Gog cu ka hrem ding. Ruah le rial cu meisa le katmei thawn amah le a ralkap pawl le a hnenih a ṭangtu miphun hmuahhmuah pawl parah ka burh ciamco ding.

²³Cuticun miphun hmuahhmuah hnenah mi maksak ka sizia le mi thianghlim ka sizia cu ka langter ding. Cule BAWIPA ka si kha an thei ding,” a ti.