Read Falam Chin EZEKIEL 4 Bible Online

EZEKIEL 4 - Falam Chin bible

EZEKIEL 4

¹Pathian in, “Milaipa, tlakrawh la awla na hmaiah re aw; a parah Jerusalem khawlipi zuk suai aw.

²Cule ral in Jerusalem an kulhnak langternak ah kahsam laihmi, leilung dawlmi, ralkap umnak le ralhruang sutsiatnak pawl a kimvel ah tuah ṭheh aw.

³Thirpheng la awla nangmah le khawpi karlak ahcun phar bangin song aw. Khawpi lam hoi aw. Khawpi cu kulh ṭheh a si ih a kulhtu cu nangmah na si ding. Himi cu Israel miphun hrangah hminsinnak a si ding.

⁴“Cule na kehlam sir zawng in it awla Israel miphun mawhnak cu na parah ka suang ding.[1] An mawhnak ruangah cuticun ni zathum le sawmkua sung cutawkah na um ding ih na tuar ding. Na ni khat tuarmi cu an kum khat tuar dingmi ai ah ka relcat zo.

⁶Cu ṭheh in her awla na vorhlam sir zawng in it in Judah mi mawhnak ruangah ni sawmli sung tuar aw: ni khat na tuarmi cu an kum khat tuar ai a si ding.

⁷“Ral in Jerusalem an kulh ṭhehnak cu ṭhatein zoh aw. Cuih khawpi lam hoi in na kuttum vai awla a parih thu cu sim suak aw.

⁸Hri in ka lo ṭem ding ih Jerusalem an kulhnak a reh hlanlo na sir na her thei lo ding.

⁹“Sangvut, barli sangvut, bete, phiang, laifang le fangtlor malte ciar la awla kheng sungih na rawi ṭheh hnuah sangah tuah aw. Cuih na tuahmi cu na kehlam sir in ni zathum le sawmkua sung na ei ding mi a si.

¹⁰Ni khatah rawl pawng hnih lawng na ei ding ih cuih pawng hnih cu a thaisun tiang lo daihseh.

¹¹Tidai khal na duh zat in na in thei lo ding; ni khatah khuat hnih lawng na ngah ding.

¹²Milai eek caar in meisa na muah pei ih cuih meisa vaam ah sang na rawh pei ih mi hmuahhmuah ih an lo hmuh theinak ah na ei pei.

¹³BAWIPA in, “Himi cu daan ih a khammi rawl [2] pawl kha Israel mi pawl in ram dangdang i ka ṭhekdarh tikah ziangvekin an ei ding, ti langternak dingah a si,” a ti.

¹⁴Sikhalsehla kei in, “Asilo, Cungnungbik BAWIPA! Thil borhhlawh ka dai dah lo. Ka sentet lai ihsin mahte thimi sa siseh, sahrang ih dehmi sa siseh ka ei dah lo. A thiang lomi rawl ka ei dah lo a si,” tiah ka ti.

¹⁵Cutikah Pathian in, “Cuti asile, milai eek si loin caw eek hmang awla sang cu rawh aw,” a ti.

¹⁶Cuih tlunah Pathian in, “Milaipa, Jerusalem khawpi in rawl a ngah ṭheumi cu ka phiatsak ding. Khawsungih a ummi pawl cu an ei dingmi rawl le an in dingmi tidai ngaihtuah na ah donhar le riahsia in an um ding.

¹⁷In le ei ding ti le rawl an nei lo ding; riahsia in an um ding ih an sualnak ruangah an tisa a cem zutzo ding,” tiah a ti.