Read Falam Chin EZEKIEL 41 Bible Online

EZEKIEL 41 - Falam Chin bible

EZEKIEL 41

¹Cule mipa cun a laifang khaan, Hmun Thianghlim ah i luhpi. Cuih khaan sung vung luhnak cu a tah ih dong ruk thuk le dong hra kau a si ih a kaphnih ih phar cu dong nga sah fingfing an si. A laifang khaan cu a tah ih dong sawmli sau le dong kul kau a si.

²Luhnak sangka cu dong kul a kau; a kap hnih ih phar cu dong hra veve a sah. Hmun Thianghlim cu a tah ih dong sawmriat sau le dong sawmli kau a si.

³Cule a sungta bik khaan ah a vung lut. A vung luhnak cu a tah ih dong hnih thuk le dong ruk kau a si; a kaphnih ih phar pawl cu dong sarih sah an si.

⁴Sungta bik khaan cu a tah tikah dong kul kau le dong kul sau a si. Cule anih in, “Himi hi Hmun Thianghlim Bik a si,” tiah i ti.

⁵Cupa cun Biakinn phar a sunglam ihsin a sahnak a tah ih dong ruk sah a si. Biakinn phar thawn dai aw in sakmi khaan tampi, Biakinn kimvel ahcun a um ih khaan pakhat cu dong li kau an si fingfing.

⁶Hi khaan pawl cu dot thum in tuahmi an si ih dot khatnak ah khaan sawmthum fingfing a um. Biakinn phar a lenglam cu a tluntabik khaan ah a paa bikih a thuailam khaan ahcun a sah deuh vivo. Cuticun zial donnak khansuk pawl cu phar parah hrencih ṭul loin phar parah an taang thei.

⁷Curuangah Biakinn phar cu a lenglam ihsin zoh tikah cun a taw ihsin a lu tiang a sah daan a bangrep mi phar a bang. Biakinn phar lenglam, a khaan fatete ih lenglam ihsin kailawn kel pahnih an tuah ih dot thuaita bik ihsin tlunta bik dot tiang kai a theih.

⁸Hi khaan fatete ih lenglam phar pawl cu dong nga sah an si ih khaan fatete sung luhnak ah Biakinn saklam kap ihsin sangka pakhat a um; Biakinn thlanglam kap ihsin a dang sangka pakhat a um. Biakinn kimvel ah dong nga kau cangdawl a um vivo ti kha ka hmu. Cuih cangdawl cu leilung ihsin dong ruk a sang ih Biakinn phar kiang khaan fatete ih zial thawn a rual aw a si. Cuih cangdawl le puithiam pawl ih hmanmi inn pawl karlakah, Biakinn sir tluan ahcun, dong kul kau hmunlawng um.

¹²Cuih hmunlawng a netnak, Biakinn ihsin nitlaknak lamah inn pakhat a um ih dong sawmkua sau le dong sawmsarih kau a si. A phar cu a kimvel in dong nga a sah a si.

¹³Cupa cun Biakinn ih lenglam a tah ih dong zakhat a sau. Cule Biakinn dunglam ihsin hmunlawng mi tan in nitlaknak lamih ummi inn a netnak tiang dong zakhat thotho a ti.

¹⁴Biakinn hmailam ah vorhlam le kehlam ih ummi hmunlawng siarcih in dong zakhat thotho a si.

¹⁵Inn a saulam cu nitlaknak lamah a tah ih a kaphnih ih fehnak lamzin thawn dong zakhat ṭhiamṭhiam a si. Biakinn sung vung luhnak, Hmun Thianghlim le Hmun Thianghlim Bik pawl cu,

¹⁶a zial ihsin a sangkate tiang thing in khuhmi a si. Hi sangkate pawl cu khuh theimi an si.

¹⁷Biakinn sunglam phar cu sangka tlun tiangin tuumkung le cherubim timi thla nei ramsa zuk in,

¹⁸a khat ṭheh a si. Tuumkung le cherubim zuk pawl cu, cuih khaan kimvel phar parah cun, karlak thlak in zuk an suai. Cherubim cu hmai pahnih fingfing an nei.

¹⁹Hmai pakhat cu minung hmai a si ih kap khat lamih tuumkung lam a hoi, hmai dang pakhat cu kiosa hmai a si ih khatlam tuumkung a hoi ve. Phar parah cun a tluanpi in,

²⁰zial ihsin sangka tlun tiang cuvek cun a si thluh.

²¹Hmun Thianghlim ih sangka ṭhuam pawl cu a kauh le a sah an tia aw ṭheh a si. Hmun Thianghlim Bik sung vung luhnak sangka hmaiah thing ih tuahmi biakṭheng bangtuk a si mi,

²²thil pakhat a um. Cumi cu dong thum a sang ih dong hnih a kua. A kil ih ṭhuam pawl, a hram dammi le a kap pawl khal thing ih tuahmi a si thluh. Mipa cun ka hnenah, “Himi hi BAWIPA ih umnak hmunih a dingmi cabuai a si,” tiah i ti.

²³Hmun Thianghlim sung vung luhnak a netnak ah sangka pakhat a um ih Hmun Thianghlim Bik vung luh netnak ah sangka dang pakhat a um fawn.

²⁴Hi sangka pawl cu kharton ih tuahmi an si ih a laifang in a ong awmi sangka an si.

²⁵Biakinn phar par vekin Hmun Thianghlim sangka par ahcun tuumkung le cherubim zuk an um. Biakinn sung vung luhnak sangka ahcun a lenglam in thing in tuahmi sangka khuh an thlai.

²⁶Hi khaan sirlam kaphnih ah sangkate an um ih a phar cu tuumkung zuk in an mawiter.