Read Falam Chin EZEKIEL 40 Bible Online

EZEKIEL 40 - Falam Chin bible

EZEKIEL 40

¹Sal kan taannak kum kul hluannga kum, Jerusalem an laknak kum hleili kum, kumthar nihra ni ah, BAWIPA ih kut cu huham nasa zet thawn ka hnenah a um ih, amah in hmun dangah i hruai.

²Langnak ka hmuhmi ahcun Pathian in Israel ramah i fehpi ih tlang saangpi pakhat parah i ret. Ka hmaiah khawpi bangtuk inn a burpi ih a ummi ka hmu.

³I naihter deuh ih dar vekih a tleumi pa pakhat ka hmu. Tahnak patzai hri le tahfung a keng ih kotka ih a din kha ka hmu.

⁴Ka hnenah, “Milaipa, ṭhatein zoh aw! Ralringte in ngai awla ka lo hmuhmi hmuahhmuah ṭhatein ciing aw; ziangahtile hi ruangah a si hitawk ih ka lo hruai. Na hmuhmi hmuahhmuah hi Israel mi hnenah na sim pei,” i ti.

⁵Ka hmuhmi cu Biakinn a si ih a kimvel in phardawl ih kulhmi a si. Dar vekih a tleumi pa cun a tahnak fung dong ruk a saumi cu a lak ih Biakinn kulhnak phardawl cu a tah. Dong ruk a sang ih dong ruk a sah.

⁶Cule nisuahnak lamih a ummi kotka lamah a feh. Dawlmi kailawn ah a hung kai ih tluntabik a thlen tikah sangka cu a tah; dong ruk a sah a si.

⁷Cuih pawnah cun fehnak lamzin a um ih vorhlam le kehlam ah inn kilnak khaan khaan thum fingfing an um. Cuih khaan pawl cu a tung le a vang an canrep ih dong ruk fingfing an sau ih an kau. Khaan khat le khaan khat karlakih phar cu dong nga a sah. Cuih khaan sangtu ahcun lamzin pakhat dong ruk sau a um ih Biakinn lam hoitu khaan tumpi ah a va thleng.

⁸Cuih khaan tumpi cu a tah ih dong riat a kau. Hi khaan cu Biakinn naih bik sangka ah a cang ih Biakinn naih bik phar cu dong hnih a sah.

⁹

¹⁰(Hi inn kiltu pawl ih khaan cu an tia aw thluh ih an karlakih phar tla a sah daan an bangrep.)

¹¹Cuih hnuah lamzin ih sangka cu a tah ih dong hleithum a kau. Kotka pakhat le pakhat karlak khal a tah ih dong hra a kau.

¹²Inn kiltu pawl khaan ih hmaizawn fingfing ahcun phar niamtete an um ih dong khat saang le dong khat sah an si. (A khaan pawl cu dong ruk kau le dong ruk sau an si fingfing.)

¹³Cule a khaan ih dunglam phar netnak ihsin lamzin khatlam ih a ummi khaan dunglam phar netnak tiang a tah ih dong kul hluannga a hla a si.

¹⁴A netnak ih a ummi khaan ihsin phar ih kulhmi tual ah va thlen theih a si. Cuih khaan cu a tah ih dong kul a kau.

¹⁵Lamzin cu kotka lenglam phar ihsin a netabik khaan ih phar lenglam tiang dong sawmnga a sau.

¹⁶Cuih khaan pawl ahcun a lenglam phar ah tukvirh fatete a um fingfing ih khaan pakhat le pakhat karlak phar khalah tukvirh fatete a um fingfing. Lamzin kapih phar parah cun tuumkung khuaimi zuk pawl an um.

¹⁷Cupa cun lamzin in tual tiang i hruai. Tual kulhnak phardawl ih lenglam ahcun a khaan khaan sawmthum an sak ih cuih khaan pawl ih hmaizawn ahcun lungto phahmi tual a um ih,

¹⁸a laifang tualrawn cu a kulh ṭheh. Cuih lungto phahmi tual cu a laifang tualrawn hnakin a niam sawn.

¹⁹A laifang fehnak ah a saangdeuh in fehnak lam an tuah ih cupa cun lamzin pahnih karlak cu a tah tikah dong zakhat a si.

²⁰Saklam ihsin a lenglam tual ih fehnak lamzin kha a tah sal.

²¹Cuih lamzin vorhlam le kehlam ih khaan pathum fingfing a ummi le an karlak phar pawl le khaan tumpi pakhat a ummi cu nisuahnak lam kotka lamih a ummi khaan pawl thawn an tia aw thluh. Lamzin cu dong sawmnga a sau ih dong kul hluannga a kau.

²²Khaan tumpi le tukvirh pawl le an zuksuaimi tuumkung pawl cu nisuahnak lam kotka ih a ummi pawl bangtuk an si. Kotka tiang kainak karbak pasarih a um ih khaan tumpi cu tualrawn sangtu bikah a um ih tualrawn lam a hoi.

²³A lenglam tual tan in a laifang tualrawn lamah hi saklam kotka ihsin nisuahnak lam vekin lamzin pakhat a feh. Cupa cun cuih lamzin pahnih karlak cu a tah tikah dong zakhat a hla a si.

²⁴Cuih hnuah cupa cun thlanglam ah i fehpi ih lamzin pakhat kan hmu. A tah ih lamzin dang vek thotho a si.

²⁵Hi lamzin kiangih khaan pawl khal cun khaan dang vek thotho in tukvirh an nei fingfing. Hi lamzin cu dong sawmnga a sau ih dong kul hluannga a kau.

²⁶Cuih lamzin thlen hlanah karbak pasarih a um ih a netnak ah khaan tumpi a um ve ih tualrawn a hoih ve. Lamzin kap phar sunglam ahcun, hmundang vek thotho in tuumkung zuksuaimi an um.

²⁷A laifang tualrawn fehnak a um ve thotho ih mipa cun a tah tikah lamzin pahnih karlak cu dong zakhat a si.

²⁸Cupa cun thlanglam lamzin ihsin a laifang tualrawn tiang i fehpi. Cuih lamzin cu a tah ih phar lenglam ih a ummi lamzin tia thotho a si.

²⁹Inn kilnak khaan pawl, khaan tumpi le a sunglam phar pawl cu lamzin dang kiangih a ummi khaan tia thotho an si. Hi khaan pawl ah tukvirh tla an um ve. A saulam cu dong sawmnga a si ih a kauhlam cu dong kul hluannga a si.

³⁰

³¹Khaan tumpi cu tualrawn dang a hoi ih lamzin kap phar parah tuumkung zuk pawl an suai. Hi kotka kainak ah karbak pariat a um.

³²Cupa cun nisuahnak lam lamzin ihsin a laifang tualrawn tiang i fehpi. Lamzin cu a tah ih lamzin dang tia a si.

³³Inn kilnak khaan pawl, khaan tumpi le a sunglam phar pawl cu lamzin dang kiangih a ummi tia thotho an si. Tukvirh cu phar tinah a um ih khaan tumpi tla ah a um ve. A saulam cu dong sawmnga a si ih a kauhlam cu dong kul hluannga a si.

³⁴Khaan tumpi cu a lenglam tual a hoi. Lamzin kap phar parah tuumkung zuk pawl an suai. Hi kotka kainak ah karbak pariat a um.

³⁵Cupa cun saklam lamzin ah i fehpi. Lamzin cu a tah ih lamzin dang tia thotho a si.

³⁶Hmun dangih a um vek thotho in inn kilnak khaan pawl, khaan tumpi le phar tinah tukvirh an um thluh ve. A saulam cu dong sawmnga a si ih a kauhlam cu dong kul hluannga a si.

³⁷Khaan tumpi cu a lenglam tual a hoi. Lamzin kap phar parah tuumkung zuk pawl an suai. Hi kotka kainak ah karbak pariat a um.

³⁸A lenglam tual ah saklam i hung fehnak a sunglam lamzin thawn pehcih mi inn fate pakhat a um. Cuih inn fate cu tualrawn lam a hoitu khaan tumpi lamah a ong aw ih cutawkah cun mei-ur thawinak hrangih pek dingmi sa pawl cu an kholh.

³⁹Hi khaan tumpi sungah cabuai pali a um ih kap khatah pahnih veve an um. Hi cabuai pawl parah hin mei-ur thawinak hrangah siseh, sualthlah thawinak hrangah siseh, kuansal thawinak hrangah siseh pek mi ṭilva pawl an thahnak a si.

⁴⁰A khaan lengah, a khaan sungih cabuai bangtuk, cabuai pali a um ve ih saklam kotka sung luhnak kap hnih ahcun pahnih veve an ret.

⁴¹A zatein cabuai pariat, thawinak hrangih ṭilva thahnak ah an um; a khaan sungah cabuai pali, tual ah cabuai pali an um.

⁴²Inn fate sungih cabuai pawl cu lungto in sermi an si. Cuih cabuai pawl cu dong khat an sang ih dong khat le khap khat an kau ih, an kauhlam le an saulam a tia aw. Thawinak hrangih pekmi ṭilva pawl talhnak le thahnak hriamhrei hmuahhmuah cu hi lungto cabuai parah an ret ringring.

⁴³Cuih cabuai tlang ahcun a tlangkop zabok tia a kimvel in a um. Thawinak ih pekmi sa hmuahhmuah cu cuih cabuai parah cun an ret.

⁴⁴Cule mi pa cun a laifang tualrawn ah i hruai. Cuih tualrawn lam hoi in sakmi innkhaan pahnih an um ih pakhat cu thlanglam kotka kiangah a si ih saklam a hoi.

⁴⁵Mipa cun thlanglam a hoitu khaan cu Biakinn ih hna a ṭuantu puithiam pawl umnak khaan a si ih,

⁴⁶saklam a hoitu khaan cu biakṭheng ih hna a ṭuantu puithiam pawl umnak khaan a si, tiah i sim. Puithiam pawl cu an zatein Zadok cithlah mi an si. Levi phun sungin anmah lawng hi BAWIPA ih umnak hmun ihBAWIPAIÓ hnaṭuan dingah a lut theitu an si.

⁴⁷Cupa in a laifang tualrawn cu a tah ih dong zakhat kau le dong zakhat sau a si. Biakinn cu nitlaknak lamah a um ih a hmaizawn ah biakṭheng pakhat a um.

⁴⁸Cule Biakinn sungih vung luhnak khaan sungah i hruai. Luhnak sangka cu a tah ih dong nga a sah ih dong hleili a kaumi a si; a kapih phar pawl cu dong thum a sahmi an si.

⁴⁹Cuih khaan vung luhnak ah karbak an um ih dong kul sau le dong hleihnih kau an si. Vung luhnak ih vorhlam le kehlam ah ṭhuam tumpi pakhat veve an um.